Peqqissutsimut inunnullu Innarluutilinnut Naalakkersuisoq Ilulissani Tiliup isumasioqatigiisitsinerani ataatsimeersuartitsineranilu peqataavoq

Piffissami 11. septemberimit 15.september 2026 ilanngullugu, Peqqissutsimut Inunnullu Innarluutilinnut Naalakkersuisoq Anna Wangenheim Ilulissanut angalavoq.

Angalanermut siunertaavoq Tiliup isumasioqatigiisitsinerani aammalu ataatsimeersuartitsinerani peqataanissaq. Naalakkersuisoq Ilulissaniinerani iluatsillugu Allorfik Avannaa aammalu Sungiusarfik Ikinngummut pulaarpoq, taakkunani neqeroorutit kiisalu misilittakkanik ilisimasanillu paarlaasseqatigiinnissaq siunertaralugu.

Tiliup isumasioqatigiisitsinerani ataatsimeersuartitsineranilu ilaatigut peqataapput sineriammit innarluutillit peqatigiiffii, Kalaallit Nunaanni Innarluutillit Piginnaanikittullu Kattuffiat, Neriuffiup Kattuffia, Perorsaanermik Ilinniarfik, innuttaasut immikkullu saqqummiillutik peqataasut.

Ukioq manna Tiliup aaqqissuussaa qulequtserneqarsimavoq “Soriarsinnaajunnaartutut misiginerup alannguani”. Tassani inuit innarluutillit pisinnaatitaaffii, peqataatinneqarnissaat aammalu inuiaqatigiinni naligiimmik periarfissaqarnissaat sammineqarput.

Immikkut sammineqarput imminut toqunnissamut pinaveersaartitsinermi ilisimatusarneq, Danmarkimi innarluutilinnut festivalimi aaqqissuussisartut peqataasartullu, kulturimik pilersitseqatigiinneq, katsorsaanermik nuna tamakkerlugu sullissisut Inulerivik aamma innuttaasunit misigisanik saqqummiineq.

Isumasioqatigiisitsineq ataatsimeersuarnerlu nunap immikkoortuinit assigiinngitsuneersut peqataaffigaat, oqallinnerit pilersinneqarput aamma isummersoqatigiinnermik periarfissiivoq. Saqqummiunneqartut oqallissutigineqartullu siunissami sulineq pillugu pingaarutilinnik eqqarsaatissiipput. Ataatsimut naapisimaarnerup takutippaa inuit innarluutillit pisinnaatitaaffii allassimasut inuillu innarluutillit ulluinnarni inuunerminni aporfii ataatsimut akisussaaffimmik kivitseqatiginniffiunerusariaqarneri, soorlu Naalakkersuisup Tiliup ataatsimeersuartitsinerani tikilluaqqusilluni oqalugiarnermini ilaatigut oqaatigigaa:

Ullumikkut eqqaamasariaqarparput ataasiakkaat kisimiillutik allannguinermik pilersitsisinnaanngimmata. (...) Akisussaaffiit assigiinngisitaarput, kisianni siunertaq ataasiuvoq. Taamaattumik akisussaaqatigiinneq ataqatigiissaarinerlu pingaaruteqaqaat. Immikkoortut tamarmik imminnut isumalluutissarsiornatik suleqatigiittariaqarput. Tamatta immikkut akisussaaffeqarluta ataatsimoorluta suliassaq kivitseqatigiiffigisariaqarparput. Inuk innarluutilik tassaavoq ataatsimoortumik isigineqartariaqartoq, sullissiviit akornanni agguataarneqartussaanngitsoq.

Naalakkersuisup naggasiullugu Tiliup aaqqissuussineranut kiisalu peqataasut tamarmik ilisimasaminnik misilittakkaminnillu avitseqatiginninnerannut qutsaviginnippoq:

Ullut pissarsiaqarnartut, naapitsinerpassuit, oqaloqatigiinnerit, attortinnartut, alianartut illarnartunullu misigisaqaqatigiinnitsinnut qujanarujussuaq – pisinnaatitaaffinnut eqquutsitsiniarnermi oqaloqatigiikkaangatta paaseqatigiinnerulertuartarpugut – aammalu eqquutsitsiniarnissamut qanillattortarluta.

Uani Peqqissutsimut Inunnullu Innarluutilinnut Naalakkersuisoq Anna Wangenheimip Tiliup ataatsimeersuartitsinerani tikilluaqqusilluni oqalugiaataa atuarneqarsinnaavoq

Paasisaqarnerorusukkuit Peqqissutsimut Inunnullu Innarluutilinnut Naalakkersuisoqarfik uunga emailimut: pn@nanoq.gl. attavigineqarsinnaavoq. Oqarasuaat: 34 50 00.