Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmit aallartitat Finlandimut angalapput pingaarnertut sammissallugit qarasaasiaq atorlugu pinnguaatit gaming aamma esport

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik sapaatip akunnerisa arfineq pingajuanni suleqatigiissitatut Finlandimut angalavoq pingaarnertut sammillugit qarasaasiaq atorlugu pinnguaatit aamma esport. Angalaneq suleqatigiinnerup nordatlantisk projekt ”InnoGS”-ip ataatsimut ingerlataanut atatillugu ingerlanneqarpoq. Suliniuteqarneq Ilinniartitaanermut Periusissiap iluani ineriartortitsinermut suliniutinut ilaavoq aammalu aningaasalersorneqarluni taakkunannga aamma EU-pNPA-pilersaarutaanit. (Northern Periphery and Arctic Programme).

Tikeraarnermi aallartitat Assembly Winter 2026 Helsinkimi peqataapput, tassani E-sport pillugu ilisimasassanik nalilinnik aamma ineriartornermut isumassarsiat pissarsiarineqarlutik, tamatumunnga ilanngullugit nuna tamakkerlugu pissartanngorniuttarnerup ineriartortinneqarnera aamma Finlandimi pinnguaatinik unammiuaarnerit annerit pillugit ilisimasassanik pissarsiaqarlutik.

Naalakkersuisoqarfiup pingaartissimasaa tassaavoq ilisimasanik katersinissaq ”best practices” E-sportimik unammiuaartarnerit kiisalu pinnguaatinik aaqqissuussinernik pitsaasumik ingerlatsinissamut suut piumasaqaataanersut itinerusumik paasisaqarlutik. Tamatumani suna tamarmi atuuppoq, teknikikkut aaqqissuussinermiit, aaqqissuussinermi iluarsartuussinerit, ataatsimoorullugit suliarineqartarneri, piumassutsinut kajumissutsinut aaqqissuussaasumillu suleqatigiittarnernut. Assembly Winter 2026 annertuumik inuussutissarsiutigalugu aaqqissuussinertut tupinnartutut isikkoqarpoq kiisalu pinnguaatinik E-sportinillu pitsaasumik ingerlatsinissamut kajumilersitsilluni.

Naalakkersuisoqarfimmit E-sport annertuumik politikikkut suliniuteqarfigineqartussatut isigineqarpoq, taamaattumillu Naalakkersuisut anguniagaat naapertorlugit pineqartup nukittorsarniarneqarneranik suliaqarluni. Finlandimut isumassarsiorluni angalaneq tassaavoq pinnguaatinut aamma E-sportimut tunngavissanik ineriartortitsinissamut siunissaq ungasinnerusoq isigalugu alloriarneq siulleq.
NPA-mi suliniutinut suleqataanermut ilanngullugu Naalakkersuisoqarfimmit Finlandimi, Islandimi Sverigemi aamma Irlandimi suleqatit qanimut suleqatigineqarput. Anguniagaavoq piffissaq ungasinnerusoq isigalugu pinnguaatit E-sportillu nunatsinnut eqqunnissaat kiisalu nukittorsarlugit meeqqanut inuusuttunullu iluaqutissanngorlugit kiisalu ilinniartitaanermut kulturimullu annertunerusumik attavilerneqarnissaa anguniarlugu.

Angalanermi kalaallit nunaata iluani pinnguaatit aamma E-sport ineriartortinneqarnerani piffissami sivisunerusumi aaqqissuussinissamik aallartitsinissaq nalunaaqutserpaat, ammalu Naalakkersuisoqarfimmit qilanaarineqarpoq isumassarsiat aamma suliniutit tigussaasut saqqummiunneqarnissaat.
Inuusuttut allat oqaloqatigikkit qarasaasiakkullu unamminernut peqataallutit, Discord server: https://discord.gg/35DWtEA9 atorlugu

Eqqaamajuk Facebook aamma Instagram aqqutigalugit Naalakkersuisoqarfik malinnaaffigissallugu:

Paasissutissat sukumiinerusut pillugit attavigiuk: Cathrine Meldgaard Jensen, Toqq/direkte 34 50 00, mail: came@nanoq.gl