Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik

Suliassanik pinnguaatitaliilluni nutaaliorneq (InnoGS)

Nunap immikkoortuini nutaaliornermik ineriartornermillu nukittorsaataasinnaasoq, qarasaasiakkut aaqqiissuteqarnerit ineriartortinnerinut aamma uumasut naasullu imminnut susassareqatigiinneranut suliassanik pinnguaatitaliilluni kajumissisitsinermik tunngaveqartumik soqutiginninnerup qulaajaaffiginissaa naliliiffiginissaalu, suliniummi matumani pingaarnertut siunertarineqarpoq. Suliniut Interreg Northern Periphery and Arctic-programmip ilaatut ilaavoq piujuartitsillunilu ineriartornermut siuarsaanermut ilapittuutaasaaq aamma inukitsuni nunallu ilaani immikkoortuni unammillernartuni qarasaasiamik atulersitsinermik annerulersitsissaaq. P.T.G! (interreg-npa.eu)

Nunap immikkoortuini avannarpasinnerusuni suliassat pinnguaatitallit aqqutigalugit ajornartorsiutinik aaqqiissuteqarneq.

Finlandimi, Sverigemi, Irlandimi, Islandimi kiisalu Kalaallit Nunaanni najugaqarfinni illoqarfinnilu nunap immikkoortuini avannarpasinnerusuni ataatsimoorussamik unammilligassaqarput soorlu kiserliorneq, inuit utoqqalilersut inuusuttullu qimagullutik nuuttut. Nunat tamalaat suleqatigiinnerisigut Finlandimi Savonia University of Applied Sciences-mit ataqatigiissaarneqarpoq, suliassat pinnguaatitallit tunngavigalugit qarasaasiakkut aaqqiissuteqarnerit ikiorsiullugit unammilligassat taakkua saaffiginnissutigineqarput.

Suleqatigiinnerup aaqqiissuteqarnerit ineriartortikkumaarpai, inuusuttunik allanillu eqimattanik ikinnerussutilinnik peqataalersitsisut tulluarsakkat, aalajangersimasumik sumiiffinni ataatsimoortunut, nunap immikkoortuini, najugaqarfinni illoqarfinnilu avannarpasinnerusuni kiisalu qarasaasiakkut suliassanik pinnguaatitalinnik ineriartortitsinerni ilinniarnerit siuarsarneri, ilinniarsimallutik sulisut qarasaasianik nutaaliortut kajungilersinniarlugit tigummiinnarniarlugillu sullissinermik ilusiliineq.

Inuunermi nalillit pitsaanerulersinniarlugit qarasaasiakkut ataatsimoornerit ineriartortinnerinut nunani tamalaani 1,6 millioner euronut suliniut

Suleqatigiinnerup taassuma inerneratut pinnguaatinik nioqqutissiorneq, qarasaasiakkut suliassanik pinnguaatitalinnik aaqqiissuteqarnerit alla ataatsimoorussamik suliniutit pillugit ilisimasanik avitsinernut nunani tamalaani suleqatigiiffik pilersinneqassaaq. Nunat peqataasut isumalluutaat ataqatigiissillugit nunat immikkoortuini inuunermi nalillit pitsaanerulersinniarlugit najuulluni qarasaasiakkullu ataatsimoornerit pilersinneqassapput. Suliniutip inernerisa nunap immikkoortuani teknologiini nutaani paasisimasaqarneq ilisimasaqarneq aamma nukittorsassavaat avannaatungaanilu immikkoortut killinganiittuni piujuartitsilluni inuussutissarsiutinik ineriartortitsineq siuarsassavaa.

“Innovation Through Gamification Solutions”-ip (InnoGS) – suliniutip Finlandimit Savonia UAS, Humak University of Applied Sciences ilanngujtitsippaa. Peqataasut allat tassaapput Nunap immikkoortua Västerbotten aamma Creative Crowd fra Sverige, Ardán fra Irland, Naalakkersuisut aamma University of Iceland. EU’p Interreg NPA-nit (Interreg Northern Periphery and Arctic) – program aningaasaliissutinik 1,6 millioner euro-nik suliniut tigusaqarsimavoq. Ineriartortitsiniarluni suliaqarneq februar 2028-p tungaanut nangissaaq.

Peqataasuni aqutsisoq
Savonia University of Applied Sciences
mariia.hamalainen@savonia.fi

Peqataasut:
Region Västerbotten
Creative Crowd AB
Galway Film Resource Center GLG t/a Ardán
Humak
Ilinniartitaanermut, Kultureqarnermut, Timersornermut, Ilageeqarnermullu Naalakkersuisoqarfik.
University of Iceland

Uannga aningaasalersorneqarpoq:
Interreg Northern Periphery and Arctic

Piffissaq suliniutip atuuffissaa:
Aallartippoq: 01.03.2025
Naavoq: 29.02.2028

Kinaassusersiorani:
1.2 Innuttaasunut, suliffeqarfinnut, ilisimatuutut misissuiffinnut pisortanilu oqartussaasunut qarasaasianik atuutilersitsinerup pitsaaqutaanik atuineq

Missingersuusiat katillugit
1.603.953,39 EUR

NPA-Aningaasaleeqataaneq
1.042.569,69 EUR

Nunatsinni attaveqaat
Cathrine Meldgaard Jensen
came@nanoq.gl

Asasavut angajoqqaat
Inuusuttunut onlinekkut toqqissisimasumik aqunneqartumillu naapittarfimmik pilersitsinissamik siunertaqarluta Discord-serverimik pilersitsisimavugut. Serveri misiliutitut suliniutaavoq ataatsimoorfissatullu, inuusuttut naapittarfissaattut ataatsimullu soqutigisatik, soorlu ataatsimut isigalugu inuuneq, spillerneq, ilinniarneq ulluinnarnilu misigisatik pillugit oqalorujoorfissaattut siunertaqarluni.

Ukiutigut killiliussaq
Discordip atornissaanut 13-ileereersimasariaqarpoq, taamaattumillu serverimi ukiukinnerpaaffissatut killiliussaalluni. Serverimi 18-ileereersimanissaq aamma akuerisaavoq. Serveri 18-ileereersimasunut imarisanik imaqanngilaq, taamaalilluni ilaasortanut erseqqilluinnartunik malittarisassaqarpoq.

Ilaasortanngornissamut qinnuteqarneq
Serverimi ilaasortanngorniaraanni isernissamut qinnuteqartoqartariaqarpoq. Qinnuteqarnermi Kalaallit Nunaannut qanoq attuumassuteqarnerluni naatsumik nassuiarneqassaaq. Tamanna assersuutigalugu tassaasinnaavoq:
• kalaaliuneq
• Kalaallit Nunaanni najugaqarneq
• Kalaallit Nunaanni najugaqarsimaneq
• NPA-projektimi ilaaneq
• arlaatigulluunniit Kalaallit Nunaannut attuumassuteqarneq
Qinnuteqaat kalaallisut, qallunaatut tuluttulluunniit allanneqarsinnaavoq. Qinnuteqaatit tamarmik aqutsisumit misissorneqassapput, atuisullu tamarmik serverimut tamakkiisumik isersinnaalersinnagit aqutsisumit akuerineqassallutik.

Aqutsineq isumannaallisaanerlu
Serveri kajumissutsimik aqutsisunit sullissiviussaaq aqunneqarlunilu, taakku malittarisassat maleruarneqarnissaannik serverimilu ataqqinnittumik pisoqarnissaanik qulakkeerinneqataassapput.

Aqutsisut aqutsisunngortinnagit meeqqanik innarliisimannginnermik uppernarsaammik tamarmik tunniussinikuupput.
Isumannaallisaaneq annertusarniarlugu aqutsisut meeqqanut inuusuttunullu privatimik allassinnaanngillat. Atuisut aqutsisullu akornanni attaveqatigiinneq serverimi #support-imi ticket-systemi aqqutigalugu taamaallaat pisassaaq, tassani oqaloqatigiinnerit ammasumik aqutsisunit tamanit aqunneqarlutillu uppernarsaatissatut toqqorterneqartassapput.

Aqutsisut kajumissutsimik sulissapput taamaattumillu ulloq unnuarlu nakkutilliisassanatik. Supportikkut saaffiginnissutit aallaaviatigut akunnerit 24-it iluanni akineqartarumaarput.

Atuisut akornanni privatimik attaveqatigiinneq
Atuisut Discordikkut imminnut privatimik allassanerlutik namminneq aalajangersinnaavaat. Tamannali illit angajoqqaatut privatimik allaqatigiinnerit akuerinngikkukkit qaminneqarsinnaavoq. Allaqatigiinnerit ippingianarpata, isumapiloqarneq tunngavigalugu tatiginnilersitsiniaasoqarpat allatulluunniit killissamik qaangiisumik pissusilersortoqarpat aqutsisunut #support imaluunniit Tusaanngamut, immikkut ilisimasalittut siunnersorneqarnissamik neqerooruteqartunut nalunaarutigineqarsinnaapput.
Angajoqqaat meeqqami onlinekkut iliuusaannik eqqummaarinninnissaannik aamma inuit attaveqaqatigiittarfianni isumannaatsumik pissuseqarnissaq pillugu ingerlaavartumik meeqqaminnik oqaloqateqartarnissaannik kajumissaarpavut.

Oqaatsit ataatsimoornerlu
Serveri kalaallisut, danskisut tuluttullu atorneqarsinnaavoq.
Atuisut akornanni ataqqinnittumik nipeqarnissaq piumasaqaataavoq pissusilersuutillu pillugit malittarisassat serverimi #regler-imi takuneqarsinnaapput. Malittarisassanik taakkunannga unioqqutitsineq serverimit anisitaanermik kinguneqassaaq.

Inuit pillugit paasissutissat namminerlu inuuneqarneq
Serverimi assinik ikkussinissaq akuerisaavoq, taakkuli pornomut, persuttaanermut allatulluunniit mamianartutut isumaqarfigineqartunut tunngasunik imaqassanngillat.

Paasissutissanik inummut tunngasunik ingerlatitseqqinnissaq inerteqqutaavoq, taakkulu erngertumik peerneqassallutik.

Serverimi tamanut ammasumik allatat tamarmik Discordimit nalinginnaasumik toqqorneqartarput. Naalakkersuisoqarfiup oqaloqatigiinnerit nammineq toqqorneq ajorpai. Serveri tamanut oqallittarfiuvoq taamaattumillu atuisut sunik ingerlatitseqqinnerlutik eqqumaffigisariaqarpaat.

Malittarisassanik unioqqutitsineq
Malittarisassat maleruarneqanngippata aqutsisut pisoq apeqqutaatillugu assigiinngitsunik kinguneqartitsisinnaapput, soorlu makku:
• mianersoqqusineq
• allassinnaanermik mattussigallarneq
• atuisumik mattussigallarneq
• ataavartumik mattussineq
Kingunerititaq sorleq atorneqassanersoq, pisumiit pisumut nalilersorneqassaaq.

Imarisat akuerisaanngitsut
Serverimi malittarisassani ilaatigut makku inerteqqutaapput:
• qinngasaarineq uumisaarinerlu, persuttaaneq persuttaanissamilluunniit sioorasaarineq
• race tunngavigalugu immikkoortitsineq assigiinngisitsinerlu
• pornomut tunngasut atoqatigiittunillu videot
• imarisat imminut ajoqusernissamut kajumissaarutit
• imigassanik aalakoornartunik ikiaroornartunilluunniit tuniniaaneq agguaanerluunniit

Sakkortuumik atugarliorneq
Aqutsisut siunnersortaanatillu katsorsaasuunngillat.
Inuusuttoq sakkortuumik atugarliornermik imminulluunniit toqunnissamik takutitsippat, pineqartumut Tusaannga innersuunneqassaaq, taanna immikkut ilisimasalittut siunnersuisarfiuvoq Naalakkersusioqarfimmik suleqateqartoq.

Angajoqqaat attaveqarfissaat
Angajoqqaat aqutsisunut serverimi #support aqqutigalugu saaffiginnissinnaapput.
Angajoqqaat Naalakkersuisoqarfimmut toqqaannartumik attaveqarusukkunik, e-mailikkut ugguuna taamaaliorsinnaapput: iktin@nanoq.gl
Qinnuigissavatsigit qulequtatut "Discord" allassagit, tassungalu sullissisup uterfigissavaasi.

Serverimik siunertaq
Onlinekkut ataatsimoorfissamik pitsaasumik isumannaatsumillu, inuusuttut naaptittarfissaannik, nuannisarfissaannik inuunerlu, spillerneq ilinniarnerlu pillugit soqutigisaminnik avitseqateqartarfissaannik pilersitserusuppugut.