Tunumi ineriartortitsinermik suliniutinut aningaasanik ½ million-inik 2025-mi suli sinneqartoqarpoq

Tunumi aalisarnerup ineriartortinneqarnissaanut pilersaarummut 2024-2030-mut atatillugu, Tunumi aalisarnerup ineriartortinnissaanut maannamut 1.4 mio. kr.-inik tapiisoqarpoq. Aningaasat suliniutinut konto 50.01.20-meersuupput, matumani Inatsisartut Tunumi ineriartortitsinissamut 2 mio. kr.-inik annertussusilinnik aningaasaliinikuullutik. Aningaasat aprilip qaammataani Tasiilami aalisarneq pillugu isumasioqatigiinnerup ingerlanneqarneranut, motorilerinermik pikkorissarnernut kiisalu aalisarnermi atortulersuutinut soorlu aalisaatit isumamineersumik amoortartunik, ningittakkanik, ningittakkanut amoorutinik atorneqarnikuupput.

Tamatuma kingunerivaa, 2025-mi Tunumi aalisartunut aalisarnermut atortunut pikkorissaanernullu 1.433.000 kr.-it aningaasaliissutaallutik. Ukiup sinneranut Tunumi suliniutinut aningaasat suli 567.000 kr.-inik sinneqarput. Taamaammat Tunumi aalisarnerup ineriartortinnissaanut aningaasanik qinnuteqartoqarnissaanut kaammattuisoqarpoq, assersuutigalugu aalisarnermut atortunut, pikkorissarnernut, suliaqaatigaluni pikkorissaanernut, misileraalluni aalisarnernut imaluunniit aalisarnerup ineriartortinissaanut tapersiissuteqarsinnaasunut pisarialinnut allanut kiisalu Ineriartortitsinermi pilersaarummi suliniutinut.

Siunissaq ungasinnerusoq isigalugu Tunumi sinerissap qanittuani aalisarnermik ineriartortitsisoqarnissaa Naalakkersuisut anguniarpaat. Aalisarnermik ineriartortitsineq siuarsarneqassaaq, Tunumi aalisartut imminnut pilersorsinnaanerulersikkumallugit minnerunngitsumillu Tunumi suliffissaqartitsinerulerumalluni.

Ineriartortitsinissamik pilersaarummut ilaasumik aalisarnermut tunngatillugu aalisarnermi misilittagaqalernissaq, aalisarnermi atortunik sakkuutinillu pitsanngorsaanissaq, Tunumi aalisarnermi paasissutissat ilisimasallu pitsanngorsarnissaat, tunitsiveqarnikkut ineriartortitsinissaq aamma Tunumi aalisarnermut aqutsinissamut tunngassutilinni tunngavissanik pitsanngorsaanissaq ilaatigut anguniagaapput.

Qinnuteqarnermi suleriusissaq imaluunniit aningaasat sumut atorneqartussatut qinnutigineqarsinnaanerat pillugit apeqqutissaqaraanni Aalisarnermut, Piniarnermut, Nunalerinermut Imminullu pilersornermut Naalakkersuisoqarfik attaveqarfigineqarsinnaavoq uunga apn@nanoq.gl. Tunumi nunaqarfiit allaffiini tamarmiusuni qinnuteqarnissamut immersuiffik pissarsiarineqarsinnaavoq.

Qinnuteqarnermut immersuiffik aamma uani takusinnaavat una toorlugu. Ineriartortitsinissamut pilersaarut soqutiginnittunit uani atuarneqarsinnaavoq: Tunumi aalisarnerup ineriartortinneqarnissaanut pilersaarut 2024-2030 (naalakkersuisut.gl).

Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl