AtuartigukIllersornissaqarfiup annertunermik nunatsinniinnera Kalaallit Nunaata isumannaatsuuneranut ilapittuivoq
Nassiussisuuvoq: Nunanut Allanut Ilisimatusarnermullu Naalakkersuisoqarfik
Naalakkersuisut illersornissamullu ministeriaqarfik Issittumi isumannaatsuunermik nukittorsaaneq suleqatigiissutigaat.
Taamaammat sapaatit akunnerini makkunani Illersornissaqarfik Nuummi, Kangerlussuarmi, illoqarfinni arlalinni nunaqarfinnilu takussaaneruvoq.
Annertunerusumik najuunnermi sungiusarnernillu ingerlatsinertigut Illersornissaqarfiup Issittumi ingerlatsisinnaassutsini nukittorsassavaa, taamaalilluni Illersornissaqarfiup Kalaallit Nunaani, Kalaallillu Nunaata eqqaani suliassai pitsaanerpaamik isumagineqarsinnaaqqullugit. Ujarlernerit annaassiniarnerillu (SAR) kiisalu Kalaallit Nunaata sakkutooqarnikkut illersorneqarnera suliassanut ilaapput, tassani alapernaarsuineq oqartussaanermillu isumaginninneq ilanngullugit.
Kalaallit Nunaat nunarujussuuvoq, Issittumilu silaannaq ingerlatsisinnaanissamut immikkut piginnaaneqarnissamik pisariaqartitsiviuvoq. Taamaammat illersornissaqarfik ilisimaneqareersunik misilerarneqarpallaartanngitsunillu sungiusarnerunissamik pisariaqartitsivoq, taamaalilluni avatangiisinut Kalaallillu Nunaanni silaannaap pissusaanik ilisimaarinninneq attanneqarlunilu nukittorsarneqarsinnaaqqullugu.
Nunanut allanut Ilisimatusarnermullu Naalakkersuisoq Vivian Motzfeldt ima oqaaseqarpoq: “Illersornissaqarfiup annertunerusumik najuunnerani innuttaasunik toqqissisimalersitsinissaq siunertaavoq, taamaalilluta takutinniarparput Illersornissaqarfiup suliassaminik kivitisinnaallunilu piareersimanera. Innuttaasulli Illersornissaqarfiup sakkutuullu amerlanerusut taamatut periuseqarlutik nunatsinni ingerlataqarnerat sungiusimanngilaat. Taamaammat matumani sungiusarnernik ingerlatsinerit pineqartut, Naalakkersuisullu Illersornissaqarfiullu sulinitit pillugit qanimut oqaloqatigiinnerat erseqqissumik nalunaarutigissallugu pingaaruteqarpoq. Kalaallit Nunaat nunaavoq eqqissisimasoq – tamannalu Illersornissaqarfiup sapaatit akunnerini makkunani annertunerusumik najuunnerata allanngortissanngilaa”.
Attaveqarnermik suliniarnerup ilaatut Issittumi Sakkutooqarfiup pisortaa generalmajori Søren Andersen Nuummi innuttaasunik ataatsimiititsissaaq, tassanilu innuttaasut Illersornissaqarfiup najuunneranut suliassaminillu isumaginninneranut ilisimatinneqassapput apeqquteqarsinnaassallutillu.
Innuttaasunik ataatsimiititsineq sapaammi ulloq 22. juni nal. 15:00 Nuummi illorsuarmi timersortarfimmi, halimi, ingerlanneqassaaq.
Sungiusarnernik ingerlatsinerit pillugit annertunerusumik paasisaqarnissaq pillugu Naalakkersuisut makku innersuuppaat:
Issittumi Sakkutooqarfik
ISSITTUMI SAKKUTOOQARFIK - Joint Arctic Command | Facebook
Illersornissaqarfik
Kiisalu Illersornissaqarfiup Facebookikkut, Blueskyikkut, X-ikkut Instagramikkullu quppernerini.
Annertunerusumik paasisaqarusukkaanni attavissaq: Immikkut ittumik Siunnersorti Sophie Rud, 345000 soru@nanoq.gl