Illersornissaqarfiup qaammatini aggersuni Kalaallit Nunaanni Kalaallillu Nunaata eqqaani suliani annertusiniarpai

Illersornissaqarfiup Kalaallit Nunaanni suliaminik isumaginninnini aasap ingerlanerani najuunnerunikkut sungiusarnernillu ingerlatsinertigut nukittorsassavaa. Illersornissaqarfiup Issittumi ingerlatsisinnaasusaata nukittorsarnissaa kalaallillu inuiaqatigiit isumannaannerusumik inissisimanissaannik qulakkeerinneqataanissaq siunertarineqarpoq. 

Sulinitit ilaatigut makkuussapput: 

• Sakkutuut immikkut sungiusarsimasut ukiuunerani sungiusarnerat kiisalu attaveqaatinut pingaarutilinnut attuumasumik sungiusarnerit.
• Helikopterinik marlunnik (EH-101) ingerlatanik suliassanut ikorfartuutissanik tikisitsineq.
• Imartami isumagisassat nukittorsarnissaannut fregatimik tikisitsineq.
• Issittumi tunngaviusumik ilinniartut akuliunnerisigut, nunami attaveqaatinik pingaarutilinnik nakkutiginninneq. 
• F-16-mik Kangerlussuarmi sineriammilu nakkutilliinermik sivikitsumik periarfissaqarluni tikisitsisinnaaneq. 

Illersornissaqarfiup suliniutaanut Naalakkersuisut akuutinneqarput, ingerlaavartumillu nunaqavissut akuutinneqarnissaat kiisalu piffissap piniariartarfiit uumasullu piaqqisarneri eqqarsaatigalugit pilersaarusiornernut naleqqusaasoqarlunilu paasissutissiisoqassaaq. 

Nunanut allanut Ilisimatusarnermullu Naalakkersuisoq Vivian Motzfeldt ima oqaaseqarpoq: ”Isumannaallisaanermi politikikkut inissisimanerup illersornissaqarfiup Kalaallit Nunaanni, Kalaallillu Nunaata eqqaani ingerlatsisinnaanermik sungiusartarnissaa pissutissaqartippaa. Nunaqavissut akuutinneqarnissaasa qulakkeernissaat Naalakkersuisut pingaartitaraat, taamaalilluni uagut innuttaasutut nunatsinni isumannaallisaanermik kivitseqataanerput nukittorsarneqarsinnaaqqullugu. Issittumi Tunngaviusumik Ilinniartitaanermi atuartut suliassanik isumaginninnermi suleqataanissaat qilanaaraara”. 

Suliniutit ilusilersorneqarneranni Naalakkersuisut illersornissamut ministerimik Troels Lund Poulsenimik, illersornissamullu pisortamik Michael Wiggers Hyldgaarimik qanimut oqaloqateqarput. 

Illersornissamut ministeri Troels Lund Poulsen ima oqaaseqarpoq: ”Illersornissamut ministerinngoramali Issittumi isumannaallisaanerup nukittorsarnissaa pingaartippara, taamaammallu Naalakkersuisunik qanimut suleqateqarnera annertuumik iluarisimaarpara. Illersornissaqarfiup najuunnerata annertusarnissaani piffimmi pissutsit, Kalaallillu Nunaanni isumannaallisaanermi politikikkut unammillernartut immikkut isiginiarneqassapput.”

Suliniutinut ilagitillugu innuttaasunut sammititanik aaqqissuussanik ingerlatsisoqartassaaq, tassani Nuummi fregatip Kangerlussuarmilu timmisartunut illorsuup tamanut ammatinnerisigut, taamaaliornermilu kalaallit innuttaasut Illersornissaqarfimmik piginnaasaanillu paasisaqarnerunissaq siunertaavoq. 

Siunissami sakkutuut qullersaqarfiat suliniutit pillugit pingaarnertut saqqummiussisartuussaaq. Suliniutit pineqartut ingerlanneqarnissaannut paasissutissat erseqqinnerusut pillugit takusassiivit tulliuttut innersuuppaat:

Arktisk Kommando

ARKTISK KOMMANDO - Joint Arctic Command | Facebook

Forsvaret

Kiisalu illersornissaqarfiup Facebookikkut, Bluesky-ikkut, X-ikkut Instagramikkullu qupperneri.

Annertunerusumik paasisaqarusukkuit attavigiuk: Naalakkersuisup allattaa Rosa Thorsen, rsth@nanoq.gl +299345000