Naalakkersuisut Greenland Resources A/S-imut piiaanissamut akuersissummik tunniussipput

Assi: Emil Nørgaard Stach, Justin Case Productions

Ulloq 19. juni 2025 Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup Naaja H. Nathanielsen Dr. Ruben Shiffman, Greenland Resources A/S-imi siulersuisunut siulittaasoq, peqatigalugu Piiaaffik Høstakken-imi (”Malmbjerget”) molybdæn-inut aamma magnesium-inut ukiuni 30-ni piiaanissamut akuersissut atsiorpaa.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, nalliuttorsiorpalaartumik atsioqatigiinnermi oqarpoq:
”Naalakkersuisut aatsitassarsiorfiutileqatigiiffimmut piiaanissamut akuersissummik suli allamik tunniussisinnaammata naammagisimaartorujussuuarput. Aatsitassarsiornermut suliassaqarfimmi siumut ingerlasoqarnera misigisarput tamatsinnut nutaarsiassaavoq pitsaasoq. Aatsitassarsiorluni suliassat, aningaasaqarnerup imminut nammattuunissaa najukkanilu inuiaqatigiit sullivissanik pilersitsinertigut, najukkami inuussutissarsiortut suliassaqalernerisigut aammalu IBA-mik taagorneqartoq, tassaasoq ingerlatseqatigiiffiup, kommunip aamma Namminersorlutik Oqartussat akornanni isumaqatigiissut, najukkami inuiaqatigiinnik ukkatarinniffiusoq atorlugu, iluaqutissarsitinneqarnissaat pillugu Naalakkersuisut anguniagaannut iluaqutaapput. Europa-mi sisannut suliffeqarfiit annersaasa ilaannut tunisisarnissamut ukiunut 10-nut isumaqatigiissuteqarnerisa kinguninngua Greenland Resources-imut piiaanissamut akuersissuteqartoqarpoq. Tamanna aatsitassarsiornermik suliaqartortatsinnut, kisianni aamma Greenland Resources-imut taassumalu suliassaanut, nalinginnaasumik tatiginninnermut takussutissaavoq. Greenland Resources A/S-ip suleqatiginerata ingerlaannarnissaa qilanaaraarput, aammalu tamatta pilluaqqorusulluta aammalu sulilluarnissassinnik kissaallusi.”

Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq, Bentiaraq Ottesen, nalliuttorsiorpalaartumik atsioqatigiinnermi peqataanngilaq, kisianni ingiaqatigisaanik oqaatigalugit:
”Piiaanissamut akuersissutip tunniunneqarnerani Greenland Ressources suliassap ineriartortinneqarnerani pingaarutilimmik alloriaqqippoq. Aatsitassarsiorluni suliassat pinngortitaq ataqqillugu paasisimasaqarfigalugulu aammalu avatangiisigut inuiaqatigiillu ukkataralugit ingerlanneqartarnissaat Naalakkersuisut pingaartippaat. Tamatumani ammasuunissaq, suliassaqarfimmi pingaartitsinissaq aammalu najukkami inuiaqatigiit kalluarneqartussat qanimut oqaloqatiginissaat - akuutinnissaallu - pisariaqarpoq. Nalunngilarput aatsitassarsiorluni suliassat avatangiisitsinnut sunniisartut, taamaattumillu taakkua akisussaassusilimmik aammalu avatangiisini killissaliussat ersarissut iluanni ingerlanneqartussaapput. Naalakkersuisuni tamatuma peqatigisaanik suliassap najukkani sullivissanik pilersitsisinnaanera aammalu aningaasaqarnikkut ineriartornermut iluaqutaasinnaanera pitsaasutut isigaarput.”

Greenland Resources A/S-imi siulersuisunut siulittaasoq, Dr. Ruben Shiffman, nalliuttorsiorpalaartumik atsioqatigiinnermi oqarpoq:
"Naalakkersuisut ilumoortumik qutsavigaakka. Suliffeqarfipput piujuartussamik aatsitassarsiorfimmik ingerlatsinerup iluani aammalu najukkami inuiaqatigiinnut siuariartortitsinissap atugarissaartitsinissallu iluanni siusinnerusukkut aatsitassarsiorfinnit pitsaasumik oqaluttuassartaqarpoq. Malmbjerg aatsitassarsiorfiup ukiuni 20-ni ingerlanneqarnerata ingerlanerani Kalaallit Nunaannut akileraarutinut 1 milliard USD pallillugit isertitaqartitsisinnaavoq (NI 43-101 feasibility study naapertorlugu); tamanna Tunup sineriaani pisariaqartinneqartunik attaveqaasersuuteqalersitsisinnaavoq aammalu inuit nutaanik inuunerminni atugaqalersissinnaallugit. Suliassaq nunarsuarmioqataalerluni aammalu illersornissamut aningaasartuutit annertunerujussuanngorlutik piffissami suliassaalerpoq. Suliassami EU-mi molybdæn-inik pisariaqartitsinerup tamarmiusup 25 %-iata missaanik aammalu illersornissamut atortussat iluanni pisariaqartitsinerup 100 %-ianik pilersuisinnaasussaavoq (illersornissamut suliffissuaqarnermut savimernit atortussat 80 %-iinit annertunerusut molybdæn-imik atuiffiusussaapput). EU nunarsuarmi molybdæn-inik atuinerpaanut tulliuvoq, piareersaalluni suliaqarnissamut annertoorujussuarmik piginnaasaqarluni aammalu nunarsuarmi sisannik immikkut ittunik tunisassiat pitsaanerpaartai tassaniillutik, kisianni molybdæninik piiaasoqarani. Nuna ataasiinnaq maannakkorpiaq EU-mut pingaarnertut molybdæn-inik, sisannut illersornissamullu annertuumik atorneqarnissamut naleqqulluinnartunik, aammalu magnesium-inik, biilinik innaallagiamoortunik tunisassiornermut aalajangiisuulluinnartunik, pilersuisuuvoq. Malmbjerg-ip tamanna allanngortittussaavaa."

Alloriarnissaq tulleq
Greenland Resources A/S-ip Avatangiisinut Sunniutaasussanik Nalilersuineq (VVM-imut nassuiaat) aamma Inuiaqatigiinni piujuaannartitsisumik ingerlatsinermik naliliineq (VSB-imut nassuiaat) inaarsarlugit ingerlappai. Taakkua naammassippata, nassuiaatit sapaatit akunnerini 8-ni tamanut ammasumik tusarniaassutigineqassapput.

VVM-inut aamma VSB-imut nassuiaatit inaarutaasut Naalakkersuisunit akuerineqareerpata, ingerlatseqatigiiffiup aatsitassarsiorfimmut matusinissamullu pilersaarutit suliarisussaavai. Greenland Resources A/S aatsitassarsiorfimmut matusinissamullu pilersaarutinik nassiussinissamut 31. december 2026 tikillugu piffissalerneqarpoq. Allatut akuersissuteqartoqarsimanngippat, aatsitassarsiorluni suliaqarneq kingusinnerpaamik ulloq 31. december 2028 aallartinneqartussaavoq.

Qulequtaq taanna pillugu nutaarsiassat allat

• 7. november 2022: Mestersvig-ip eqqaani molybdæn-isiorfissamut VSB-imut aamma VVM-imut suliakkiussanut najoqqutassat Naalakkersuisut akueraat

Attaveqarfissat
Tusagassiortunit saaffiginninnerit: Jørgen T. Hammeken-Holm, tlf. 346800 imaluunniit asn@nanoq.gl
Saaffiginninnerit allat: Aatsitassanut Ikummatissanullu Aqutsisoqarfik, tlf. 346800 imaluunniit mlsa@nanoq.gl