Mestersvig-ip eqqaani molybdæn-isiorfissamut VSB-imut aamma VVM-imut suliakkiussanut najoqqutassat Naalakkersuisut akueraat

Greenland Resources A/S-ip Tunumi Mestersvigip eqqaani Maqqagai-mi molybdæn-isiorfissaanut inuiaqatigiinni piujuaannartitsisumik ingerlatsinermik naliliinermik (VSB) aamma avatangiisinut sunniutaasussanik naliliinermut (VVM) suliakkiussanut najoqqutassiai akuerineqarput. Suliakkiussanut najoqqutassaq aatsitassamut molybdæn-imut piiaanissamut akuersissummik qinnuteqarnissamut suliap ingerlaneranut aallarniutaavoq.

Aatsitassanut Inatsisinillu Atuutsinneqarnerannut Naalakkersuisoq, Aqqaluaq B. Egede oqarpoq:

”VSB-imut aamma VVM-imut suliakkiussanut najoqqutassat akuerineqarnerat molybdæn-isiorfissami ineriartortitsinissamut pingaaruteqarpoq. Molybdæn-isiorfissaq aatsitassarsiorluni suliassaavoq nunat allat annertoorujussuarmik soqutiginninnertik takutissimallugu. Ilaatigut EU-mi suliassaq soqutigineqarpoq, tassami suliassami molybdæn-eqarfik Europami sisaliornermik suliffissuaqarnermut attuumassuteqarmat.

Molybdæn-isiorfissaq Tunumut pitsaasunik sunniuteqassasoq neriuutigigakku erseqqissassallugu pingaaruteqarpoq. Ilaatigut aningaasaqarnikkut siuariartornertut, suliffissaqartitsiniarnermi periarfissat amerlanerulernerattut aammalu Ittoqqortoormiini Tasiilamilu innuttaasunut iluaqutaasumik inuussutissarsiornerup nukittunerulerneratut ilusilimmik. Ingerlatseqatigiiffiup aammalu Ittoqqortoormiini Tasiilamilu najukkani innuttaasoq annertunerusumik oqaloqatigineqarneranni Tunumi piujuartitsisumik ingerlatsinermik suliassap periarfissarititai paasinarsinerusussaapput.

Naalakkersuisut suliassamut inaarutaasumik isumminnginneranni qinnuteqaatip suliarineqarnerata ingerlanissaa sivisuujusussaavoq. Naatsorsuutigaara najukkameersut tusarnaarniarlugit ilinniarfiginiarlugillu siunissami qanittumi Ittoqqortoormiit tikeraassallugu.”

Tunngaviusoq

Greenland Resources Inc. Tunumi Mestersvigip eqqaani aatsitassarsiorluni misissuinissamut akuersissummik peqarpoq. Piiaanissamut akuersissummik qinnuteqarnissamut ingerlatseqatigiiffik aatsitassarsiorfimmi ingerlatassat inuiaqatigiinni piujuaannartitsisumik ingerlatsinermik naliliinermik (VSB) aammalu avatangiisini sunniutaasussanik nalilersuinermik (VVM) suliaqarnissamut ingerlatseqatigiiffik pisussaaffeqarpoq.

Greenland Resources Inc.-ip 2021-mi nassuiaatinut marlunnut taakkununnga suliakkiussanut najoqqutassanut missingiutit tunniuppai. Suliakkiussanut najoqqutassat 2021-mi upernaakkut tamanut ammasumik tusarniaassutigineqarput. Suliakkiussanut najoqqutassat tamatuma kingorna tusarniaanermi oqaaseqaatit tunngavigalugit iluarsaanneqarput.

Suliakkiussanut najoqqutassani akuerineqartuni taakkunani avatangiisinut nalilersuinermik aamma inuiaqatigiinni piujuaannartitsisumik ingerlatsinermik naliliinermik suliaqarnissamut killissaliussat aalajangersarneqarput. Nalilersuinernut taakkununnga missingiutit pigineqalerpata sapaatit akunnerini 8-ini tamanut ammasumik tusarniaassutigalugit nassiunneqassapput.

VVM aamma VSB suuppat?

Avatangiisinut sunniutaasussanut nalilersuineq (VVM): Aatsitassarsiorfissap avatangiisinut qanoq sunniuteqarnissaa naatsorsuutigineqarnersoq, kiisalu sunniutaanerluttussat annikillisinniarlugit qanoq iliuuseqartoqarniarnersoq, ingerlatseqatigiiffiup nassuiataa.

Inuiaqatigiinni piujuaannartitsisumik ingerlatsinermik nalilersuineq (VSB): Aatsitassarsiorfissap inuiaqatigiinnut tunngasunut qanoq sunniuteqarnissaa naatsorsuutigineqarnersoq ingerlatseqatigiiffiup nassuiaataa. Assersuutigalugu suliffissaqartitsiniarneq aamma siuariartortitsinissamut periarfissat.

Najoqqutassiat

Suliakkiussanut najoqqutassiat akuerineqareersut aamma ingerlatseqatigiiffiup tusarniaanermut akissuteqaatinut tiguneqartunut akissutai (tusarniaaneq pillugu nalunaarusiaq) uani tamanut saqqummiunneqarput. 

Quppernermi matuma siuliani taaneqartumi tusarniaanermit najoqqutassat takuneqarsinnaapput, ilanngullugit tusarniaanermut akissuteqaatit tiguneqartut tamarmik.

Tusagassiortut saaffiginnissutaat
Attaveqarfigiuk Naalakkersuisumut allatsi Lars Salik H. Kielsen +299345317 imaluunniit lsak@nanoq.gl