Spiralilersuinermik suliaq aammalu arnat misigisaat Naalakkersuisut pimooruppai

Siullertut Naalakkersuisuniit assorujussuaq uggornarpoq arnat piumassuserinngisaminnik spiralilersorneqarsimanut pimoorussilluta akisussaassuseqarlutalu sulinerput, iperterniarneqarmat aammalu pinnguarnertut akisussaaffimmillu tiguserusunngitsutut nalilersorniarneqarmat. 

Naalakkersuisutut spiralilersuinermik suliaq arnallu akuersiteqqaarnagit pinngitsaalillugit naartunaveersaaserneqarnermik kalluarneqartut pimoorullugit isigineqarnerat, Naalakkersuisut erseqqissarusuppaat.

2025-mut aningaasanut inatsimmut isumaqatigiissummi takuneqarsinnaasutut, partiit atsioqataasut Inatsisartuni taarsiinissamut 2025-mi 4,5 million koruunit immikkoortippaat. Aalajangernerup tamatuma suliap ilungersunartup taassuma ataqqinnittumik peqqissaartumillu qulaajaavigalugulu passunneqarnissaanut pisariaqartitsisoqarneranik akuersaarnitsinnik takutitsivoq.  

Uku erseqqissaaffigisariaqarput:

1. Taarsiissuteqarnissamut aalajangiisoqartinnagu, misissuinerit maanna ingerlanneqartut naammassineqarnissaat Naalakkersuisut utaqqivaat. Tamanna aamma Aningaasaqarnermut Akileraartarnermullu Naalakkersuisup ersarilluinnartumik tusagassiorfitsigut novemberip naalernerani (KNR-imiit apersorneqarnerani) oqaatigisaa tusarnaarneqaqqissinnaavoq innersuussutigissavarput. Tamatumani suli kikkut taarsiivigineqarnissaannut, aningaasalluunniit qanoq amerlatigisut agguaanneqarnissaannut suli aalajangiisoqanngilaq, qulaajaanerit Inatsisartunit Naalakkersuisuniillu kissaatigineqartut tunngavigalugit suliarineqarlutik ingerlammata.
2. Aningaasanut inatsimmi 4,5 million koruuninik immikkoortitsineq aalajangersimasunik annertussusilinnik taarsiinissamut oqaaseqarnermi kisitsisit tunngaviat Aningaasaqarnermut Naalakkersuisumiit nassuiaassutigineqarpoq, erseqqissumillu apersorneqarnermi oqaatigisarlugu misissuinerit naammassippata Naalakkersuisut Naalakkersuisunngorumaartussalluunniit iliuuseqarnissamut periarfissaqalissasut, aningaasat immikkoortinneqarnerat tunngavigalugu. Aningaasat tunniussassatut naatsorsuutaasunut missingersuutit suliat 15-it tunngavigalugit, suliamullu ataatsimut 300.000 kr.-nik taarsiinissamut tunngaveqarlutik, naatsorsorneqarput. Erseqqissaatigineqassaaq, inuit taarsiiffigisassat amerlassusaannut aamma aningaasat amerlassusaannut misissuinerit apeqqutaassasut.
3. Misissuinerit maannakkut ingerlanneqartut – tassani kalaallit-qallunaallu oqaluttuarisaarnermi qulaajaanerat kiisalu inuit pisinnaatitaaffiinut attuumasumik qulaajaanerit ilanngullugit – suliami eqqortumik naammattumillu paasisaqarnissatsinnut pingaaruteqarput. Taakku tamarmik septembarimi 2025-mi naammassineqarnissaat naatsorsuutaavoq. Aamma tamanna tusagassiorfinniit apersorneqarnermi oqaatigalugulu ersarissarneqarpoq. Tusagassiorfiillu qanoq tusagassiinissaat qanorlu killuillutik saqqummersitsinissaat Naalakkersuisuni akuleruffigissanngilluinnarparput. Erseqqissaatigiinnarluguli suliami akisussaaffiit aggulussimanerat tunngavigalugu ataqatigiissaakkamik sulineq ingerlanneqarmat.

Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisoq Naalakkersuisut sinnerlugit spiralilersuinermut suliami oqaaseqarsinnaatitaavoq, Aningaasaqarnermullu Akileraartarnermullu Naalakkersuisoq aningaasanut inatsisip aningaasaqarnikkut sinaakkutai pillugit oqaaseqartarluni, aammalu tassaalluni aningaasanut inatsimmut isumaqatiginninniarnermi akisussaasuusoq. Taamaattumik tupinnanngilaq Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisoq aningaasanut tunngasunik isumaqatiginninniarnernut peqataanngitsoq tusagassiorfinniit aperineqaruni akissutissai allaasinnaappata. Akissutissammi eqqortut Aningaasaqarnermut Akileraartarnermullu Naalakkersuisoqarfimmiimmata.

Aammattaaq Naalakkersuisut ersaqqissaatigissavaat novembarip 27-iani tusagassiutinut nassiunneqartoq Naalakkersuisut akunnerminni isumaqatigiinnerat ataatsimoorullugulu suliaat tunngavigalugu nassiunneqartuummat

Arnat taakkulu ilaqutaasa pakatsineq misigisaat paasisinnaallugulu ataqqivarput, taamaammallu Naalakkersuisut manna suliap eqqortumik naapertuilluartumillu passunneqarnissaa qularnaarniarlugu anguniagaqarlutik sulipput. Taamaammat Naalakkersuisut, suliaq eqqortumik ingerlanneqarnissaanut politikikkullu atornerlunneqannginnissaanut kaammattuutigissavaat.

Pissutsit:

• Spiralilersuinermik suliami nunatsinni Namminersornerullutik Oqartussat 1992-imi peqqinnissaqarfimmik akisussaaffeqalernerat sioqqullugu kingornalu pinngitsaaliilluni naartunaveersaasiinernut misissuinerit ilaatinneqarput.
• Piffissami 1960-imit 1991-imut oqaluttuarisaanermik qulaajaanermi Naalakkersuisut qallunaat naalagaaffiat suleqatigaat, namminneerlutillu 1992-ip kingornanut tunngasunik misissuinermik aallartitsillutik.
• Misissuinerit septembarimi 2025-mi naammassineqarnissaat naatsorsuutaavoq, kingornalu taarsiissutissat amerlassusaat agguaanneqarnissaallu isummerfigineqassaaq.  

Aningaasaqarnermut Akileraartarnermullu Naalakkersuisoq ima oqaaseqarpoq:

"Spiralilersuinermik suliaq Naalakkersuisooqatigiit assorujussuaq pimooruppaat. Suliaq tamanna arnanut pineqartunut annertuumik kinguneqarsimasoq, misigissutsillu imaannaanngitsut allamut saatinniarneqarnissaat kissaatiginanngeqaaq. Suliarmi pitsaasumik ataqqinnittumik peqqissaartumillu ingerlanneqarnissaa kissaatigeqigatsigu. 2025-mut aningaasanut inatsimmik isumaqatigiissummi taarsiissutaasinnaasunut sillimmatinut 4,5 million koruunit immikkoortippavut – taakkulu aningaasanik aalajangersimasumik annertussusilinnut neriorsuutaanngillat, misissuinerilli maanna ingerlasut naammassineqarneranni iliuuseqarnissamut piareersimanitsinnut erseqqissumik oqariartuutaallutik. 

Naalakkersuisut ikkanngilluinnarput aamma akisussaaffimmik qimarratiginninngilluinnarlutik. Arnammi eqqunngitsumik pineqarsimasut illersornissaat ilungersoqatiginerallu paaseqqunaqaaq. Taarsiissutissat annertussusissaannik taakkunanngalu tigusisussanik aalajangiilersinnata, misissuinerni septembarimi 2025-mi naammassineqartussani tamakkiisumik paasisaqarnissarput utaqqivarput. Sukumiisumik naapertuilluartumillu passussinerup qularnaarnissaa pingaartipparput.

Amerlasuut pakatsinerat utaqqisinnaannginnerallu paasinarpoq, sulialli matuma eqqortumik ingerlanneqarnissaa qularnaartariaqarparput, misissueqqissaartut qanoq inerniliussaqarnissaat pisussaaffigigatsigu tunngavigisariaqaratsigulu. Misigissutsillu imaannaanngitsut pinnguariniarneqanngillat aamma qineqqusaarutiginiarneqassanngilluinnarput Naalakkersuisooqatigiinniit."

Suliami nutaanik paasissutissaateqartoqalersillugu, Naalakkersuisut ingerlaavartumik tamanik ilisimatitsisarnertik nangittumik ingerlatissavaat.

Sukumiinerusumik paasissutissat pillugit attavigiuk:
Nukaaka Tobiassen (Aningaasaqarnermut Naalakkersuisoqarfik)
Toqq/direkte 345517
nukat@nanoq.gl