Canadap aamma Kalaallit Nunaata Pikialasorsuaq pillugu suleqatigiinnertik annertusivaat

Naalakkersuisut siunnerfinnut nalunaarut, Pikialasorsuup imartaani nakkutilliinermik suleqatigiinnermut siuarsaataasussamik Canadamut isumaqatigiissuteqarput.

Pikialasorsuup imartaa ukiuunerani sikunngisaannarpoq. Taanna Kalaallit Nunaata aamma Canadap akornanni inissisimavoq.

- Pikialasorsuaq sumiiffimmi asseqanngilluinnartumi inissisimavoq, tamannalu Issittoq tamakkerlugu uumasunut pingaaruteqartorujussuuvoq. Canada suleqatigalugu, aqutsisooqatigiinnit ataatsimoorussatsinnit suleqatigiinnerup qaninnerulernissaanik qulakkeerisussanik pilersitsiniarluta aalajangerpugut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Siunnerfinnut nalunaarut Kalaallit Nunaata Canadallu akornanni ataatsimoorussamik aqutsisoqatigiinnut sinaakkusiisussaavoq. Taamatullu Canadamiut kalaallillu ilisimasaannik ilisimatusarnikkullu ilisimasanik avitseqatigiittarnissaq isumaqatigiissutigineqarpoq.

- Pikialasorsuaq allanngoriartormat qularnanngilluinnarpoq. Piniagassat pinngortitallu ileqqui allanngoriartortut piffimmi inuttaasunit malinnaaffigineqarpoq annerusumik angallaffiulernera silaannaallu allanngoriartornerata malitsigisaanik. Allannguutit taamaattut nunat killeqarfii akimorlugit isumaginiarnissaat ataatsimoorluni anguniagassaavoq, taamaattumillu maanna Canada qaninnerusumik suleqatigineqarnissaanut ilaasinnaalernerput nuannaarutigaarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Imartap asseqanngitsup, ukiuni tuusintilikkaani piniarfiulluarsimasup atornissaa illersornissaalu pillugu suleqatigiinnerup annertusitinneqarnissaa isumaqatigiissutaavoq. Naalakkersuisoq Kalistat Lund Qaanaamut tikeraarnissani pilersaarutigaa, Pikialasorsuaq pillugu innuttaasut qanittumik oqaloqatigisinnaanissaat anguniarlugu.

- Qaanaamut tikeraarnissannut qilanaarpunga. Piffinni aammalu nunap immikkoortua tamakkerlugu ilisimasanik avitseqateqarnissaq pingaaruteqarpoq. Sumiiffik asseqanngitsoq pillugu ataatsimoorluta pitsaanerpaamik isumaginnissaagut. Aamma Inuit Issittormiut Siunnersuisoqatigiiffiannik suleqateqarnerput nuannaarutigilluinnarpara. ICC Pikialasorsuaq pillugu ilisimasanik pingaarutilinnik pilersueqataavoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Nalunaarut Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup, Canadami Fisheries and Oceans-imut Ministereqarfiup kiisalu danskit Avatangiisinut Ministereqarfiata akornanni suleqatigiinneq pilersinneqarpoq.

Nalunaarut ullumikkut Nunalerinermut, Imminut Pilersornermut, Nukissiutinut Avatangiisinullu Naalakkersuisumit Kalistat Lundimit, Canadami Minister of Fisheries, Oceans and the Canadian Coast Guard Diane Lebouthillier-imit atsiorneqarpoq.

- Imartap pineqartup peqqissuunissaata qulakkeerneqarnera uumassusilinnut, tamaani uumasunut, aammalu Inunnut inuiaqatigiinnut eqqaaniittunut, sumiiffimmut tapersersuisuusunut peqqinnartuuvoq. Kalaallit Nunaanni QIA-milu suleqatikka peqatigalugit taamatut pingaarutilimmik alloriarsinnaagatta tulluusimaarutigaara. Pisoq taanna ukiuni tulliuttuni Inuit peqqiinnarnissaat tapersersorneqarnissaallu qulakkeerniarlugu nunani tamalaani suleqatinik aamma Inunnik inuiaqatigiinnik qaninnerusumik suleqateqalernissamut pingaaruteqarpoq, Canadami Minister of Fisheries, Oceans and the Canadian Coast Guard Diane Lebouthillier oqarpoq.

Taakku saniatigut atsiorneq Inuit Circumpolar Council Greenland-imit aamma Oceans North-imit najuuffigineqarpoq. Qikiqtani Inuit Association-ip (QIA) Kalaallit Nunaat pillugu oqallinnernut atatillugu Inuit Canadap naalakkersuisuinut suleqataaneranni inissisimaffini peqqutigalugu QIA atsiornermut uppernarsaasuuvoq. Atsiorneq Arctic Circle Assembly-p Reykjavik-imi Islandimiittumi ingerlanneqarneranut atatillugu pivoq.

- Inuit Issittormiut Siunnersuisoqatigiiffiata ICC-p Kalaallit Nunaata, Canadap aamma Danmarkip naalakkersuisui, kiisalu Qikiqtani Inuit Association suleqatigalugit Pikialasorsuup immikkoortuani imartami pisuussutinik piujuartitsinissamik aamma aqutsinermik, Inunnit aqunneqartumik, nunallu immikkoortuisa taakku akornanni nuttarsinnaanerup oqinnerulersinneqarnissaanut siuarsaanermut tapersersuinerput aqqutissiuussinerpullu ingerlateqqissavarput” Inuit Issittormiut Siunnersuisoqatigiiffiata ICC-p nunani tamalaani siulittaasua Sara Olsvig oqarpoq.

Siunnerfinnut nalunaarut oqaatsit uku atorlugit atuarneqarsinnaavoq:

- Kalaallisut

- Danskisut

- Tuluttut

- Franskisut

Nunalerinermut, Imminut Pilersornermut, Nukissiutinut Avatangiisinullu Naalakkersuisup oqalugiaataa uani kalaallisut aamma tuluttut atuarneqarsinnaavoq.

Pikialasorsuaq pillugu
Pikialasorsuaq Kalaallit Nunaata kitaata avannaarsuani Avanersuup aamma Canadami Nunavut avannarpasinnersaata akornanni imartaavoq. Pikialasorsuaq Issittumi aannersuit annersaasa ilagaat. Aannersuaq tassaavoq immami sikuugaluartumi imartaq ammaannartoq annertunerusoq uteqqittartorlu.

Najoqqutarisaq: Natural Ressources Canada

Annertunerusumik paasisaqarusunnermi Naalakkersuisup allattaanut Manasse Berthelsen oqarasuaat: +299 34 56 03 / 54 88 68-mut imaluunniit e-mail: mabr@nanoq.gl imaluunniit pan@nanoq.gl aqqutigalugu attaveqarfigineqassaaq.