Angerlarsimaffeqanngitsuuneq pillugu suliassaqarfimmi suliniutit tamakkiisumik isiginnittut orniguttarnerlu periusissiami nutaami ukkatarineqarput

Angerlarsimaffeqanngitsut pillugit suliassaqarfimmi Housing First aallaavigalugu kiisalu suliniutit tamakkiisumik isiginnittut orniguttarnerlu periusissiami aallaavigineqarput.

Angerlarsimaffeqanngitsuuneq pillugu periusissiap siunertaraa angerlarsimaffeqanngitsut inersimasullu akornanni isumaginninnikkut annertuumik atugarliortut pillugit sulinermi nutaamik ataatsimullu sammivilimmik aqqutissiunissaq.

Angerlarsimaffeqanngitsuuneq pillugu periusissiami Naalakkersuisut anguniagaraat:

- Angerlarsimaffeqanngitsut amerlassusaat ikilisinnissaat aamma inuiaqatigiinni angerlarsimaffeqannginngitsuuneq annertuumik ajornartorsiutaanera akuerineqarnissaa.
- Housing First aallaavigalugu suliniarnerup nuna tamakkerlugu atortuulersinneqariartuaarnera.
- Kommunini angerlarsimaffeqanngitsut pillugit pitsaaliuineq aamma suliniutit tamakkiisumik isiginnittut nukittorsarnissaat
- Angerlarsimaffeqanngitsunut siunnersuinerup tapersersuinerullu pitsaanerulernissaa taamaasillunilu inuunermut pitsaanerusumut aqqutissiuinermik ukkataqarnerulerneq.
- Angerlarsimaffeqanngitsut tapersersorneqarnissamut katerisimaarnissamullu immikkut pisariaqartitsinerannik naammassinnittunik najugaqariaatsinik amerlanerusunik pilersitsinissaq.
- Tamakkua saniatigut anguniagaavoq, inersimasut atugarliortut angerlarsimaffeqanngitsullu pillugit sulinermut atatillugu kommuninut sinaakkutit pitsaanerusut.

Kommunini tallimani tamani nunalu tamakkerlugu angerlarsimaffeqanngitsuunermi ajornartorsiutit pillugit eqeersimaarnerusumik sulinissamut Housing First aallaavigalugu periusissiaq ikiuutaassaaq.

Housing First tassaavoq tamakkiisumik isiginnittumik periuseqarneq, innuttaasoq siullerpaamik nammineq najugaqarfissaanik tunineqarluni peqatigitillugu innuttaasut ataasiakkaat ajornartorsiutaannut sammivilimmik isumaginninnikkut suliniutitut najugaqarnermi tapersersorneqarnissamut neqerooruteqarfigineqarnissaq.

”2022-mi angerlarsimaffeqanngitsunik kisitsinermi takuneqarsinnaavoq, innuttaasut 491-it angerlarsimaffeqanngitsuusut. Kalaallit Nunaanni angerlarsimaffeqanngitsut amerlassusaat nunanut allanut naleqqiullugu annertoqaaq. Tamanna Naalakkersuisut uagullu inuiaqatigiittut akuersaarsinnaanngilarput. Angerlarsimaffeqanngitsut amerlassusaat qaffasissoq ilaatigut pissuteqarsinnaavoq, innuttaasut ilaqutariillu atugarliortut annerusumik ikiorneqarnissamik pisariaqartitsisut, kiisalu oqartussat tungaanniit ullumikkumiit neqeroorutigineqartumit eqeersimaarnerusumik aamma ornigunnerusumik suliniuteqarnissaq. Angerlarsimaffeqanngitsuuneq pillugu periusissiap ajornartorsiutit taakkorpiaat sillimaffiginiarpai, politikkikkullu siammasissumik isumaqataaffiusunik aaqqiissutissat pillugit oqallinnissamut aallarniilluni.” Jess Svane oqaaseqarpoq, Isumaginninnermut, Suliffeqarnermut Nunamullu Namminermut Naalakkersuisoq.

Angerlarsimaffeqanngitsuuneq pillugu periusissiaq 13-inik immikkoortoqarpoq, pingasunngorlugit avinneqarsinnaasut: 1) Innuttaasunut atugarliortunut angerlarsimaffeqanngitsunullu najugaqartitsinissamut suliniutit 2) Angerlarsimaffeqanngitsunut pitsaaliuineq, ikiuineq tapersersuinerlu kiisalu 3) Ilisimasat ilisimasanillu avitseqatigiinneq.

Naalakkersuisoqarfiit kommunillu arlallit akornanni suleqatigiinnikkut periusissiamik suliaqarneq ingerlanneqarpoq. Tamatuma saniatigut angerlarsimaffeqanngitsunik suliassaqarfimmi qitiusumik suliaqartut paasisanik ikiuupput. Tassunga ilaapput angerlarsimaffeqanngitsunik suliassaqarfimmi saqqummersitanit ilisimasat attuumassutillit.

Naalakkersuisut angerlarsimaffeqanngitsuuneq pillugu periusissiaat 2023-p aallartinnerani aallarnisarneqassaaq.

Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl oqarasuaalluunniit + 299 34 56 11