GreenRoc Graphite Ltd-ip grafit-inut suliassaanut, Amitsoq, suliassamut suliakkiussanut najoqqutassap piareersaataasumik tusarniaassutigineqarnera

Amitsumi suliassamut suliassap killiffia

Immikkoortua	Killiffia	Ulloq
Suliassamut suliakkiussanut najoqqutassap piareersaataasumik tusarniaassutigineqarnera	Ingerlavoq	23. maaji - 27. juuni
VSB-imut aamma VVM-imut nassuiaatit imarisassaannut suliassamut nassuiaatit piareersaataasumik tusarniaassutigineqarnerat	Utaqqisinneqarpoq	-
VSB-imut aamma VVM-imut nassuiaatit minnerpaamik sapaatit akunnerini 8-ni tamanut ammasumik tusarniaassutigineqarnerat (piiaanissamut akuersissummik qinnuteqaat)	Utaqqisinneqarpoq	-
VSB-imut aamma VVM-imut nassuiaatit nutarterneqarnerat	Utaqqisinneqarpoq	-
IBA	Utaqqisinneqarpoq	-
Piiaanerup aallartinnissaanut atugassarititaasunik aalajangersaaneq	Utaqqisinneqarpoq	-
Piiaanermut matusinermullu pilersaarutit akuersissuteqarfigineqarnerat	Utaqqisinneqarpoq	-
Ingerlatassanut pilersaarutip siulliup akuersissuteqarfigineqarnera	Utaqqisinneqarpoq	-

Tusarniaanermut najoqqutassat:
GreenRoc Graphite Ldt Kalaallit Nunaata kujataani Nanortallip eqqaani akuersissummut 2013-06-imut pisinnaatitsissummik pigisaqartuuvoq. Piareersaataasumik tusarniaaneq, ingerlatseqatigiiffiup piiaanissamut suliassap aallartinnissaanut pilersaarusiorneranik, nalunaarutiginninneruvoq.

Kalaallit Nunaanni ingerlatseqatigiiffik immikkoortortaq, Greenland Graphite A/S, GreenRoc Graphite Ldt-ip piiaanissamut akuersissummik tunineqarnissamik qinnuteqarfigisaa, GreenRoc Graphite Ldt-ip pilersissimavaa.

Nunap assingata ilaa: Greenland Graphite Ldt-imut akuersissut 2013-06 qorsummik nalunaaqutsigaavoq

Tusarniaanermut najoqqutassaniipput allakkiat makkua (tamarmik kalaallisut/danskisut):
1. Suliassamut suliakkiussanut najoqqutassamut missingiut - GL
2. Suliassamut suliakkiussanut najoqqutassamut missingiut – DK

Tunngaviusoq
Aatsitassanut tunngasunik suliaqarnerit pillugit Inatsisartut inatsisaanni § 44 naapertorlugu piiaanissamut akuersissummik qinnuteqartoq suliassamut suliakkiussanut najoqqutassamik, Naalakkersuisunut nassiullugu nalunaarutigineqartussamik, suliaqartussaavoq. §44(2) naapertorlugu piiaanissamut akuersissutip tunniunneqarsinnaalinnginnerani, suliakkiussanut najoqqutassaq minnerpaamik qaammatisiutit malillugit ulluni 35-ni tamanut ammasumik tusarniaassutigalugu nassiunneqartussaavoq. Qinnuteqartup avatangiisinut tunngasut (VVM) imaluunniit inuiaqatigiinnut tunngasut (VSB) pillugit suliassamut nassuiaat tamanut ammasumik piareersaataasumik tusarniaassutigisussaappagu, taanna imaluunniit taakkua sapinngisamik suliakkiussanut najoqqutassaq pillugu tusarniaanermut peqatigitillugu piareersaataasumik tusarniaassutigineqartussaapput.
Aatsitassanik peqarfik piiarneqarsinnaasoq paasinarsisinneqarsimasoq killissalersorneqarsimasorlu kiisalu suliassamut suliakkiussanut najoqqutassaq tamanut ammasumik tusarniaassutigineqarsimasoq, tunngavigalugit piiaanissamut akuersissummik Naalakkersuisut tunniussisinnaanerat inatsimmi akuerisaavoq.
Tamanna isumaqarpoq inuiaqatigiinni piujuaannartitsisumik ingerlatsinermik naliliisoqarnissaa (VSB) aammalu avatangiisinut sunniutaasussanik nalilersuisoqarnissaa (VVM) sioqqullugu qinnuteqartoq piiaanissamut akuersissummik tunineqarsinnaasoq.

Piareersaataasumik tusarniaaneq
Suliakkiussanut najoqqutassap Naalakkersuisunut nalunaarutigineqarneranut siunertaavoq, suliap ingerlanerata, isumassarsiarineqarneraniilli aatsitassarsiorluni suliassap ineriartortinneqarnerani tamat siusissukkut akuutinneqalereernissaannik qulakkeerisussap, aallartitinneqarnissaa. Taamaalilluni tamat suliassami paasisimaarinnilernissaannut, siunnersuutinik ernumassutiminnillu saqqummiussinissamut kiisalu aatsitassarsiorluni suliassamut siunnersuutip saqqummiunneqartup ineriartortinnissaanut qinnuteqartup pilersaarutaannut tapersiinissamut, tusarniaaneq periarfissani siullersaavoq.

Suliassamut suliakkiussanut najoqqutassaq
Suliakkiussanut najoqqutassaq piiaanissamut suliassap naatsumik nassuiaatigaa. Suliakkiussanut najoqqutassaq piiaanissamut suliassami ataasiakkaatigut suliassamut allakkiani siullersaavoq, suliassap pingaarnertigut nassuiarneqarneranik imaqarluni, ilanngullugit piffissamut pilersaarut aningaasaqarnerlu. Suliakkiussanut najoqqutassaq, tunuarsimaarfeqarnernik nalornissutigineqartunillu arlalinnik kiisalu suliassap ilusilersorneqarnissaanut allatut siunnersuutinik, imaqarpoq.

Suliap ingerlanerata ingerlaqqinnissaa, tamatumalu kingorna akuersissuteqarnissaq
Suliassamut suliakkiussanut najoqqutassamut tusarniaanermut akissuteqaatit tiguneqartut Namminersorlutik Oqartussat tusarniaanermut nittartagaanni tamanut saqqummiunneqassapput aammalu ingerlatseqatigiiffimmut nassiunneqassallutik. Tusarniaanermut akissuteqaatit tiguneqartut tunngavigalugit suliakkiussanut najoqqutassap iluarsaannissaa aammalu tusarniaaneq pillugu nalunaarusiamik taagorneqartumi iluarsaassisimanermi uppernarsarnissaa, ingerlatseqatigiiffiup pisussaaffigai. Suliakkiussanut najoqqutassaq iluarsisaq tamatuma kingorna tusarniaaneq pillugu nalunaarusiamut aammalu isumalluummut paasinarsisinneqarsimasumut uppernarsaammut ilanngullugu Naalakkersuisunut politikkikkut akuersissuteqarfigineqartussanngorlugu nassiunneqassaaq. Tamatuma kingorna Greenland Graphite A/S-imut piiaanissamut akuersissut tunniunneqarsinnaassaaq.

VSB-imut aamma VVM-imut nassuiaatit
Suliakkiussanut najoqqutassaq VSB-imut aamma VVM-imut nassuiaatinut suliassamut nassuiaatit ilanngunnagit tamanut ammasumik tusarniaassutigineqarnissaa GreenRoc Graphite Ldt-ip toqqarpaa. Tamatuma kingunerisaanik tamatuma kingorna VSB-imut aamma VVM-imut nassuiaatinut suliassamut nassuiaatit piareersaataasumik tusarniaassutigineqassapput.
GreenRoc Graphite Ldt-ip IBA-mut isumaqatigiissuteqarsinnaalinnginnerani aammalu suliassamut aatsitassarsiorfimmut matusinissamullu pilersaarummik suliaqartussanngunnginnerani, VSB-imut aamma VVM-imut nassuiaatit Naalakkersuisunit akuerineqareersimassapput. Aatsitassarsiorfimmut matusinissamullu pilersaarut kingusinnerpaamik piiaanissamut akuersissutip tunniunneqarneraniit ukiut 4-t qaangiutsinnagit Naalakkersuisunit akuerineqareersimassapput.

Tusarniaanermut killigitinneqartoq: 27 juuni 2025
Tusarniaanermut akissuteqaatit Aatsitassanut Ikummatissanullu Aqutsisoqarfimmut nassiunneqassapput uunga mlsa@nanoq.gl