Kalaallit Nunaanni aalisariutit inuttaqarneri pillugit Namminersorlutik Oqartussat nalunaarutissaattut siunnersuummut tusarniaaneq
Kalaallit nunaanni aalisariutit inuttaqarneri pillugit Namminersorlutik Oqartussat nalunaarutissaattut siunnersuut matumuuna nassiunneqarpoq.
Tusarniaassutigineqartut ilanngussat makkuupput:
- Uunga siunnersuut: Kalaallit Nunaanni aalisariutit inuttaqarneri pillugit Namminersorlutik Oqartussat nalunaarutissaattut siunnersuut.
- Ilanngussaq 1: Inuttat allattorsimaffiat
Siunnersuummut oqaaseqaatigineqartut kingusinnerpaamik Aalisarnermut Piniarnermullu Naalakkersuisoqarfimmut tunniutereersimaneqassapput.
9. December nal 2024, – 16.00
Siunnersuummut oqaaseqaatissat uunga e-mailimut nassiunneqassapput apn@nanoq.gl kiisalu aamma thra@nanoq.gl cc-mut ilanngullugit, imaluunniit allakkatigut, uunga
Aalisarnermut piniarnermullu Naalakkersuisoqarfik
Imaneq 1A, 701
Postboks 296
3900 Nuuk
Siunnersuutip tunuliaqutaa
Siunnersuummut tunngavigineqartoq Inuit Ataqatigiit, Siumup, Naleqqap, Atassutip aamma attaviitsup aningaasanut inatsit pillugu isumaqatigiissutaanni nassaarineqarsinnaavoq.
Naalakkersuinikkut kissaatigineqartup Kalaallit Nunaanni sulisut nunaqavissut atorneqarnerunissaat pillugu aalajangersimasunik aamma illuatungeriinnit suliniutigineqarnissaa Aningaasanut inatsit pillugu suleqatigiit pisariaqartutut isigaat.
Taamatut suliniuteqarnermi ilaatigut inuttat pillugit nalunaarutip nutarterneqarneranik kinguneqarpoq, tassani nalimmassarneqassalluni kilisaatini inuttaqarniarneq sapinngisamik nunaqavissunik matussuserneqartarnissaa, tamatumani pineqarlutik aqumiut. Aningaasanut inatsit pillugu isumaqatigiissut naapertorlugu siunnersuutikkut 1 januar2033 tassaassaaq, aalisariutini aqumiut 90 %-tissa Kalaallit Nunaanni najugaqartuunissaanik piumasaqaatip naammassineqarfissaa, tassani inuttaasut Kalaallit Nunaanni 1) inuit allattorsimaffiani allassimanissaat 2) Kalaallit Nunaanni aalajangersimasumik najugaqarnissaat 3) kiisalu ukiut tallimat ingerlanerini ukiut marluk ataavartumik Kalaallit Nunaannut akileraartarnissaat piumaqasaqaataallutik.
Inuttat aqumiuunngitsut tamakkiisumik nunaqavissuunissaannik piumasaqarneq siunnersuummi uani ingerlateqqinneqarpoq.
Aningaasanut inatsimmut isumaqatigiissut naapertorlugu maannakkut inuttarineqartartut 60 %-miit 90 %-mut ikaarsaarneq " pissusissamisoornerullunilu anguniagaqarfiunerussaaq". Ikaarsaariarnerup sivisussusaa tusarniaanermi uani paasilluarneqassaaq, taamaattorli Naalakkersuisut siunnersuutikkut nalilerpaat ukiut arfineq pingasut ikaarsaarneq pissusissamisoornerusoq anguniagaqarnerullunilu. Tamatumunnga piumasaqaatitut ilanngunneqassaaq, siunissami inuttaasartussat aalajangersimasumik Kalaallit Nunaanni najugaqassasut. Taamaalilluni inuit allattorsimaffianut nalunaaqqanissaq kisimi naammakkunnaarpoq, kisiannili inuit Kalaallit Nunaanni kilisaatini inuttaasussat piviusumik Kalaallit Nunaanni piviusumik najugaqarnissaannik piumasaqaataalluni.
Ikaarsaariarneq Naalakkersuisut kiisalu namminersortut pisortaqarfiillu sulinermi piginnaasat atorluarneqarnerunissaannik suleqatigiinneranni aamma Naalakkersuisut ilinniartitaaneq pillugu suliniuteqarneranni isigineqassaaq, tamannalu aningaasanut inatsit pillugu isumaqatigiissummi takuneqarsinnaavoq. Tamanna ilaatigut atuutilissaaq, Ilinniartitaanermut Naalakkersuisoqarfiup inuussutissarsiornermut suleqatigiissitanik pilersitsineratigut, taakkua aalisarnermut immikkoortortani pisariaqartitsineq ineriartornerlu tunngavigalugit Naalakkersuisoqarfik ilinniartitaaneq pillugu pilersaarusiorneranni siunnersortassallugu. Anguniagaavoq, inuussutissarsiornermut suleqatigiissitaq taanna 2025-2040-mut aalisarneq tunisassiornerlu pillugit ilinniarneq pillugu piffissamut sivisuumut atuutilersitsinissamut pilersaarusiussasoq.
Inuussutissarsiornermut suleqatigiissitaq inuussutissarsiortunit aamma Namminersorlutik Oqartussanit ilaasortaqarpoq.
Nalunaarut Naalakkersuinikkut marloqiusamik suliniuteqarnermut ilaammat, siunertaavoq 2031-mi aqumiut 90 %-tiisa nunaqavissuunissaanik piumasaqarneq nalilersorneqaqqissasoq. Ilaatigut nalilersorneqassaaq, inuttat katitigaanerat pillugu piumasaqaatini inuussutissarsiummut ilinniartitaanermut suliuniutut naammannersut.
Ilanngullugulu nalunaarummi siunertarineqarpoq inunnut nunatta avataani najugaqaralllarsimasunut ajornannginnerusumik kalaallit kilisaataannut inuttanngorsinnaaneq. Inuit ukiuni marlunni ataannartumik inunnut allattorsimafimmut allassimasut kiisalu ukiuni tallimani akileraartussaatitaasimasut inuttanngorsinnaanerat siunissami piumasaqaatitut ilanngunneqassaaq. Taamaalilluni atorfininnginnermi ukiuni marlunni inuit allattorsimaffianut allasimanissaq piumasaqaataannaanani kisiannili ukiuni marlunni ataannartumik allassimanissaq kiisalu atorfininnginnermi ukiuni tallimani Kalallit Nunaannut akileraartarsimanissaq piumasaqaataalerpoq.
2024-mut Aningaaqarnermut inatsit pillugu isumaqatigiissut uani takuneqarsinnaavoq