Nuummi umiarsualiviup allilerneqarnissaa pillugu ASN-imut nassuiaatip tamanut ammasumik tusarniaassutigineqarnera – Kilisaatinut terminalimik pilersitsineq
Nassuiaat
Containerinut terminalip pioreersup kujataatungaani Qeqertaq Avallermi umiarsualiveqarfiup allilerneqarnissaa Sikuki Nuuk Harbour A/S-imit kissaatigineqarpoq. Umiarsualiviup allilerneqarnissaa ASN-iliornissamik pisussaaffeqarpoq, tak. Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-imeersoq (ASN pillugu – nalunaarut). Suliniummi pineqarpoq talittarfeqarfimmik nutaamik 300 meterit angullugit takissuseqartumik sanaartornissaq siunissamilu ingerlatsinissaq, kilisaatit imarpikkoortut sullinneqarnissaat pingaarnertut siunertarineqarluni.
Nuup umiarsualiviini ingerlatat amerliartuinnarnerisa malitsigisaanik umiarsualiviup allilerneqarnissaa pisarisaqalerpoq, ilaatigut aalisakkanik tunisassianik nioqqutinillu allanik oqimaatsunik tulaassinermi assartueqqinnermilu suliarinnittarnerup immikkoornerusumik, naleqqunnerusumik, isumannaannerusumik ajornaannerusumillu ingerlanneqartarnissaa pisariaqartinneqarluni. Kilisaatinut terminalissaq suliniutigineqartoq kilisaatiniunerusoq atorneqartassaaq, aammali umiarsuarnit allaanerusunit atorneqarsinnaassaaq, soorlu oqartussat umiarsuaataannit, ESANI-p umiarsuaataanit eqqakkanik assartuisartunit kiisalu ilaannikkut ilisimasassarsiortut umiarsuaannit. Talittarfeqarfinni pioreersuni inissaqarniarnerup pitsanngorsarneqarnerata saniatigut kilisaatinut terminalimik pilersitsinermi aalisakkanik tunisassianik tulaassanik Talittarfitoqqap containerinullu terminalip akornanni lastbiilinik assartuinerit malunnaatilimmik ikilisinneqassapput.
Umiarsualivimmik allilerinissaq ASN-iliornissamik pisussaaffiliivoq, taamaattumillu sanatitsisoq ASN-imut nassuiaammik suliaqarpoq suliniutip sanaartornerup nalaani ingerlatsinerullu nalaani avatangiisinut sunniutigisinnaasaanik nalilersuinissaq siunertaralugu.
Innuttaasunik ataatsimiititsineq
Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat naapertorlugu sanatitsisoq ASN-imut nassuiaat pillugu innuttaasunik ataatsimiititsisussaavoq, tak. § 9, imm. 2, nr. 2. Sanatitsisoq innuttaasunik ataatsimiititsinermi sumiiffissaq piffissarlu pillugit najukkani tusagassiuutit aqqutigalugit nalunaaruteqassaaq.
Tusarniaaneq
Suliniummut soqutigisaqartut kikkulluunniit tusarniaanermi akissuteqarnissamut kajumissaarneqarput. Tusarniaanermi akissuteqaatit tiguneqartut Naalakkersuisut tusarniaanernut iserfissiaannut ikkunneqassapput.
Tusarniaanermi najoqqutassat ukuninnga imaqassapput:
- VVM redegørelse – Havneudvidelse Nuuk Trawlerterminal
- Bilag 1: Undervandssprængning
- Bilag 2: Undervandsstøj fra sprængning
Tusarniaaneq 30.08.2024-mut killilerneqarpoq.
Tusarniaanermut akissuteqaat Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmut nassiunneqassaaq, elektroniskimik e-mailadressemut pan@nanoq.gl imaluunniit allakkatigut postboks 1614, 3900 Nuuk-mut.