Siunnersuummut tusarniaassummut sivittuineq: Tupanit nioqqutissat aamma tupanut taarsiunneqarsinnaasut pillugit Inatsisartut inatsisaat
Peqqissutsimut Naalakkersuisoqarfimmit matumuuna tamanut tusarniut nassiunneqarpoq siunnersuutissatut missingiut Tupanit nioqqutissat aamma tupanut taarsiunneqarsinnaasut pillugit Inatsisartut inatsisissaattut siunnersuut.
Naalakkersuisoqarfimmit qinnutigineqarpoq siunnersuutitut missingiummut oqaaseqaataajunnartut kingusinnerpaamik 29. maj 2024 tigorusullugit.
Oqaaseqaatit nassiuteqquneqarput uunga pn@nanoq.gl assingallu uunga haed@nanoq.gl
Siunnersuummut tunngaviusoq aamma siunertaq
Pujortarnerup kingunipilui ilisimaneqarluarput.
Nunatta nakorsaaneqarfiata ukimut nalunaarusiaani 2024-meersumi erserpoq, nunatsinni toqqutaasartoq naliginnaanerpaaq tassaasoq kræfteqarneq.
Aamma kræfteqartunut nunat avannarliit kisitsisaataanni NORDCAN-imi erserpoq puakkut kræfteqarneq kræftimik nappaateqartut akornanni toqussutaanerpaat qulit akornanni ilaasoq. Kræfti pillugu pilersaarutip 2013-imeersup nalilersornera - Kalaallit Nunaanni kræftimut tunngasuni killiffimmi 2020-meersumi aamma nalunaarutigineqarpoq pujartarnermik pissuteqartumik puakkut kræfteqalersarneq pissutaaqataanerpaasoq.
2018-imi innuttaaut peqqissusaannik misissuinermit takutinneqarpoq innuttaasut 52%-ii
ullut tamaasa pujortartartuusut. Taamaalilluni Kalaallit Nunaanni innuttaasut Nunani Avannarlerni innuttaasunut allanut naleqqiullugit ullut tamaasa pujortartartut amerlanersaapput. Innuttaasunik 2018-imi misissuinermit takuneqarsinnaavoq procentinngorlugit pujortartartut ilaasa amerlanersaat inuusunnerniinnerat, tamannalu ineriartorneruvoq pitsaanngitsoq. Taamaattumik siunnersuummi angusaqarfiginiarneqartut pingaarnerit tassaapput meeqqat inuusuttuaqqallu.
Siunnersuut pujortartarneq pillugu annertunerusumik aaqqissuussamik pitsaaliuisoqalernissaa siunertaralugu suliarineqarpoq.
Siunnersuummi ajornannginnerusunngortinniarneqarpoq innuttaasup "peqinnartumik toqqaanissaa" tamanna innuttaasup kissaatigippagu.
Siunnersuummi aamma siunertarineqarpoq inuit pujortartarniaratik aalajangersimasut allat pujortarnerisigut putsumik najuussuitinneqannginnissaannik illersornissaat.
Illersuineq ininut tamanit orninneqarsinnaasunut killeqartinneqarpoq, tassami inuup namminneq qinigaannut toqqammavissatut siunnersuut sinaakkusiissammat.
Inuup pujortartarniarnani toqqarsimappagu siunnersuummi uani siunertarineqarpoq taama toqqaasimanerannik ikorfartussallugit peqqinnerulernissamut suliniutinut
tunngavissiinikkut soorlu inini tamanit iserfigineqarsinnaasuni pujortarsinnaanermut inerteqquteqarnikkut. Inuit pujortartarniarlutik aalajangersimasut siunnersuutikkut
narrunarsarniarneqanngillat, kisianni inuit ataasiakkaat pujortarfiunngittumiinnissaq qinigaat ataqqiniarneqarluni.
Siunnersuummi immikkoortut pingaarnerit
Siunnersuut siullertut inatsisit atuuttut uku ataatsimoortinneraat: Tupa avatangiisinillu tupatorfiunngitsunik isumannaarineq, kiisalu tupanik nioqqutissat nalunaaqutserneqartarneri pillugit Inatsisartut peqqussutaat nr. 10, 14. november 2004- meersoq aamma Pujortarnermik inerteqquteqarneq pillugu Inatsisartut inatsisaat nr. 15, 26. maj 2010-meersoq. Taamaammat siunnersuummi matumani inatsimmiittut pingaarnerit atuuttooreersut ingerlateqqinneqarput, tamakkununnga ilanngullugit avatangiisit pujortartarfiunngitsut, tupanik nioqqutissanik inunnut 18-init inorlugit ukiulinnut tuniniaaqqusinnginneq, tupanik nioqqutissianik pilerisaarinissamik inerteqquteqarneq, tupanik nioqqutit erseqqissumik kiisalu tupanik nioqqutinik atuinermi navianaatit nalunaaqutserneqartarnissaat.
Tamatuma saniatigut siunnersuummi iliuusissat nutaat makku ilanngunneqarsimapput:
• E-cigarettinik e-væskinillu inerteqquteqarneq.
• Nioqqutissanik allanik nikotineqartunik inerteqquteqarneq. (Nakorsaatit pinnagit).
• Sunoorsinut, sukuluussanut aamma tupamut aggukkamut tamuaneqarsinnaasumut (tupanut pujoqanngitsunut) inerteqquteqarneq.
• Tupanut akuutissanik soorlu assigiinngitsunik mamassutsinik pujuisalu qalipaasernissaanut inerteqquteqarneq.
• Inuusuttut 18-init inorlugit ukiullit tupanik nioqqutissianik il.il. nioqquteqarnermik isumaginnittuunissaannut inerteqquteqarneq.
• Cigarettit poortat 20-nik ikinnerusunik nioqquteqarnissamut inerteqquteqarneq.
Siunnersuummut tusarniaassummut sivittuineq: Tupanit nioqqutissat aamma tupanut taarsiunneqarsinnaasut pillugit Inatsisartut inatsisaat
Peqqissutsimut Naalakkersuisoqarfimmit matumuuna tamanut tusarniaanermut sivittuut nassiunneqarpoq siunnersuummut Tupanit nioqqutissat aamma tupanut taarsiunneqarsinnaasut pillugit Inatsisartut inatsisissaattut siunnersuut.
Naalakkersuisoqarfimmit qinnutigineqarpoq siunnersuutitut missingiummut oqaaseqaataajunnartut kingusinnerpaamik 24. juni 2024 tigorusullugit.
Oqaaseqaatit nassiuteqquneqarput uunga pn@nanoq.gl assingallu uunga haed@nanoq.gl
Siunnersuummut sivittuinermut tunngaviusoq aamma siunertaq
Siunnersuut sivittuummik tusarniutigineqarpoq, Peqqissutsimut Naalakkersuisoqarfiup maluginiarmagu tupanik ussassaarinermut inerteqquteqarnermut ilassut tak. § 12 tusarniaaffigineqartut tamarmiunngittunit oqaaseqaateqarfigineqarmat. Siunnersuummi taannarpiaq inuussutissarsiuteqartunut annerusumik minnerusumilluunniit sunniuteqartussaammat pisariaqartinneqarpoq tusarniaanermik sivittuinissaq, qulakkeerniarlugu taakkua pisariaqarsoringunikku tusarniaanermut akissuteqarnissaat.
Tupanit nioqqutissat aamma tupanut taarsiunneqarsinnaasut pillugit Inatsisartut inatsisissaattut siunnersuut tamanut 1. Maj 2014-miit 29. Maj 2024 tungaanut tusarniutigineqarpoq. Tusarniummut tusarniaaffigineqartunit akissuteqaaluppoq, akissutaasullu Naalakkersuisut tusarniaanermut nittartagaanni nanineqarsinnaapput.