Umiarsualivinni nunami atortulersuutitalinnik, umiarsualiviillu imartaanni taakkununnga atasuni ilaatitsinnginneq aamma killilersuineq pillugit Namminersorlutik Oqartussat nalunaarutissaattut siunnersuutip tusarniutigineqarnera

Tunuliaqutaq, siunertaalu:

Umiarsualiveqarfinni ilaatitsinnginnissamut, killilersuinissamullu malittarisassanik aalajangersaanissamut, umiarsualiviit pillugit Inatsisartut inatsisaat § 1-imi imm. 2 inatsisitigut tunngavissiivoq:

”Imm. 2. Naalakkersuisut malittarisassanik umiarsualiviit nunami atortulersuutitallit umiarsualiviillu imartaasa taakkununnga atasut killilersorneqarnerannut atuuttunik aalajangersaasinnaapput.”

Akuersissummik qinnuteqarnissaq pillugu umiarsualivinnut inatsimmi piumasaqaataasunut annertuunut puttasut, umiarsualiviillu nammineq atorneqartussat ilaatinneqannginnissaannik kiisalu umiarsualiviit niuernermik tunngavilimmik ingerlatsinissamut tunngavissaqanngitsut ilaatinneqannginnissaannik Naalakkersuisut aalajangiisinnaanissaannik nalunaarut siunertaqarpoq.

Nunami umiarsualivippaaluit inissaalatitsingaatsiarput. Ingerlatsiviit namminersortut, suliffeqarfiillu arlaqartut atugassarititanut pisariaqartunut aningaasalersuinissaminnut soqutiginnipput. Umiarsualivinnut suliassaqarfimmik pitsaanerusumik ingerlatsinissaq, umiarsualiveqarfinnillu mikinerusunik inuussutissarsiutillit pisariaqartitsinerisa iliuuseqarfigineqarnissaat siunertaralugu siunnersuutigineqarpoq, talittarfinnik mikinerusunik pilersitsinissamut, ingerlatsinissamullu piumasaqaatit assigiinngitsut qasukkarneqassasut.

Atuutsilersitsineq, tusarniaanermi piffissaliussaq, il.il.:

Nalunaarutip saqqummiunneqarneratigut atuutilissasoq siunnersuutigineqarpoq.

Oqaaseqaatit, apeqquteqaataasinnaasullu naalakkersuisoqarfiup pingaarnertut mailianut uunga box909@nanoq.gl, allaffimmi pisortaq Anders May mailimut uunga amay@nanoq.gl assilineranik ilanngullugu nassiunneqassapput.

Tusarniaanermi atortut Naalakkersuisut tusarniaavianni tamanut saqqummiunneqarput, soorluttaaq tusarniaanermi akissutigineqartut tassani tamanut saqqummiunneqassasut. Tusarniaanermi akissuteqartup aqqa ilanngullugu tusarniaanermi akissutigineqartup, ilanngunneqarsimappata najugaq e-mailialu ilanngullugit, Naalakkersuisuit tusarniaavianni tamanut saqqummiunneqarnissaannut tusarniaanermi akissuteqarnikkut akissuteqartoq ilutigisaanik akuersissaaq.

Nalunaarutit atuuttut nittartakkami nalunaarutit.gl-imi takuneqarsinnaapput.