Peqqinnissaqarfiup iluani napparsimasut naammagittaalliuuteqarnissamut taarsiivigineqarnissamullu periarfissaat pillugu Inatsisartut inatsisissaattut siunnersuutip tamanut tusarniaassutigineqarnera

Matumuuna peqqinnissaqarfiup iluani napparsimasut naammagittaalliuuteqarnissamut taarsiivigineqarnissamullu periarfissaat pillugu Inatsisartut inatsisissaattut siunnersuutip tamanut tusarniaassutigineqarnera nassiunneqarpoq. Inatsisartut 2024-mi upernaakkut ataatsimiinneranni siunnersuutip saqqummiunneqarnissaa naatsorsuutigineqarpoq.

Tusarniaassutigineqartut ilanngussat makkuupput:

• Uunga siunnersuut: Kalaallit Nunaanni peqqinnissamut tunngasutigut katsorsartinnermi napparsimasut naammagittaalliuuteqarnissamut taarsiivigineqarnissamullu periarfissaat pillugu Inatsisartut inatsisaat

• Inatsisartut inatsisissaattut siunnersuummut nassuiaatit

Siunnersuummut oqaaseqaataasinnaasut Peqqissutsimut Naalakkersuisoqarfimmeeriissapput kingusinnerpaamik:

• 16. februar 2024, nal. 16.00.

Siunnersuummut oqaaseqaataajunnartussat uunga nassiuteqquneqarput mailikkut: PN@nanoq.gl og cc. mrpd@nanoq.gl

 
Siunnersuummut tunuliaqutaasut:
Naammagittaalliuuteqarnissamut taarsiiffigitinnissamullu aaqqissuussinermik katitikkamik nutaamik aalajangersaanikkut peqqinnissaqarfimmi napparsimasut pitsaanerusumik sunniuteqarluarnerusumillu naammagittaalliuuteqarnissamut taarsiiffigitinnissamullu periarfissaqarnissaasa qulakkeernissaannik kissaateqarneq siunnersuummi tunuliaqutaavoq.

Peqqinnissaqarfimmi peqqinnissamut tunngasutigut sulinermut aamma peqqinnissakkut sullissisut peqqinnissamut tunngasutigut sulinerannut naammagittaalliuutit pillugit malittarisassat, peqqinnissaqarfimmi piviusumik sulineq pillugu naammagittaalliuutit (sullissineq pillugu naammagittaalliuutit) kiisalu napparsimasut ajoqusernerinut taarsiinissamut periarfissat pillugit malittarisassat siunnersuutip imarai.

Siunnersuummi matumani pingaartumik erseqqissarneqarput:
• Innuttaasut naammagittaalliuuteqarnissamut taarsiivigineqarnissamullu periarfissaat ataatsimoortinneqassapput.
• Nunatsinni Nakorsaaneqarfiup ataani naammagittaalliuutinik suliaqartumik allattoqarfimmik pilersitsisoqarnissaa siunniunneqarpoq, taamaalilluni innuttaasoq ataatsimik saaffissaqassaaq, peqqissutsikkullu paasissutissat naammagittaalliuutip suliarinerani ataasiinnarmi toqqortaatigineqassallutik.
• Katsorsaanerup pitsaasumik ingerlanissaa oqaloqatigiittarnissarlu qitiutinneqarput.
• Ilinniartitsineq pitsaassutsimillu ineriartortitsineq aamma Peqqinnissaqarfiup pitsaanerulernissaa kukkunerillu pinaveersaartinnissaat qitiutinneqarput.
• Suliat imminnut attuumassuteqanngitsutut suliarineqarsinnaapput, taamaaliluni taarsiinissaq pillugu apeqqut Peqqinnissaqarfimmi Napparsimasut Maalaarutaannik Aalajangiisartut aalajangiisimanersut apeqqutaatinnagu (imaluunniit oqartussaasunit allanit), aamma aalajangiisimanerup inernera apeqqutaatinnagu.

Siunnersuut siusinnerusukkut tusarniaassutigineqarsimagaluarpoq, naammassilluguli suliarineqarsimanani. Kingullermik tusarniaassutigineqarneraniilli tulliuttut uku pingaarnertut naleqqussarneqarsimapput:
• Peqqinnissaqarfimmi sulisut pillugit naammagittaalliuutit katsorsaanerit pillugit naammagittaalliuutitut suliarineqartalissapput, tassa peqqinnissaqarfimmi sulisoq naammagittaalliuutiginagu katsorsaanerit naammagittaalliuutigineqartalissapput. Taamaalilluni peqqinnissaqarfimmi sulisoq pillugu naammagittaalliuummik suliaqartoqarsinnaalissaaq, Nunatsinni Nakorsaanerup tamanna pisariaqartoq nalilerpagu.
• Angajoqqaatut oqartussaasut meeqqaminnik peqqinnissaqarfimmi suliaritereerlutik annaasaqartunut ajunngitsorsiassaqartitsisoqartalissaaq, malittarisassat naapertorlugit taarsiiffigitinnissamut pisinnaatitaasimagaluartunut.
• Aalajangersakkat taarsiissutissanik nalimmassaasussat ilanngunneqarput, pingaartumik taarsissutissanik naatsorsuisarnerit tunniussisarnerillu pillugit aalajangersakkat tassani pineqarlutik.
• § 23-mi inatsit naapertorlugu kikkut taarsiiffigitissinnaatitaanersut allanngortinneqarpoq.
• Suliffeqarfiit sillimmasiinissamut pisussaatitaanerat peerneqarpoq, sillimmasiisarfiit inatsisip atuuffianut tamarmiusumut sillimmasiisinnaaneq qularnaarsinnaanngimmassuk