Imeruersaatit puui pillugit Namminersorlutik Oqartussat nalunaarusiaanut siunnersuut

Matumuuna Nunalerinermut, Imminut Pilesornermut, Nukissiutinut Avatangiisinullu Naalakkersuisoqarfiup imeruersaatit puui pillugit Namminersorlutik Oqartussat nalunaarusiaanut siunnersuut tusarniaassutigineqarnera nassiuppaat.

Tunuliaqutaa
Inatsisartut ukiakkut 2022-mi ataatsimiinnerminni aalajangiuppaat Naalakkersuisut peqquneqassasut, immiaaqqanut aamma imeruersaatinut kulsyretalinnik akullit nutaamik malittarisassiussagaat. Malittarisassat kingusinnerpaamik januaarip aallaqqaataani 2024-mi, inissereersimassapput.

Malittarisassanut nutaajusunut siunertaavoq Nuuk Imermi kisermaassilluni tunisassiornerata taamaatinneqarnissaa, nuna tamakkerlugu immiaaqqanik aamma imeruersaatit kulsyretalinnik akullit qillertuusani, puiaasanit plastikkinik- aamma gassimik imallit, ilusaa angissusaalu apeqqutaatinnagu, taakkulu utertinneqarsinnaasutut, Naalakkersuisunit akuersissutigineqarsimasuussapput.

Malittarisassat nassuiaataat
Massakkut imeruersaatit puui pillugit nalunaarummi malittarisassat allanngortinneqarnissaat siunnersuutigineqarpoq, tassalu imaalerluni imeruersaatinut poorineqartartut immiaaqqanut aamma imeruersaatinut kulsyrenik akulinnut atorneqartartut, aalajangersimasumik pooqartitsineq piumasaqaataajunnaassammat. Taarsiullugu piumasaqaataalissaaq, imeruarsaatinut pineqartunut tuniniaanermi poorineqartussat, tassaassasut Naalakkersuisunit akuerineqarlutik utertitsisarnermut periutsimut ilaasut.

Imeruersaatinut poorineqartartunut aalajangersimasuunissaanik piumasaqaateqarunnaarnermi aammaanneqarpoq, puukunik utertitsinermut pissuserineqartoq, tassaasoq puukunik assigiinngitsunik utertitsinermi periuseq Naalakkersuisunit akuersissutigisinnaagaat, Inatsisartunit aalajangerneqarsimasoq tunngavigalugu.

Massakkut imeruersaatit puuinut nalunaarut atuuttoq sanillersuukkanni, imeruersaatit puui pillugit nutaatut missingiummut, makku tulleriiaarlugit taaneqarsinnaapput:

• Naalakkersuisut periarfissaqarput piumasaqaateqassallutik, imeruersaatinut allanut immiaaraannaanngitsunut aamma sodavandinut imeruarsaatinut poorineqartut, puukunik utertitsisarnermi pissuserineqartuusumit akuerisaasut. Aalajangersagaq siunissamut qulakkeerinnittuuinnarani, piffinni ataasiakkaani tunisassiortut imeruersaatit puukuisa massakkut pioreersut utertitsittarnissaat kissaatigigunikku ingerlatiinnarsinnaavaat.
• Immikkut ittumik akuerisaanissamut malittarisassaq, periarfissiivoq immikkut ittumik akuerineqarluni puukut utertinneqartussaasutut piumasaqaataaffiusumut atuutsitsinnginnissamut, soorlu pilersuinikkut ajornartorsiortoqartillugu, ikittuaranngorlugit tuniniaanikkut imaluunniit pissutsinik immikkut ittoqartillugu.
• Maleruagassani peqqussutini inerteqqutinilu nutarterinermi ilaatigut takuneqarsinnaasutigut, nalunaarummi malittarisassatigut allannguisoqarneratigut.
• Oqaatsit isumaat nutartikkat nalunaarummi malittarisassatut qitiusumik inissisimasuusut.

Tusarniaanermut killissarititaasoq
Tusarniaanermut akissuteqaatit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmut kingusinnerpaamik 28-08-2023 nassiuteqquvavut. Tusarniaanermut akissuteqaatit naalakkersuisoqarfiup emaildressia una atorlugu nassiunneqassapput: pan@nanoq.gl