Naligiissitaaneq assigiinngisitsinnginnissarlu pillugit Inatsisartut inatsisaannut siunnersuutip tusarniaassutigineqarnera

Inatsit pingaarneq nutaaq siunnersuutigineqarpoq, tassani siunertaalluni assigiinngisitsinernik pinngitsoortitsinissaq kiisalu inuit tamarmik naligiissitaanissaat.

Inatsisissatut siunnersuummi suiaassuseq, naartuneq, ernereernermi sulinngiffeqarneq, kinguaassiutitigut sumut sammiveqarneq, suiaassutsikkut kinaassuseq, suiaassutsikkut isikkoq, suiaassutsikkut ilisarnaatit, inuiattut ilisarnaatit, ammip qalipaataa, nunami namminerminngaaneersuuneq, inooqatigiinneersuuneq imaluunniit inuianni aalajangersimasuneersuuneq, innarluuteqarneq, ukiut, politikkikkut isummertaaseqarneq, upperisaq aammalu upperisaqarneq tunngavigalugit assigiinngisitsinnginnissaq nalinginnaasumik inerteqqutigineqalissaaq.

Tamatuma saniatigut siunnersuutigineqarpoq naammagittaalliortarfimmik (Naligiissitaanermut aalajangiisartut), inatsisip unioqqutinneqarnera pillugu naammagittaalliuutinik suliarinnissinnaasumik, pilersitsisoqassasoq.

Naligiissitaanermut inatsit atuuttoq aalajangersimasunik naleqqussarlugu inatsisissatut siunnersuummi aamma ilanngunneqarpoq.