Siunnersuummut uunga tunngatillugu tusarniaaneq: Meeqqanut suli atulinngitsunut perorsaanikkut inerikkiartuutaasumik neqeroorneq pillugu Inatsisartut Inatsisaat nr. xx, xx. xxx 2023-meersoq
Tunuliaqutaasoq
Suli atualinngitsunut suliniuteqarnerup eqaannerusumik piareersarnissaata qulakkeernissaa siunnersuummi siunertaavoq, tassani ilaatigut meeqqanut inuusuttunullu suliassaqarfimmi qiutiullutik sullissisartut suliniutinut aallartinneqareersunut tunngatillugu pingaaruteqarnerat isiginiarneqartussaalluni.
Tamatuma saniatigut siunnersuummi allanngortitsinissamut pisariaqartitsinerit ilaasa suliassaqarfimmut inatsisit atuuttut atuutsinneqalermatali paasineqarsimasut piareersimaffiginissaat siunertarineqarpoq.
Utaqqisut allattorsimaffiannut piumasaqaatit nammineq atugassat malillugit ulluunerani neqeroorummi inissamik toqqaasinnaanermut piginnaatitsissutip kommunalbestyrelsimut tunniunnissaa allannguummi ilaatigut pineqarpoq. Ilangullugulu meeqqamut mappimik digitaliseerikkamik timitalimmilluunniit suliaqarnissamut periarfissaqartitsineq siunnersuummi aamma anguniarneqarpoq.
Tamatuma saniatigut meeqqanut immikkut pisariaqartitalinnut tunngatillugu siusissukkut suliniuteqartarnissap pisariaqarnerata erseqqissaatiginissaa siunnersuummi anguniarneqarpoq. Tamatumani meeqqap ataavartumik timikkut, tarnikkut imaluunniit malugisaqarsinnaanikkut piginnaanikillisimasut imaluunniit allatut immikkut pisariaqartitsisut namminneq tamakkiisumik piginnaasatik piviusunngortinniarlugit aammalu naammaginartumik atuarnerminnik ingerlatsinissaat anguniarlugu meeqqat allat assigalugit sapinngisamik assinganik periarfissaqarnissaasa qulakkeernissaa siunertarineqarpoq.
Siusissukkut suliniuteqarneq innarluuteqarnermut imaluunniit allatut piginnaasakinnerulernermut sivisuumik sunniutissanut kingunerlutsitsinissanullu ulorianaammut minnerulersitsisussaavoq. Tassunga atatillugu meeqqat immikkut pisariaqartitallit sapinngisamik siusissukkut qulaajarneqartarnissaat pisariaqartuusoq nalilerneqarpoq, tamannalu assersuutigalugu sukkasuumik suussusersisarnissaq siunertaralugu isumaginninnermut peqqinnissamullu suliaqartut kiisalu perorsaanikkut tarnikkullu siunnersuisartut (MISI) peqataatinnerisigut suliassaqarfiit assigiinngitsut aqqutigalugit pisariaqarpoq.
Siunnersuummi misissuisarnerit pisussaaffiusut ingerlateqqinnissaat anguniarneqarpoq, taakkunanilu qaffasissutsini tamani ineriartortitsinermut ilinniarnermullu suliniutigineqartut nukittorsarniarlugit suliniutigineqartup ataqatigiissup pilersinnissaa siunertaralugu atugarissaarnermut nalilersuinerit atualernissamullu piareersimanerit ilaassapput.
Meeqqat atualinnginneranni kaammattuinermik qulakkeeriffigereernissaat, oqaatsinik nalinginnaasunik pigisaqalersimanissaat, inuuniarnikkut piginnaasanik ineriartortitsisimanissaat malinnaavigineqarsimanissaallu pingaaruteqarpoq, matumani immikkut pisariaqartitanut tunngatillugu qulaajaasarnissaq siusissukkullu suliniuteqartarnissaq siunertaralugit.
Tusarniaaneq pillugu ataatsimut taasassat
Oqaaseqaataasinnaasut Meeqqanut, Inuusuttunut Ilaqutariinnullu Naalakkersuisoqarfimmut iian@nanoq.gl nassiunneqassapput.
Tusarniaanissamut kingusinnerpaamik piffissarititaq tassaavoq ulloq 05. 05. 2023
Ilanngussat:
1. Uunga siunnersuut: Meeqqanut suli atualinngitsunut perorsaanikkut inerikkiartuutaasumik neqeroorneq pillugu Inatsisartut inatsisaat nr. xx, xx. xxx 2023-meersoq
2. Nassuiaatit