Tasersiami aamma Tarsartuup Tasersuani qanganitsat eqqissisimatinneqarnerisa attatiinnarnissaat pillugit tamanut tusarniaaneq
Erseqqissaaneq taavalu Naalakkersuisut Tasersiap aammalu Tarsartuup Tasersuata eqqaani eqqissisimatitsinermik atorunnaarsitsisoqarnissaanut qinnuteqaataata tusarniaassutigineqarnerani akissuteqarnissap kingusinnerpaaffiata allanngortinneqarnera
Tusarniaaffigisanut tamanut:
Suliamut uunga tunngatillugu tusarniaanissamut ulloq 14. marts 2023 nalunaartoqarnerani, allaaserineqartunut erseqqissaasoqarnissaa Nunatta Katersugaasivia Allagaateqarfianiillu kissaatigineqarpoq. Tamanna tunngavigalugu tusarniaanermik iluarsaateqqitamik saqqummiussisoqaqqippoq, sumiiffinni qanganitsanik eriagisassanik imaaliallaannarlugit peerneqarsinnaanngitsunik eqqissisimatitsiunnaarsinnaanermut Naalakkersuisunit qinnutigineqartoq pillugu tusarniutigineqassasoq erseqqissarneqarluni, tamanna inuiaqatigiit ineriartornissaanik eqqarsaateqarnermik tunngavilersorneqarpoq, takuuk Kulturikkut eqqaamasassanut inatsit § 3. Taassuma saniatigut tusarniaanermut tunngatillugu piffissaliussap qaangiutereernerani susoqarnissaanik nassuiaasoqarpoq.
Tusarniaaffigineqartut tusarniummut akissuteqareersut, erseqqissaanermut tunngasumik peqanngikkunik, akissutilioqqittariaqanngillat.
Tusarniaanermut allannguuteqarnerup malitsigisaanik piffissaq killiliussaq sivitsorneqassaaq, tassa ullumimiit qaammatit pingasut periarfissaalluni, piffissamut killiliussaq tassaalluni ulloq 24. juli 2023.
