Aningaasaqarnermut Naalakkersuisoqarfik

Siulittasup ilassinnissutaa
Aaqqissuusseqqinnermut isumalioqatigiissitap nittartakkakkut qupperneranut tikilluarit!

Suliassamut annertuumik piumassuseqarlunga maniguullungalu siulittaasuuneq tiguara. Pisortat ingerlatsiviat ingerlalluartoq innuttaasut ulluinnaannut Kalaallillu Nunaata siunissaanut pingaaruteqarpoq. Taamaammat pisortat ingerlatsiviata qanoq innuttaasunut qaninnerusumik, pisariinnerusumik naammassisaqarfiunerusumillu aaqqissuunneqarsinnaanerata misissornissaa – qanorlu isumalluutinik piginnaasanillu atugassanngortinneqartunit annertunerpaamik nalilimmik pissarsisinnaanerup misissorneqarnissaa, pingaaruteqarlunilu isumassaqarluarpoq.

Maanna isumalioqatigiissitap sulinera aallarnisaleruttorparput. Suliassaq ammasumik sukumiisumillu ingerlakkumavarput, misilittakkallu isumassarsiallu inuiaqatigiinnit tamaneersut ilanngunnissaat kissaatigaarput. Suliatsinnut ilassutissaqaruit isumassarsiatit siunnersuutissatilluunniit aaqqissuu@nanoq.gl nassiunnissaanut tikilluaqqusaavutit.

Tulliuttuni Aaqqissuusseqqinnermut isumalioqatigiissitap pisortatigoortumik sinaakkutai pillugit paasissutissat erseqqinnerusut atuarsinnaavatit, tassani suliakkiut, piffissamut pilersaarut ilaasortallu ilanngullugit. Tassanilu aamma isumalioqatigiissitap sulinera pillugu nutaarsiassat kingulliit malinnaaffigisinnaavatit.

Inussiarnersumik inuulluaqqusillunga
Johnny í Grótinum
Aaqqissuussaanermut Isumalioqatigiissitap siulittaasua

Aaqqissuusseqqinnermut isumalioqatigiissitaq
Pisortat ingerlatsiviisa pisariillisarnissaannut, pitsaanerusumik innuttaasunullu qaninnerusumik aaqqissuusseqqinnissamut innersuussutinik suliaqartussanik, Naalakkersuisut aaqqissuusseqqinnermut isumalioqatigiissitamik pilersitsipput. Nunatsinni siunissami assigiinngitsunik ilungersunartussanut, ilaatigut: innuttaasut katitigaanerisa allanngornerannut, tassani innuttaasut utoqqalisut amerlasiartuinnarnerannut, pisortani sullissinermut inuiaqatigiinnilu isumalluutinik piujuartitsinermik tunngaveqartumik atuinissamut piumasaqaatit qaffakkiartuinnarnerannut atatillugu tamanna isigineqassaaq. Aaqqissuusseqqinnermut isumalioqatigiissitaq aalajangernissamut patajaatsumik tunngaveqalersitsissaaq, taamaalilluni ilungersunartut piffissaq eqqorlugu iliuuseqarfigineqarsinnaaniassammata.

Aaqqissuusseqqinnermut isumalioqatigiissitap qitiusumik allaffeqarfik aamma Namminersorlutik Oqartussat kommunillu akornanni sunniivigeqatigiinneq pingaarnertut aallutissavai. Aaqqissuusseqqinnermut isumalioqatigiissitap ilaatigut suliassat agguataarnerat, malittarisassanik pisariillisaaneq, digitaliseeriineq, teknologiimik nutaamik silassorissuusiamillu atuineq kiisalu pisortani ataatsimoorussamik aaqqiissutinut periarfissat misissussavai.

Naalakkersuisooqatigiinnissamut isumaqatigiissut 2025-meersoq aamma Attassiinnarnissamut Ineriartortitsinissamullu pilersaarut II tunngavigalugit isumalioqatigiissitaq sulissaaq.

Aaqqissuusseqqinnermut isumalioqatigiissitap suliarisassaasa allattorsimaffiat
Ulloq 21. august 2025 Naalakkersuisut isumalioqatigiissitap sulineranut tunngavissanik anguniagassanillu aalajangersaanerminni suliarisassanut allattorsimaffimmik akuersipput. Ataatsimut isigalugu innuttaasunut qaninnerusumik, ataqatigiinnerusumik aamma pitsaanerusumik suliassanik isumalluutinillu aaqqissuussinikkut pisortat ingerlatsiviisa siunissamut qulakkeernissaat anguniarlugu innersuussutinik aalajangiinissamullu tunngavissanik suliaqarnissaq siunertaavoq.

Sammisat suliassallu tullinnguuttumi allassimasut isumalioqatigiissitap suliarissavai:

1. Aaqqissuussaaneq, suliassanik agguataarineq ataqatigiissaarinerlu
2. Angusaqarnerulersitsineq, digitaliseeriineq malittarisassanillu pisariillisaaneq
3. Digitaliseeriineq silassorissuusiarlu
4. Aningaasaqarneq aqutsinerlu
5. Qitiusumik allaffeqarfiup aaqqissugaaneranik isumalluutinillu agguataarineranik nalilersuineq
6. Politikkikkut tunngavik innuttaasunillu peqataatitsineq qitiutillugit attaveqatigiinnissamut pilersaarusiorneq.

Aaqqissuusseqqinnermut isumalioqatigiissitap sulinera aaqqissuusseqqinnernut allanut attuumassutilinnut, tassunga ilanngullugu Aaqqissuussaanermut ataatsimiititaliap sulineranut ataqatigiissarneqassaaq.

Aaqqissuusseqqinnermut isumalioqatigiissitap sulinera Inatsisartuni partiit aallartitaannit, politikkikkut eqimattanit malinnaatitanit malittarineqassaaq. Eqimattat malinnaatitat oqallinnermut politikkikkullu tunngavinnut tapersiisassapput, kisianni isumalioqatigiissitap periaasiinut aalajangersimasumillu misissueqqissaarneranut akuliunnissamut pisinnaatitaanngillat.

Aaqqissuusseqqinnermut isumalioqatigiissitap suliarisassaasa allattorsimaffia tamakkiisoq atuaruk

Piffissalersuussineq

Aaqqissuusseqqinnermut isumalioqatigiissitaq siullermeerluni ulloq 11. juuni 2026-mi ataatsimiippoq.

Isumalioqatigiissitap nalunaarusiaata siulliup 2027-mi juunimi tunniunneqarnissaa naatsorsuutigineqarpoq. Nalunaarusiaq siulleq piffissami qaninnerusumi naammassineqarsinnaasunik suliniutissatut siunnersuutinik imaqassaaq.

Inaarutaasumik nalunaarusiaq 2028-mi juunimi tunniunneqarnissaa naatsorsuutaavoq, taannalu pisortat ingerlatsiviinik aaqqissuusseqqinnermi politikkikkut suleriaqqinnissamut tunngavissiissaaq.

Aaqqissuusseqqinnermut isumalioqatigiissitami ilaasortat

Aaqqissuusseqqinnermut isumalioqatigiissitaq arlaannut akuliusimanngitsunik, nunatsinneersunik, Savalimmiuneersumik Norgemeersumillu suliatigut inuussutissarsiornermilu assigiinngitsunik tunuliaqutalinnik ilaasortaqarpoq.

Siulittaasoq
Johnny í Grótinum Savalimmiuni Universitetimi aningaasaqarnermut tunngasunik bacheloritut ilinniagaqarnermut pisortaavoq kiisalu Savalimmiuni Aningaasaqarnikkut Siunnersuisoqatigiinni Savalimmiunilu Landsbankimi siulittaasuuvoq.

Siulittaasup tullia
Anne Nivíka Grødem nunatsinni Bankivimmi pisortaq.

Ilaasortat allat
Nivi Strunz, namminersortoq, nunatsinni

Hilde Singsaas, Norgemi Avatangiisinut Pisortaqarfimmi pisortaaneq

Maliina Junge Jørgensen, nunatsinni Kommuneqarfik Sermersuumi immikkoortortaqarfimmi pisortaq

Magni Laksáfoss, Savalimmiuni Sjókovinimi inuiaqatigiit aningaasaqarnerat pillugu ilisimatusartoq

Ellen Lerch Høj, nunatsinni Grønlandsbankenimi niuernermik ineriartortitsinermut pisortaq

Hans Jørgen Mørch, nunatsinni namminersortoq

Line Mika Skov, nunatsinni Tusassimi aningaasaqarnermut pisortaq

Jørgen Aqe Møller, nunatsinni Royal Arctic Linemi aningaasaqarnermut pisortaq

Nutaarsiassat
Aaqqissuusseqqinnermut isumalioqatigiissitap sulinera pillugu ingerlaavartumik nutaarsiassat kiisalu isumalioqatigiissitap saqqummersitai uani saqqummersinneqartassapput.

16. juuni 2026

Aaqqissuusseqqinnermut isumalioqatigiissitaq siunissami pisortat ingerlatsiviisa siunissami qulakkeernissaannut tunngatillugu sulinermik aallarniipput

Saqqummersinneqartussat

• Nalunaarusiaq siulleq (2027-mi juunimi naatsorsuutigineqarpoq)
• Aaqqissuusseqqinnermut isumalioqatigiissitap inaarutaasumik nalunaarusiaa (2028-mi juunimi naatsorsuutigineqarpoq)

Aaqqissuusseqqinnermut isumalioqatigiissitaq Aaqqissuusseqqinnermut immikkoortortap mailiatigut attavigineqarsinnaavoq aaqqissuu@nanoq.gl