Aaqqissuusseqqinnermut isumalioqatigiissitap imigassaq aalakoornartortalik pillugu aningaasartuutit, ilinniartitaaneq aamma qitiusumik allaffeqarfik misissuiffigai

Aaqqissuusseqqinnermut isumalioqatigiissitaq ulloq 29. oktober 2026 pingajussaanik ataatsimiippoq. Ataatsimiiinnermi ilinniartitaaneq pingaarnertut sammineqarpoq, tassanilu aamma imigassap aalakoornartortallip inuiaqatigiinnut kingunerisartagai aamma  qitiusumik allaffeqarfiup aaqqissugaanera oqallisigineqarput.

Ilinniartitaaneq piukkunnaateqartunik sulisoqarnissap aamma pisortat suliassaqarfiisa ingerlalluarnissaasa qulakkeerneqarnissaannut pingaarutilimmik tunngaviuvoq. Taamaattumik isumalioqatigiissitap misissussavai, ilinniartitaanermi nukissat qanoq pitsaanerusumik atorneqarsinnaanersut, aamma qanoq amerlanerit ilinniarnermik aallartitsisinnaanersut naammassinnillutillu.  

Imigassaq aalakoornartortalik pillugu suliassaqarfimmi professor Christina Viskum Lytken Larsen, Innuttaasut Peqqissusiannik Ilisimatusarfimmeersoq imigassap aalakoornartortallip inuiaqatigiinnut kingunerisartagai aamma suliassaqarfimmi uppernarsaatinik tunngaveqartunik innersuussutit pillugit ilisimatitsivoq. Isumalioqatigiissitaq aammattaaq Kommune Kujallermi imigassamik aalakoornartortalimmik tuniniaasarnermik sassaalliisarnermillu utaqqiisaasumik inerteqqusiisimaneq pillugu maannakkuugallartoq misilittakkanik ilisimatinneqarpoq.  2015-imi misissuinermi atornerluinerup toqqaannartumik aningaasartuutai nioqqutissat tamakkerlutik nalingata (BNP) 2–2,5 procenterigaat missiliorneqarput. Isumalioqatigiissitap suliap ingerlaqqinneranut maanna eqqornerusumik tunngavissaqarusulluni naatsorsukkat nutarterniarpai.

Isumalioqatigiissitaq aammattaaq qitiusumik allaffeqarfiup aaqqissuunneqarnera pillugu annertuumik misissuinermik aallartitsiniarluni aalajangersimavoq. Qitiusumik allaffeqarfik qanoq aamma sooq taama ineriartorsimanersoq,  aamma ullumikkut qanoq ingerlanersoq misissuinerup erseqqissaaffigissavaa. Misissuinerup isumalioqatigiissitaq tunngavissaqalersissavaa qanoq qitiusumik allaffeqarfik pisariinnerusumik aamma innuttaasunut iluaqutissartalimmik sunniuteqarluarnerusumillu aaqqissuunneqarsinnaanersoq naliliinissaanut. 

»Pisortat allaffissorneranni ilisimasat katersukkagut, piviusunik pitsanngorsaaviusinnaasut suussusilernissaanut atugassavagut. Suliassat qanoq pitsaanerusumik aaqqivigisinnaanerigut aamma nukissanik pigineqartunik pitsaanerusumik atorluaanissaq pineqarput,« oqarpoq Johnny í Grótinum, isumalioqatigiissitap siulittaasua. 

Isumalioqatigiissitaq juni 2027-mi nalunaarusiassap tungaanut suliaqarpoq, tassani allannguinissamut aqqutissaasinnaasunik ataatsimut suussusiliisimassaaq aamma erseqqissaassalluni. 

Isumalioqatigiissitap pingaartippaa innuttaasut, sulisut, inuussutissarsiornermik ingerlataqartut aamma pisortani oqartussat ingerlaavartumik peqataatinneqartarnissaat. Taakku ilisimasaat aamma misilittagaat unammillikkat erseqqissarneqarnissaannut aamma kalaallit inuiaqatigiivini ulluinnaat aallaavigalugit aaqqissutissaasinnaasunik ineriartortitsinissamut ikiuutaassapput.

Paasissutissat allat

Johnny í Grótinum, Aaqqissuusseqqinnermut isumalioqatigiissitami siulittaasoq 
Oqa.: +298 520094 
Kim Neumann Nielsen, Aaqqissuusseqqinnermik immikkoortortami aqutsisoq  
Oqa. +299 346531 
E-mail: aaqqissuu@nanoq.gl