Kalaallit Nunaanni mittarfiit 13-iupput aammalu qulimiguulinnut mittarfiit 46-uullutik. Namminersorlutik Oqartussat Ilulissani, Nuummi Qaqortumilu nutaanik mittarfiliortoqassasoq aalajangiisimapput.

Mittarfinnik nutaanik sanaartorneq ingerlatsinerlu Kalaallit Airports-imit isumagineqarpoq. Mittarfinnik pioreersunik ingerlatsineq Mittarfeqarfinnit isumagineqarpoq.

Umiarsualiviit angisuut amerlanersaat Namminersorlutik Oqartussanit pigineqarput, Nuummi umiarsualivik kisiat pinnagu. Taanna ingerlatseqatigiiffimmit Namminersorlutik Oqartussanit pigineqartumit Sikuki-mit pigineqarpoq. Umiarsualiviit allat kommuninit imaluunniit namminersortunit pigineqarput. Attaveqaqatigiinnermut Immikkoortortaqarfik umiarsualivinnut, ikaartarfinnut talittarfinnullu, Namminersorlutik Oqartussanit pigineqartunut 170-it missaanniittunut akisussaasuuvoq.

Umiarsualivinnut qitiusumik oqartussaaneq Attaveqaqatigiinnermut Immikkoortortaqarfimmi inissisimavoq. Tassalu immikkoortortaqarfiup umiarsualivinnut inatsit umiarsualivinnullu malittarisassat akisussaaffigai. Illoqarfiit nunaqarfiillu amerlanersaanni najukkani umiarsualivinnut oqartussaaneq (tassalu ulluinnarni ingerlatsinermik aqutsineq) Royal Arctic Line-p aamma KNI-p Naalakkersuisunut isumaqatigiissuteqareertoqarneratigut isumagineqarpoq.

Naalakkersuisut ilaasunik, allakkanik nassiussanillu angallassineq pillugu Air Greenland A/S-imut, Disko Line A/S-imut, Norlandair-imut aamma Arctic Umiaq Line A/S-imut kiffartuunneqarnissamik isumaqatigiissuteqarput.

Kiffartuussinermut isumaqatigiissutit amerlanersaat 2030 tikillugu atuuttussaapput.

Attaveqaqatigiinnermut Immikkoortortaqarfik nalunaarasuartaateqarnermut inatsimmut akisussaasuuvoq, kiisalu nakkutilliineq ulluinnarnilu aqutsineq Nalunaarasuartaateqarnermut Aqutsisoqarfimmit (nutaami ammassaaq) akisussaaffigineqarpoq. Aamma Nalunaarasuartaateqarnermut Aqutsisoqarfimmiit radiup maligaasai naalagaaffimmi oqartussaasut, inatsimmut akisussaasuusut sinnerlugit aqunneqarput.

Suliassaqarfiit imarsiorneq, silaannakkut angallassineq, aqqusinertigut angallanneq aamma radiup maligaasai tiguneqarnikuunngillat. Tassa imaakkami, naalagaaffimmi oqartussaasut suliassaqarfinnut akisussaasuupput. Suliassaqarfinnut inatsisit naalagaaffimmi oqartussaasunit ilusilersorneqartarput, kisiannili Kalaallit Nunaanni pissutsinut naleqqussarneqartarlutik. Kalaallit Nunaata aamma oqartussaasut akisussaasuusut akornanni paaseqatigiinneq ilaatigut attaveqaatitut ataatsimiititaliami Namminersorlutik Oqartussat naalagaaffimmilu oqartussaasut akornanni aallartitat ataatsimeeqatigiittarnerisigut annertusarneqarpoq.

Attaveqaasersuutinut Immikkoortortaqarfiup imarsiorneq pillugu Imarsiornermut Aqutsisoqarfik, aqqusinertigut angallanneq pillugu Aqqusinertigut Angallannermut Aqutsisoqarfik aamma radiut maligaasai pillugit Paasissutissanik Pilersuinermut Attaveqaasersuutinullu Aqutsisoqarfik suleqatigai. Tamatuma saniatigut immikkoortortaqarfiup DMI aamma immap assingi pillugit Geodata-mut Aqutsisoqarfik suleqatigai.