Imarisassat tusarnaarlugit atuarlugitMeeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik
Inatsisinik atuutsitsinermut immikkoortortaq
Pinerluttulerineq pillugu inatsiseqartitsinerup tiguneqarnissaa pillugu ingeralatsinermik Naalakkersuisut aallartitsipput
Nutaarsiassaq aamma pinerluttulerineq pillugu inatsiseqartitsinerup Naalakkersuisunit tiguneqarnissaanut suliarisassat allassimaffiat aamma pinerluttulerinermmi inatsimmi allannguutit uani takukkit.
Inatsisit atuutsinneqarnerannut immikkoortortaq
Pinerluttulerinermi inatsisitigut aamma pinerluttaalisitsinermut inatsisitigut inatsisiliornermut atasuni, naalakkersuisoqarfimmi inatsisinik atuutsitsinermut immikkoortortap qanimut qallunaat oqartussaasui suleqatigai. Suleqatigiinnermi tamatumani inatsisilerinermik suliassaqarfiup Naalakkersuisut pingaartitaannik takorluugaannillu tunngaveqartumik tulleriiaarinikkut aaqqissuussiviginissaa siunertaavoq.
Innuttaasut inatsisigut isumannaatsumik inissisimanissaat nunani naqisimaneqanngitsumik naalakkersugaasuni qitiusarpoq.
Aqqusinikkut pisutsilluni toqqissisimasutut misigisinnaaneq aamma inatsisit unioqqutinneqassappata politiit akulerunnissaasa naatsorsuutigisinnaanera uani pineqarpoq. Eqqartuussiviit arlaannaannulluunniit attuumassuteqassanngillat, inatsisillu atuuttut naapertorlugit eqqartuussisassallutik. Pinerluttulerinermit eqqugaasunik eqqarsaatiginninneq pingaartinneqassaaq. Kisiannili tamatuma peqatigisaanidk unnerluunneqartut isumagineqarneranni inuit pisinnaatitaaffii pillugit isumaqatigiissutit Kalaallit Nunaata akuersissutigisimasai malillugit ingerlatsisoqassalluni.
Inuk eqqartuussivinni pineqaatissinneqarluni eqqartuunneqaraangat, eqqartuussutip piviusunngortinneqarnissaa, aamma Kalaallit Nunaanni eqqartuussiveqarfiit eqqartuussutip naammassineqarnissaani pisariaqartinneqartumik nakkutilliinissaat isumannaatsitsinissaallu innuttaasut naatsorsuutigisariaqarpaat. Inissinneqarsimasut, iperagaanerminni inuunermik pinerluttuliorfiunngitsumik inuuneqalernissaannut tapersersorneqarnissaat kajumissuseqalersinneqarnissaallu aamma Kalaallit Nunaanni Parnaarussiveqarfiit suliassaraat. Tamassuma qulakkeerneqarnissaanut suleqataajumalluni, ingammik politiinik, eqqartuussivinnik parnaarussivinnillu – kisianni aamma akuusunik allanik, inatsisit atuutsinneqarnerannut suliassaqarfimmut attuumassuteqartunik, matumani isumaginnittoqarfik ilanngullugu, inatsisit atuutsinneqarnerannut immikkoortoq qanittumik suleqateqartarpoq.
Inatsisinik atuutsitsinermut suliassaqarfimmi ilaavoq Kalaallit Nunaanni eqqartuussiveqarneq pillugu siunnersuisoqatigiit. Siunnersuisoqatigiit Eqqartuussiveqarneq pillugu ataatsimiititaliarsuup isumaliutissiissuteqareerneratigut pilersinneqarsimapput, suleqataaffigissallugulu pinerluttulerinermut eqqartuussiveqarnermullu pissutsit pillugit suliassat Namminersorlutik Oqartussat aamma qallunaat oqartussaasuisa akornanni suleqatigiinnermi ataqatigiissaarineq. Namminersorlutik Oqartussat saniatigut eqqartuussiviit, Kalaallit Nunaanni Parnaarussiveqarfik, Politiit, kommunit, qallunaat inatsiseqarnermut ministeriaqarfiat, Domstolsstyrelsi aamma universitemiimi ilisimatusartoq allallu siunnersuisoqatigiinni sinniisuutitaqarput.
-
Suliassaqarfiit
Inatsisit atuutsinneqarnerannut suliassaqarfik tiguneqarnikuunngilaq. Akisussaaffiup aallaaviatigut qallunaat oqartussaasuiniinnera tamatuma kinguneraa, matumani Inatsiseqarnermut ministereqarfik ilanngullugu. Inatsisit atuutsinneqarnerannut suliassaqarfimmut Naalakkersuisut aamma Inatsisartut politikkikkut kissaataat piviusunngortinneqarnissaat pillugit, naalakkersuisoqarfik qallunaat oqartussaasuinik suleqateqarpoq.
Inatsisit atuutsinneqarnerannut suliassaqarfimmi pingaarnertut suliassat suliassaqarfiillu tulliuttut ilaapput:
Pinerluttulerineq pillugu inatsiseqartitsineq aamma pinerluttulerineq pillugu eqqartuussisarneq, matumani eqqartuussiviit, politiit, Kalaallit Nunaanni Parnaarussiveqarfiit aamma Danmarkimi Inatsiseqarnermut ministereqarfik. Pinerluttulerineq pillugu inatsiseqartitsinerup tiguneqarnissaanut ingerlatsineq Naalakkersuisut aallartissimavaat aamma tassunga atatillugu eqimattat immikkut paasisimasallit pilersissimallugit, taakkulu suliaannut tigusinissami aamma pinerluttulerinermi inatsimmut allannguutissat arlallit naammassineqarnissaannut suliamut tunngatillugu tunngaviit ilaatinneqassapput.
Kalaallit Nunaanni eqqartuussiveqarneq pillugu Siunnersuisoqatigiit.
Inatsisit atuutsinneqarnerannut suliassaqarfiup iluani inatsisiliorneq uani: www.lovtidende.dk-p qallunaatut elektroniskiusumik “Kalaallit Nunaat”-ta ataani tamanut saqqummiunneqartarpoq.
Inatsisit atuutsinneqarnerannut suliassaqarfiup iluani inatsiliornerit kalaallisut oqaasertallit, elektroniskiusumik Kalaallit Nunaanni Naalagaaffiup Sinniisoqarfiata nittartagaani, inatsisiliornerup ataani tikinneqarsinnaapput.