Imarisassat tusarnaarlugit atuarlugitNaalakkersuisoq Danmarkimi tikeraarnermini oqaloqatigiinnermik nukittorsaavoq
Nassiussisuuvoq: Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik
Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Københavnimi tikeraarnermini danskit ministeriinik Folketingimilu ilaasortanik ataatsimeeqateqarpoq. Ataatsimiinnerni misilittakkanik paarlaasseqatigiinnissamut kiisalu suliassaqarfinni Kalaallit Nunaannut Danmarkimullu attuumassuteqartuni maannakkut sammisat oqallisiginissaannut periarfissiisoqarpoq.
Septembarip aallaqqaataanit tallimaata tungaanut Naalakkersuisoq Mariane Paviasen Jensen tikeraarnermini Suliffeqarnermut Naligiissitaanermullu ministerimik Ane Halsboe-Jørgensenimik, Meeqqanut, Utoqqarnut Ineqarnermullu ministerimik Jacob Markimik kiisalu Folketingimi ilaasortanik Naaja H. Nathanielsenimik Qarsoq Høegh-Damimillu ataatsimeeqateqarpoq.
Ataatsimiinnerni suliniutit maannakkut ingerlanneqartut pillugit paasissutissanik avitseqatigiinnissamut kiisalu suliassaqarfiit Kalaallit Nunaannut Danmarkimullu attuumassuteqartut oqallisiginissaannut periarfissiisoqarpoq. Peqatigitillugu tikeraarneq Naalakkersuisup akisussaaffeqarfii akimorlugit oqaloqatigiinnermik attaveqaqatigiinnermillu nukittorsaanissamut periarfissiilluarpoq.
Folketingimi ilaasortanik oqaloqateqarnerni suliassaqarfiit pineqartut pillugit ataatsimoortumik paasinnittoqarpoq, pitsaasumillu ingerlaavartumillu oqaloqatigiittarnerup pingaaruteqarnera isumaqatigiissutigineqarluni. Naalakkersuisup Folketingimi ilaasortat naartunaveersaasersuisimanermut suliamut atatillugu saammaasseqatigiinnissamut sulinermut tapertaaqqullugit suliakkippai. Tamatuma saniatigut ministerit misigisimasanik artornartunik aniguiniarnermut sulinerup nanginneqarnissaa pillugu suleqatigiinnermut tapertaaqataarusunnertik aamma oqaatigaat.
Ilisimasat piviusullu tunngavigalugit sulineq naartunaveersaasersuisimanermut suliaq, inatsisitigut ataataqanngitsut kiisalu Danmarkimi kalaallit meerartaannik pinngitsaaliissummik arsaarinnittarnerit pillugit qulaajaanissamut ersersaaqataassaaq, saammaasseqatigiinnissamut tapertaanissaq siunertaralugu.
”Toqqaannartumik naapilluta suliassaqarfiit tamatta immikkut suliaqarfigisavut pillugit assigiinngitsunik isiginnittaatsinik paasisaqarneq pissarsiffiulluarsimavoq. Tikeraarnitsinni pitsaasumik inerisaalluartumillu oqaloqatigiippugut, isummersuutillu pitsaasut arlallit sulininni ingerlateqqissavakka”, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.
Naalakkersuisup ministerillu isumaqatigiissutigaat ministerit marluullutik kingusinnerusukkut periarfissaqalerpat Kalaallit Nunaannut tikeraassasut, suliassaqarfinni pissutsit sulinerlu pillugit sukumiinerusumik paasisaqarniarlutik.
“Taamaattorli ministerinik naappitsinissamik piffissaliussaq annikippoq, pingaarutilinnik itisuumik nunatta killiffianut tunngasunik, ullumikkut atukkatta danskit siusinnerusukkut aamma iliuuserisimasaanik aallaavillit annertuujupput. Tamanna tunngavigalugu akisussaaqataanerminnut suliniutigisinnaasaat itisilerlugit paaseqatigiiffissarsiorusunnartuupput, tamannalu tunngavigalugu ministerit naapitakka nunatsinnut tikeraarsarpakka. Oqaloqatigiinerit paaseqatigiiffissarsiorfissat iliuusissanillu tigussaasunik angusaqarfiussappata piffissamik sivisunerusumik ataatsimiinissat pisariaqarmata”, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.
Attavissaq
Sukumiisumik paasisaqarusukkuit naalakkersuisup allattaa Paarna Deemand Christiansen e-mailikkut padc@nanoq.gl imaluunniit oqarasuaatikkut: +299 24 79 51 attavigiuk.