Imarisassat tusarnaarlugit atuarlugitYellow Septemberimi imminut toqunnissamik pinaveersaartitsineq sammineqarpoq
Nassiussisuuvoq: Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik
Ukiormanna aamma Yellow September aamma nunarsuaq tamakkerlugu Imminut toqunnissamik pinaveersaartitsinermut ulloritinneqarpoq ulloq 10. septembari malunnartinneqarpoq. Ukiormanna ilinniarfinni imminut toqunnissamik pinaveersaartitsineq sammineqarpoq aamma sumi ikiortissarsiortoqarsinnaaneq tapersersorneqarsinnaanerlu ersarissarneqarluni.
Yellow September ukiumoortumik pisarpoq, tamanna sammisamut suli eqqartornissaanut ajornakusoortumut ammanerulersitsinissamut iluaqutaassaaq. Eqqarsaatit misigissutsillu ilungersunartut pillugit oqaloqatigiinnissamut inissamik pilersitsinissaq siunertarineqarpoq aamma ilutigalugu ikiortissarsiornissamut ajornannginnerulersitsissalluni.
Ukiormanna Yellow Septemberimut atatillugu Nanook, Jens Kleist aamma Andachan suleqatigalugit pinaveersaartitsineq pillugu erinarsuummik nutaamik saqqummersitsisoqassaaq. Erinarsuut Paarisamit taperserneqarluni suliarineqarpoq aamma Innuttaasut immikkut siunnersortimit Peqqissusaannik Ilisimatusarfimmeersumit Arnârak Patricia Blochimit suliatigut pitsaassusilerneqartoq. Erinarsuut eqqarsaatigut ilungersunartunut aamma allanik oqaloqatissarsiortarnerup oqaloqatiginnittarnerullu pingaaruteqassussaanut eqqummaariffiginnitsitsinerulissaaq.
Ilutigalugu Qamani - imminut toqunnissamik pinaveersaartitsineq pillugu periusissiaq 2023-2028-p pilersinneqarnera pillugu 2025/2026-mut killiffimmut nassuiaammik nutaamik tamanut saqqummiussisoqassaaq. Killiffimmut nassuiaat periusissiami anguniakkanut suliniutinullu tigussaasumik suliniutinngortitsinissamut suliaqarnermik takussutissiivoq taannalu uani linkimi nassaarineqarsinnaavoq: https://paarisa.gl/nyheder/2026/09/1009_qamani?sc_lang=kl-gl
"Inuiaqatigiinnik, ilungersuuteqarnermi ammasumik oqaloqatigiiffiusinnaasumik aamma ikiortissarsiorniarluni orniguffissanik ilisimasaqarfiusunik pilersitsinissarput pingaaruteqarpoq. Suliniutit taakkua aqqutigalugu ammanerunissamut aamma ikorfartortissamik pissarsinissamut periarfissat takutinneqarnissaat kissaatigaarput. Ilutigalugu Qamanimi sulinerup ineriartorneranik malinnaaneq aamma ingerlaavartumik periusissiap qanoq iliuusinngortinneqarnerata ersarissarnissaa pingaaruteqarpoq. “ Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Mariane Paviasen Jensen oqarpoq.
Ukiormanna suliaqartut 19-it Paarisami 10. september/Yellow Septemberimi aningaasaateqarfimmit aningaasanik qinnuteqarput, tamatumalu nuna tamaat assigiinngitsunik aaqqissuussinernik suliniutinillu ingerlatsinissaq piviusunngortippaa.
Attaveqarfissaq
Paasissutissat amerlanerusut pissarsiariniarlugit ministerip allattaa Paarna Deemand Christiansen mailikkut: padc@nanoq.gl imaluunniit oqarasuaat: +299 24 79 51-mut attaveqarfigiuk.