Aalisarnermut inatsisissatut siunnersuut Inatsisartunut nassiunneqarpoq

Nuannaarutigalugu nalunaarutigisinnaavara aalisarnermut inatsisissatut siunnersuut inatsisartunut ilaasortanut nassiunneqarmat, Aalisarnermut Piniarnermullu Naalakkersuisoq Kim Kielsen oqarpoq.

Inatsisartunut ilaasortat aalisarnermut inatsisissatut siunnersuut upernaaq maanna ataatsimiinnerminni oqaluuserisussaavaat.

Neriuppunga aalisarnermut inatsisissatut siunnersuut Inatsisartuni ilaasortat oqaluuserilerunikku tamatumalu naammassinissaa tikillugu sammilerunikku inerititalimmik aamma pitsaasumik siumut isigisumik oqaluuserinnikkumaartut. Inatsit aalisartunut kinguaariinnut tulliuttunut tunngaviusussaavoq, aalisarnerullu ineriartortinneqarneranut pingaaruteqarluinnartussaalluni minnerunngitsumillu inuiaqatigiinnut kalaallinut tamanut iluaqutaasussaalluni.

Aalisarnermut inatsisissatut siunnersuutip suliarinera sivisullunilu pissanganarsimaqaaq, sapinngisarput tamaat aalisarnermik attuumassutillit tamaasa suliarineqarnerani tusarniarneqarsimallutik.

Manna iluatsillugu inuit ataasiakkaat peqatigiiffiit, kommunit, kattuffiit aamma suliniaqatigiiffiit tusarniaanermi soqutiginnillutik tunniusimallutillu akissuteqarsimanerinut qujaffigerusuppakka. Pingaartuuvormi tamarmik akissuteqarnissaminnut, isummaminnik anitsinissaminnut periarfissaqartussaammata.

Aalisarneq pillugu inatsisissatut siunnersuummut paasissutissat tamaasa; inatsisissatut siunnersuut, oqaaseqaatit, tusarniaanermut akissutit aamma siunnersuusiornermut tunngavigineqartut, Aalisarnermut Piniarnermullu Naalakkersuisoqarfiup Naalakkersuisut nittartagaanni Naalakkersuisut.gl-imi atuarneqarsinnaapput.

Paasissutissanik amerlanerusunik Aalisarnermut Piniarnermullu Naalakkersuisoqarfimmit apn@nanoq.gl pisoqarsinnaavoq.