Atuartiguk
Innuttaasut NemID-llit nittartakkakkut MitID-taarsinnaapput aammalu kommunini MitID-mik tunniussisinnaanissamut akuersissummik pinikut innuttaasunik aamma sullissisinnaallutik. Innuttaasut NemID-qanngitsut passeqarunik MitID appi atorlugu MitID-taarsinnaapput immaqaluunniit innuttaasunut sullissivinnut ornigullutik ikiortissinnaapput – Kommuneqarfik Sermersooq kisiartaalluni MitID-mik tunniussisinnaavoq.
Kommune Kujalleq, Avannaata Kommunia, Qeqqata Kommunia aammalu Kommune Qeqertalik innuttaasunut MitID-mik tunniussisinnaanngikkallarpoq. Taamaattumik apeqqutit MitID-mut attuumassutillit kommuninut pineqartunut saaffiginnissutigineqassapput.
MitID pillugu inatsit 2021-mi ukiakkut ataatsimeersuarnermi akuersissutigineqarpoq, kommunillu 2021-mi decembarip ingerlanerani Netsimit isumaqatigiissutinik nassinneqarput, taakkua aqqutigalugit MitID-mik tunniussisinnaanissamut akuersissut aallartinneqartarpoq. Suliap ingerlanneqarnissaanut Digitalimik Sullissinermut Aqutsisoqarfik kommuninut sullissisimaqaaq.
Kommunit MitID-mik tunniussisinnaanissaminnut akuersissummik pinissaat 31. Januaarimut killilerneqarsimavoq.
NemID paariinnarallassaaq
Pingaaruteqartorujussuuvoq innuttaasup MitID-taareeraluarluniluunnii NemID-ni paariinnarallassagaa, tassami oqartussaqarfinni namminersortunilu arlalinni suli NemID atorneqarami atorneqarallassallunilu. Oqaatigiuminaakkallarpoq qaqugu NemID atorneqarunnaassanersoq.
Tamanna peqqutaalluni kommunini innuttaasunut sullissiviit suli NemID-nik tunniussisinnaapput.
Kalaallit Nunaanni NemID-mik tunniussuinerup unitsinneqarnissaa ullulerneqariarpat, tamanna nalunaarutigineqarumaarpoq.
Paasissutissat
2022-mi sapaatip akunnera 49-mit kisitsisit
| Innuttaasut qaammatini arfinilinni kingullermi NemID-mik atuisimasut MitID-taarnissaanillu ilimanaatillit | 33.000 |
|---|---|
|
Innuttaasut qaammatini arfinilinni kingullermi NemID-mik atuisimasut MitID-taarnissaanillu ilimanaatillit
Kalaallit Nunaanni innuttaasut MitID-taarnikut
|
33.000
29.281
|
Tamanna isumaqarpoq MitID-taartussatut naatsorsuutigineqartunit, 33.000-usuni, 89 %-it MitID-taareersimasut.
Paasissutissat – innuttaasut ima MitID-taarsinnaapput
Innuttaasunut sullissivinni ikiorneqarneq
Siunissami innuttaasut innuttaasunut sullissivinnut ornigullutik kiisalu kinaassutsimut uppernarsaammik naapertuuttumik takutitsillutik sullissisunit MitID-mik tunineqarsinnaalissapput. Maannakkumut Kommuneqarfik Sermersooq kisiartaalluni MitID-mik tunniussisinnaavoq. Taamaattumik Kommuneqarfik Sermersuumi innuttaasut kisiartaallutik innuttaasunut sullissivimmut ornigullutik sullissisunit MitID-mik tunineqarsinnaapput.
Innuttaasut NemID-llit aningaaserivilimmilu illoqarfillit
Innuttaasut ullumikkut NemID-llit aningaaserivilimmilu illoqarfillit aningaaserivimmut ornigunnikkut MitID-taarnissaminnut ikiorneqarsinnaapput. Kinaassutsimut uppernarsaatit sorliit atorneqarsinnaanersut sullissivik.gl-imi takuneqarsinnaapput.
Innuttaasut passillit NemID-qanngitsulli
Innuttaasut atuuttumik passillit MitID-taarnissaminnut periarfissaat amerlanerpaapput.
Innuttaasut atuuttumik passillit NemID-qanngitsulli MitID-appi aqqutigalugu MitID-taarsinnaapput. Tamanna pillugu sukumiinerusumik atuarneq sullivik.gl aqqutigalugu pisinnaavoq.
Innuttaasut NemID-llit
Innuttaasut passillit NemID-llillu mitid.dk aqqutigalugu MitID-taarsinnaapput. Taamaaliussagunilli NemID-mi paasissutissat imminermut attuumassutillit nutarterneqaqqaartariaqarput.
Passi atorlugu innuttaasut NemID-mi paasissutissat imminermut attuumassutillit NemID-mut matuersaat atorlugu nutartersinnaavaat. Periarfissarli tamanna ingerlanneqarsinnaajunnaassaaq 1.januaari 2023 aallarnerfigalugu.
Innuttaasut NemID-llit passeqanngitsulli mitid.dk aqqutigallugu MitID-taarsinnaapput. Taamaaliussagunilli NemID-mi paasissutissat imminermut attuumassutillit uani aamma nutarterneqaqqaartariaqarput.
Innuttaasut kommunini sullissivinnut nunaqarfinniluunniit kommunimi sullissisunut ornigullutik imminerminnut paasissutissaatitik NemID-miittut nutartertissinnaavaat. Kinaassutsimut uppernarsaatit sorliit atorneqarsinnaanersut sullissivik.gl-imi takuneqarsinnaapput.
Innuttaasut NemID-qanngitsut passeqanngitsullu
Innuttaasut NemID-qanngitsut passeqanngitsullu MitID-taarusuttullu maannamut taamaallaat MitID-taarsinnaapput kommunimi innuttaasunut sullissivimmut ornigunnikkut.
Innuttaasoq kommunimi suli MitID-mik tunniussisinnaanissaminut akuersissummik tunineqarsimanngitsumi najugaqaruni, innuttaasup komminimi MitID-mik tunniussisinnaalernissaa utaqqisariaqarpaa. Innuttaasorli kommunimut MitID-mik tunniussisinnaasumut ornigulluni MitID-taarsinnaavoq.
Paasissutissat sukumiinerusut: Aqutsisoqarfimmi pisortaq Katrine Hjelholt Nathanielsen, oqarasuaat 34 59 70 / kat@nanoq.gl