Avannaata Kommunia ammaannartumik ikuallaasarnissaq pillugu immikkut ittumik akuerineqarnissamut qinnuteqaamminut itigartinneqarpoq

Eqqakkanik ikuallanneqarsinnaasunik ikuallaasarneq ikuallaavinni avatangiisinut akuerisani pisussaavoq. Kisiannili Naalakkersuisut kommunalbestyrelsimit qinnuteqartoqarneratigut sivisunerpaamik qaammatini pingasuni eqqakkanik ikuallanneqarsinnaasunik ammaannartumik ikuallaasarnissamut immikkut ittumik akuersissuteqarallarsinnaapput. Aaqqiissutissarli utaqqiisaasumik aaqqiissutissaavoq, aammalu aaqqiissutissatut ataavartutut atorneqarnissaa siunertaanngisaannarpoq, eqqakkanik ammaannartumik ikuallaasarneq peqqissuseq avatangiisillu eqqarsaatigalugit aaqqiissutissatut pitsaasuunngimmat.

”Naalakkersuisuniit eqqagassalerineq pingaaruteqarluinnartutut inissisimatinneqarpoq. Nuna tamakkerlugu innuttaasut minguitsunik peqqinnartunillu avatangiiseqarnissaq pisinnaatitaaffigaat. Maannarpiaq unammilligassat, piffissami sivisuumi eqqagassalerinermi atuussimasut aaqqiiffiginiarlugit, eqqagassalerineq annertuumik siuarsaaffigineqarpoq. Tassalu unammilligassat, mingutitsinermik peqqissutsimullu ulorianartorsiortitsinermik nassataqartut. Taamaattumik aamma nuna tamakkerlugu eqqagassalerinermi aaqqiissutissat ataatsimoorussat Naalakkersuisuniit tapersersorneqarput. Ukiut tulliuttut ingerlanerini ikuallaaviit marluk, nuna tamakkerlugu atorneqartussat nutaaliat, kommunit ataatsimoorlutik eqqagassaleriffiannit ESANI A/S-imit ingerlanneqartussat sananeqaleruttorput. Ikuallaaviit nutaat atulernerisigut, eqqagassalerinerup pitsanngortinneqangaatsiarnissaa, taamaalillunilu ammaannartumik ikuallaasernerit pisariaarunnissaat qulakkiissavarput. Ammaannartumik ikuallaasarnerit peqqissutsimut avatangiisinullu annilaanganartortaqarput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Ajoraluartumik Avannaata Kommunia ESANI A/S-ip kommunit allat suleqatigalugit aaqqiissutissaanut ilaaniarani aalajangersimavoq. Tamatuma peqatigisaanik kommuni kommunimi eqqakkanik katersuisarnissamut piiaanissamullu piffissamut ungasissumut pilersaaruteqanngilaq. Avannaata Kommuniata ESANI A/S-imut ilaaleqqinniarani aalajangerneranut peqatigitillugu, kommunimi maannarpiaq aaqqiissutissanik naammaginartunik annertussusilinnik ujartuinissamut piumasaqaat naammassineqarsinnaanngilaq.

”Ammaannartumik ikuallaasarneq tamatigut aqqutissatut kingulliusartussaavoq. Siusinnerusukkut kommunip ammaannartumik ikuallaasarnissaq pillugu immikkut ittumik akuersissuteqartoqarnissaanut qinnuteqaatigisarsimasaanni, eqqakkanik isumaginninnissamut aaqqiissutissanik tamakkiisunik pilersitsinissamut suliniuteqartoqarnissaa piumasarineqartarsimavoq. Ajoraluartumik Avannaata Kommuniata piumasaqaat taanna naammassisarsimanngilaa. Siunissami aaqqiissutissat, avatangiisinut piumasaqaatinik naammassinniffiusut pillugit kommunip oqaloqatiginissaanut piumassuseqarluarpunga, Naalakkersuisoq Kalistat Lund oqarpoq.

Avannaata Kommunia eqqagassalerinermi aaqqiissutissanik tamakkiisunik pilersitsinissamut siunissamut ungasissumut pilersaarummik nassiussisinnaaguni immikkut ittumik akuerineqarnissamut qinnuteqaammik nassiusseqqissinnaavoq, tamannalu aamma siusinnerusukkut immikkut ittumik akuersissuteqartarnerni piumasarineqartarsimavoq.

”Aningaasaqarnikkut avatangiisillu eqqarsaatigalugit aaqqiissutissatut pitsaanerpaatut Avannaata Kommuniata nuna tamakkerlugu eqqagassalerinermi aaqqiissutissamut, kommunit suleqatigiiffigisaannut aammalu eqqakkat nuna tamakkerlugu ikuallaavinni ikuallanneqartarfiannut ilannguteqqittariaqaraluarpoq”, Naalakkersuisoq Kalistat Lund naggasiivoq.

Avannaata Kommuniani sumiiffiit eqqorneqartut 24-t
Sumiiffinni ukunani eqqakkanik ammaannartumik ikuallaasarnissaq pillugu immikkut ittumik akuersissuteqartoqarnissaanut itigartitsisoqarpoq:

• Qaanaaq nutaqarfiilu Qeqertat, Savissivik aamma Siorapaluk.
• Upernavik nunaqarfiilu Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.
• Uummannaq nunaqarfiilu Ikerasak, Niaqornat, Qaarsut, Ukkusissat aamma Saattut.
• Ilulissat nunaqarfii Oqaatsut, Qeqertaq, Saqqaq, aammalu Ilimanami anartarfiit puussiartaat imaqanngitsut.

2020-2031-mut eqqagassalerinermut pilersaarut
2020-2031-mut eqqagassalerinermut pilersaarummi ikuallaaviit, nuna tamakkerlugu atuuttut nutaaliaasullu qanoq iliorlutik nuna tamakkerlugu eqqakkanik isumaginnittarnissaat allaaserineqarpoq.

2020-2031-mut eqqagassalerinermut pilersaarut atuaruk, uani aasinnaavat.

Annertunerusumik paasisaqarusunnermi Nunalerinermut, Imminut Pilersornermut, Nukissiornermut Avatangiisinullu Naalakkersuisoqarfimmi pisortaaneq Natuk Lund Olsen tlf.: 346476-imut sianerfigalugu imaluunniit email: natl@nanoq.gl imaluunniit pan@nanoq.gl aqqutigalugu attaveqarfigineqarsinnaavoq.