Uumasut nakorsaasa nunatsinni sulisarnerat pillugu tusagassiorfinnut nalunaarut
Nunatsinni uumasunut nakorsassaaleqineq pillugu tusagassiorfitsigut allaaserinnittoqarneranut atatillugu Uumasunut Nakorsaqarfik Inuussutissalerinermullu Oqartussaaffik tusagassiorfinnut nalunaaruteqarluni Namminersorlutik Oqartussani uumasunut nakorsat Nunatsinni uumasunik suliarinninnissamut sunik pisussaaffeqarnersut pillugu erseqqissaassuteqarpoq.
Nassiussisuuvoq: Aalisarnermut Piniarnermullu Naalakkersuisoqarfik![Qimmit qimuttut](/-/media/billeder/dyr/hund/qimmit_qimuttut.jpg?cx=0.5&cy=0.5&cw=975&ch=415&hash=1D87F8883325D5B7D7CE7272177C3C08)
Namminersorlutik Oqartussani uumasut nakorsaasa suliassaat pisussaaffiilu uumasunut atatillugu inatsimmi Kalaallit Nunaanni atuuttumi nassuiarneqarput. Uumasut nakorsaasa pingaarnertut pisussaaffigaat nunami uumasut tamarmik ajunngitsumik atugaqarnissaannik peqqissuunissaannillu nakkutilliinissaq. Uumasunik misissuisarneq eqqarsaatigalugu Namminersorlutik Oqartussani uumasut nakorsaat Nunatsinni qimminut qimuttunut savaatigineqartunullu pisussaaffeqarput, tassa uumasunut Nunatsinni inuussutissarsiornermut pingaarutilinnut pisussaaffeqarput. Namminersorlutik Oqartussani uumasut nakorsaat angerlarsimaffimmi uumasuutigisanik misissuinissamut suliarinninnissamullu pisussaaffeqanngillat.
Uumasut nakorsaattut suliaqartarneq namminersortutut inuussutissarsiutaavoq. Innuttaasut, kommunit suliffeqarfiillu namminersortut tamarmik Nunatsinni sumiluunniit uumasunut nakorsiartarfimmik namminneq aallartitsisinnaatitaallutillu uumasut nakorsaannik uumasunik misissuillutillu suliarinnittartussanik atorfinitsitsisinnaatitaapput. Tamatumannga soqutiginnikkaanni Uumasunut Nakorsaqarfik Inuussutissalerinermullu Oqartussaaffik, uumasut@nanoq.gl aqqutigalugu, suut piumasaqaataanersut erseqqinnerusumik paasiniaaffigineqarsinnaavoq.
Uumasut nakorsaasa Avannaani sulisarnerat:
Nunatsinni qimmeq qimuttoq eriagisassaasoq kalaallit inuiaat kinaassusaannut imminnullu paasinnittaasiannut pingaaruteqarpoq, aamma innuttaasorpassuit inuussutissarsiumminnik ingerlatsinerannut pingaaruteqartuulluni. Namminersorlutik Oqartussani uumasut nakorsaat taamaammat qimmit qimuttut nappaataat il. il. pillugit piginnittunut siunnersuinissamik ilitsersuinissamillu pisussaaffeqarput. Qimuttunik qimmiutillit qimmiutiminnut nakorsaatinik katsorsaasarnissaat innuttaasunit politikkerinillu kissaataavoq, tamatumalu anguneqarnissaat taamaammat sulissutigineqarluni. 2023-mi qaammatit siulliit pingasut ingerlaneranni peqqinnissaqarfik suleqatigalugu qaammatini aqqaneq-marlunni misiligummik suliniutigineqarniartoq aallartisarneqassaaq, tassunga atatillugu Ilulissani Qaanaamilu peqqinnissaqarfiit uumasunut nakorsaataasivilerneqassapput. Nakorsaataasiviit qimmit qimuttut nappaataannut ulorianannginnerusunut nakorsaatinik toqqortaateqassapput. Qimmip qimuttup nappaataanut nakorsaammik pissarsissagaanni Namminersorlutik Oqartussani uumasut nakorsaat attavigineqaqqaassapput nakorsaammullu akileeqqaartoqassalluni. Suliniut aallartinneqarpat paasissutissanik allanik tunniussisoqassaaq, aamma Ilulissani Qaanaamilu innuttaasut ataatsimeeqatigineqassapput, ataatsimeeqatigiinnermi periusissaq erseqqinnerusumik nassuiarneqassaaq.
Tassunga atatillugu tusagassiorfitsigut nalunaarutigineqarsimasut naqqissorneqassapput: misiligummik suliniutigineqarniartoq aallaqqaammut Sisimiuni ingerlanneqassanngilaq, misiligummilli suliniutigineqartoq nalilersorneqareerpat neqeroorut qimminik qimuttoqarfiusuniittunut illoqarfinnut amerlanerusunut siammarterneqassaaq.
Uumasut nakorsaasa Kujataani sulisarnerat:
Namminersorlutik Oqartussani uumasut nakorsaat Nunatsinni savaatilinnut pisussaaffeqarput. Tassunga atatillugu savaatillit tamarmik uumasuutimik nakorsaatissaannik pissarsisarnissaat siunertaralugu ukiut tamaasa suliaqartoqartarpoq. Savaatilinnut tamanut ilitsersuutissat qanittukkut nassiussuunneqassapput, ilitsersuutini savaatillit uumasuutitik napparsimalerpata qanoq iliortassanersut aamma qanoq qaqugukkullu uumasut nakorsaannut attaveqartassanersut pillugit ilitsersorneqassapput.
Ukiuni kingullerni uumasut nakorsaannik Nunatsinni atorfinitsitsiniartarnerup immikkut ittumik ajornartarsimanera pissutigalugu, Uumasunut Nakorsaqarfik Inuussutissalerinermullu Oqartussaaffimmit nalilersortuarneqartarsimavoq, uumasut nakorsaannik piffissami sivikitsumi paarlattaasussamik Kujataanut tikisitsisoqartassanersoq. Uumasut nakorsaat taakku Nunatsinni savaatilinnut aalajangersimasumik sullissisussatut atorfinitsinneqassapput, angerlarsimaffimmilu uumasuutinik misissuinissamut, katsorsaanissamut pilattaanissamullu pisussaaffeqassanngillat.
Angerlarsimaffimmi uumasuutit:
Qaqortumi Ilulissanilu uumasut nakorsaattut siusinnerusukkut atorfeqartinneqarsimasut namminersortutut uumasunut nakorsiartarfimmik pilersitsisimapput, taakkunani angerlarsimaffimmi uumasuutigineqartut isumagineqartarsimallutik.
Uumasuutinik katsorsaaneq uumasut nakorsaasa atorfimmik avataatigut isumagisarsimavaat, uumasuutinullu nakorsaatissat tamarmik uumasut nakorsaasa namminneerlutik pisiarisarsimallugit. Angerlarsimaffimmi uumasuutinik katsorsaaneq taamaammat nammineq inuttut isumagineqartuaannarsimavoq. Ullumikkut Nunatsinni uumasunut nakorsiartarfik namminersortutuaasoq tassaavoq Donnas Dyreklinik Nuummiittoq. Nunami tamarmi uumasuutillit Donnas Dyreklinik uumasuutitik pillugit siunnersortillutillu ilitsersorneqarnissaq anguniarlugu sukkulluunniit saaffigisinnaavaat, soorlu aamma uumasunut nakorsiartarfiup akiliisitsilluni uumasut napparsimasut ungasianit nakorsarsinnaagai.
Uumasut nakorsaasa sulisarnerannut atatillugu apeqqutissaqaraanni uumasut@nanoq.gl aqqutigalugu saaffiginnittoqarsinnaavoq.