Nuna tamakkerlugu meeqqanut immikkoortortassaq pilersinneqartussanngorpoq

Nuummi Dronning Ingridip Napparsimavissuani nuna tamakkerlugu meeqqanut immikkoortortassamut ukiumut 8,7 mio. kr.-inik aningaasaliisarniarlutik Inatsisartut isumaqatigiissutigineqarpoq.

”Meeqqanik katsorsaasarnerit pitsaanerulerlutillu ajunnginnerusumik atugassaqarfiulernissaat pisussanngormat annertuumik nuannaarutissaavoq. Meeqqanut nutaamik immikkoortortaqalernitsigut meeqqat ataasiakkaat nammineernerulersussanngorlugit pitsaanerusunik atugassaqartilissavagut" Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen taama oqarpoq.

Meeqqanut immikkoortortaqalernikkut misissortittarnerit katsorsaasarnerillu pitsaanerulissapput meeqqallu immikkut pisariaqartitsisut misissortinnissamik, katsorsartinnissamik isumagineqarnissamillu pisariaqartitaat naammassineqarsinnaalissallutik.

Tamanna ilutigalugu meeqqanik nakorsaasarnernik misilittagalinnik aamma meeqqanik nakorsaasarnerup suliassaqarfiani ineriartortitsinissamik ilinniartitaanissamillu immikkut soqutigisaqartunik sulisussarsiortarneq ajornannginnerulissaaq.

Massakkut nuna tamakkerlugu meeqqat siniffiit aalajangersimasut meeqqanut angajoqqaanullu atugassanngortinneqartarlutik, inersimasunik ineqateqarlutik unitsinneqartarput. Meeqqanut nutaamik immikkoortortaarnitsigut peqqinnissaqarfimmi sulisut namminerisamik immikkoortortami meeqqanik ilaqutaasunillu ataasiakkaanik aallussinerullutik sullissisinnaalissapput.

Nuna tamakkerlugu meeqqanut immikkoortortaqarfittaaq meeqqanut arfineq pingasunut uninngaffigineqarsinnaassaaq aamma meeqqanut immikkoortortaq meeqqanik amimikkut nappaatilinnut ikorfartuiffiulluni sullissisinnaalissaaq taamatut suliaqarsinnaasunik amerlanerusunik sulisoqalersussaammat.

Sukumiisumik paasisaqarusukkuit naalakkersuisup allattaa Frederik Kristiansen e-mailikkut frek@nanoq.gl imaluunniit oqarasuaatikkut: +299 345000 attavigiuk