Mingutsitsinngitsumik imaatigut angallanneq pillugu isumasioqatigiisitsineq – The Green Future of Maritime Operations – naammassilluarpoq ornigarneqarluarlunilu

Naalakkersuisut Nordic Energy Research aamma Kommuneqarfik Sermersooq suleqatigalugit isumasioqatigiinneq ”The Green Future of Maritime Operations” 4.-6. oktobari 2022-mi ingerlappaat. isumasioqatigiinnermi siunissami umiarsuit mingutsitsinngitsumik angalasarnissaat aalajangiisartunit immikkullu ilisimasalinnit siuttuusunit oqallisigineqarpoq.

Isumasioqatigiinneq ”The Green Future of Maritime Operations” nunatsinniit nunanillu allaniit annertuumik tapersersorneqarluni iluatsilluarpoq. Ullut isumasioqatigiiffiit pingasuusut pissanganartunik paasissutissiiffiulluartunillu saqqummiussinernut, ilisimasallit oqallinnerinut sammisanullu break-out-inik taaneqartunut atorneqarlutik, Kalaallit Nunaanni nunanilu tamalaani sullissisut akornanni siunissami umiarsuit mingutsitsinngitsumik angalasinnaalernissaannut oqallinnermut sinaakkusiipput. isumasioqatigiinnermi ilaatigut Utoqqarmiut Kangerluarsunnguat aamma Royal Arctic Line-p containereqarfia alakkarneqarput.

”Isumasioqatigiinnermi Kalallit Nunaanni mingutsitsinngitsumik imaatigut angalanerit aaqqiissutissallu tamakkiisumik misilerarneqarnissaannut Kalaallit Nunaat pitsaalluinnartunik sinaakkusiisinnaasoq, Naalakkersuisut nunarsuup sinneranut oqariartuuteqarput.

Mingutsitsinngitsumik imaatigut angalasalernissamut ikaarsaarnissaq piffissamik atuiffiusussaavoq. Taamaattumik maannangaaq oqallinnernik pilersaarusiornernillu aallartitsereernissarput, aammalu allannguiniarnermi akornutissat naammattoortagassatta pilertortumik paasinissaat Naalakkersuisunut pingaaruteqarpoq. Isumasioqatigiinnermi ilisimasassat nutaat pissarsiarineqarput, nunatsinni periarfissat saqqummiunneqarput, kiisalu siunissami mingutsitsinngitsumik imaatigut angalasinnaalernissamut neriuutissaqalerpugut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Nordic Energy Research aamma Kommuneqarfik Sermersooq isumasioqatigiisitsinerup ingerlanneqarneranut atatillugu suleqatigiilluarsimaneq pillugu qutsavigerusuppai. Tamatuma saniatigut Naalakkersuisuniit sullissisut peqataasut tamaasa ilanngussaat, isummersuutaat ilisimasaminnillu avitseqateqarnerat pillugu qutsavigineqarput.

Ataatsimeersuarnermit assit aaneqarsinnaapput, uani (4,3 MB).

Ataatsimeersuarnermi saqqummiussat aaneqarsinnaapput, uani (78,1 MB).

Attaveqarfissaq
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Natuk Lund Olsen tlf.: 34 54 12-imut imaluunniit pan@nanoq.gl aqqutigalugu attaveqarfigineqarsinnaavoq.