Nannut ajornartorsiutaasut pillugit nannunillu naammattuinermi imminut illersorsinnaneq pillugu ilisimatitsissut

Nannut nunatsinni sumiiffinni assigiinngitsuni piffissami matumani takuneqallattaartarput , inuillu attaveqataasigut, facebookikkut takutinneqartarlutik. Tamanna pillugu Aalisarnermut Piniarnermullu Naalakkersuisoqarfik maleruagassat atuuttut pillugit erseqqissaateqassaaq.

Nannut inoqarfinnut, savaateqarfinnut assigisaannullu qaninngoorsinnaasarput. Nannut inunnut pigisanullu naleqartunut ajoqusiisinnaasut nannut ajornartorsiutaasutut taaneqartarput.

Nannut ajornartorsiutaasut pillugit Naalakkersuisoqarfik ukiorpaaluit matuma siornali suliaqalerpoq. Nannunik ajornartorsiutaasunik periutsit assigiinngitsut atorlugit qimaatitsisoqarsinnaavoq, tamannalu amerlanertigut iluatsittarpoq.

 Periarfissaq kingullerpaaq atorlugu qimaatitsiniarnerlu iluatsinngikkaangat allatut ajornartumik nannunik ajornartorsiutaasunik toqutsisoqartariaqartarpoq.

Nannunik ajornartorsiutaasunik toqutsisoqarsimatillugu nannup neqaa sumiiffimmi agguaanneqartarpoq. Nannup neqaata sivisuumik uunneqarnissaa pillugu ilitsersuutit Kalaallit Nunaanni Uumasunut Nakorsaqarfik Inuussutissalerinermullu Oqartussaaf-fimmit, UNIO-mit pissarsiarineqarsinnaapput. Nannup amia, kukii niaqualu Naalakkersuisoqarfimmut nassiunneqartarput. Nannunik ajornartorsiutaasunik suliaqarnermi Naalakkersuisoqarfik, Politiit, KANUAANA ilaatigullu sumiiffimmi piniartut imaluunniit alapernaarsuinermik ingerlataqartut suleqatigiittarput.

Pinngortitami nannut tassanngaannaq takkussinnaasarput, tamannali qaqutigoortuuvoq. Taama pisoqartillugu kinaluunniit imminut illersorsinnaanissamut periarfissaqarpoq, imminut illersorniarluni nanoq toqunneqartariaqassappat. Taama pisoqartillugu siuliani oqaatigineqartutut nannup neqaa sumiiffimmi agguaanneqartarpoq, nannullu amia, kukii aamma niaqua Naalakkersuisoqarfimmut nassiunneqartarlutik.

Pinngortitami angalaartartut tamarmik kaammattorneqarput nannunik naammattuuiner-mi qanoq pissuseqarnissamut ilitsersuut www.sullissivik.gl -miittoq atuaqqullugu. Ilitsersuut pineqartoq Namminersorlutik Oqartussanit nutarterneqarsimavoq, tassani aamma nannup toqunneqareernerata kingorna amia, kukii, niaqua aamma aqajarua qanoq passunneqassanersut atuarneqarsinnaavoq.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl