AtuartigukTerianniamit kiitikkaanni qanoq iliortoqassava
Nassiussisuuvoq: Aalisarnermut Piniarnermullu Naalakkersuisoqarfik
Sianiuteqarfinniit nappaammut ersiuteqalereersimappat perlerornermut immikkut ittumik nakorsaatissaqanngilaq. Taamaammat uumasumit perlerorsinnaasumit kiineqarnermi ingerlaannaq pinaveersaartitsiniarluni iliuuseqarnissaq pingaaruteqarpoq.
Perlerorneq nappaataavoq virusimik patsiseqartoq, nalinginnaasumik uumasumit perlerortumit kiitinnikkut tuniluuttartoq. Nappaat pinaveersaartinniarlugu nakorsanngikkaanni toqussutaasinnaasumik qaratsakkut aseruutsitsinnaavoq. ”Taamaammat uumasumit perlerorsorisamit kiitikkaanni, ingerlaannaq ikip imermik qaqorsaammillu salinnissaa pingaaruteqarpoq. Tamatuma kingorna pinaveersaataasumik nakorsarneqarnissaq siunertaralugu najukkami peqqinnissaqarfimmut saaffiginnittoqassaq,” Nunatsinni Nakorsaaneqarfimmi nakorsaq Paneeraq Noahsen oqarpoq.
Perlerornermut pinaveersaarinermi iki salilluarneqassaaq, akiuussutissiisoqassaaq saniatigullu aap akuanik akiuussutissiamik kapitittoqassalluni.
Kangerlussuarmi teriannissat akornanni perlerortoqarneranik Uumasunut Nakorsaqarnermut Inuussutissalerinermullu Oqartussaqarfiup nalunaaruteqarnerata kingorna, innuttaasut amerlasuut tunillatsissimasinnaanermut ernumallutik Peqqinnissaqarfimmut saaffiginnissimapput. ”Saaffiginninnerpassuit Peqqinnissaqarfimmi ulapititsipput. Qujanartumilli saaffiginnittut arlaannaalluunniit tunillatsinnissamut navianartorsiorsimanngilaq” Paneeraq Noahsen naggasiilluni oqarpoq.
Paasissutissat annertunerusut uunga saaffiginninnikkut pissarsiarineqarsinnaapput: Paneeraq Noahsen, Nunatsinni Nakorsaaneqarfik, toqqaannartoq +299 345194 email pano@nanoq.gl