Qimmiaqqanik qitsuaqqanillu siusippallaamik arnaannit sungiussisimajunaarsitsisarnernut tunngasoq

Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffimmi qimmiaqqanik imaluunniit qitsuaqqanik siusippallaakkut arnaannit tigullugit piginnittuulersunut tunniussisarnernut suliassanik akuttunngitsumik suliaqartoqartarpoq. Ilaatigut qimmiaqqat sapaatit akunnerinik marlunnik - pingasunik utoqqaassusillit Facebookikkut tuniniarneqartut takusarpavut. Uumasunik illersuineq pillugu inatsit malillugu uumasut peqqissaartumik isumagineqassapput timimikkut pisattamikkullu, pissusilersortarnermikkut peqqissuunissamikkullu pisariaqartitaat mianeralugit periaatsit akuerisaasut ilisimatuussutsikkullu ilisimalikkat naapertorlugit paarineqartussaapput. Periutsit atuuttut malillugit qimmiaqqat sapaatit akunnerinik arfineq-pingasunik utoqqaassuseqalersinnagit arnaminnit peersinneqassanngillat. Qitsuaqqanut tunngatillugu ikinnerpaamik sapaatit akunnerinik aqqaneq-marlunnik utoqqaassuseqalersinnagit arnaminnit peersinneqassanngillat. Qimmiaqqat qitsuaqqalluunniit siusinnerusukkut arnaminnit peersinneqaraangamik timimikkut tarnimikkullu nalinginnaasumik ineriartunngitsooriataarsinnaasarput taamaattumillu ajornartorsiuteqartumik uumasuutitaarnissaq qaninnerulersarpoq.

Malittarisassat unioqqutinneqarpata uumasumik piginnittumut imaluunniit uumasumik nakkutiginnittumut suliassanngortitsisoqarsinnaavoq. Uumasuummik illersorneqarsinnaasumik paarsisoqarsinnaanngippat uumasumut akisussaaffik allamut tunniunneqassaaq. Nuummi uumasunik illersuineq pillugu suleqatigiiffik Dyrenes Venner nassaassaavoq, taannalu pisariaqartitsisoqarpat ikiuussinnaavoq. Allatut iliortoqarniarpat uumasut illersorneqarsinnaasumik toqunnissaat isumagineqassaaq.

Qimmiuteqarneq qitsuuteqarnerlu ataatsimut isigalugu.

Qimmitaarusukkaanni qitsuutitaarusukkaanniluunniit akuersissummik pissarsinissaq siunertaralugu kommunimut saaffiginnittoqassaaq. Qimmit perlerornermut, qimmit nappaataannut kiisalu parovirusimut, qitsuillu perlerornermut inatsisitigut pisussaaffiusumik akiuussusersorneqartussaapput. Kiisalu qimmit kinaanerannut normulerlugit chipimik nalunaaqutserneqassapput nalunaarsorneqarlutillu, nunalu tamakkerlugu paasissutissanut toqqorsivimmi akiuussusersorsimanermut nalunaarsorneqassallutik, tamannalu aqqutigalugu qimmerisat tammarsimappat takoqqinnissaa anguneqassaaq. Taamaammallu nuussimaneq, attaveqarnissamut paasissutissat nutaat allamillu piginnittoqalersimaneq pillugit kommunimut attaveqarnissaq pingaaruteqarpoq.

Naggataatigut qimmit qitsuillu pillugit kommunini ileqqoreqqusat eqqumaffigineqarnissaat innersuussutigineqassaaq, tamakkunanimi qimmeqarnissamut qitsuuteqarnissamullu malittarisassat arlallit allassimapput, ileqqoreqqusat aamma kommunimiit kommunimut assigiinngitsuusinnaapput. Taamaattumik nammineq kommunerisami malittarisassat immikkut ittut atuuttullu paasiniaaffigisarnissaat pingaaruteqarpoq. Assersuutigalugu qimminik qitsunnilluunniit kinguaassiorsinnaajunnaarsinneqarsimanngitsunik imaluunniit kinguaassiortinneqarnissaannut inerteqqutaasunik peqalernissaq inerteqqutaasinnaavoq.

Paasissutissat sukumiinerusut pissarsiarineqarniarpata ukununnga saaffiginnittoqassaaq:

Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfik: uumasut@nanoq.gl