AtuartigukPlastikkinik tunisassiat ataasiaannarluni atugassat atorunnaalerput
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Naalakkersuisut plastikkinik tunisassianik ataasiaannarluni atugassanik inerteqquteqalernissaq akueraat. Tamatuma kingunerisaanik kiisami ukioq naatinnagu tunisassiat avatangiisinut ajoqutaasut inaarutaasumik atorunnaassapput.
Nalunaarut akuerineqaqqammersoq plastikkinik atuinitsinnik annikillisitsinissamik siunertaqarfiuvoq. Nalunaarutip 1. novembari 2022-mi atuutilerneratigut puussiat plastikkit tigummiartakkat tigummiveqanngitsut aamma plastikkinik tunisassiat ataasiaannarluni atugassat arlallit, taakkununngalu milluartaatit, vatpindit nerinermullu ataasiaannarluni atugassat ilanngullugit inerteqqutaalissapput.
Plastikkit pinngortitamiittut avatangiisinut peqqissutsimullu kingunerluuteqartarput. Tunisassiat ataasiaannarluni atugassat, maanna inerteqqutaalersussat imartani avatangiisitsinni sinerissatsinnilu pisarput. Plastikkinut nalunaarut tunisassiat taamaattut mingutsitsiunnaarnissaannut iluaqutaassaaq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Plastikkinik atuinermik annikillisitsiniarluni suleqatigiinneq
Plastikkit pillugit suliniutissanut pilersaarut tamanut ammasumik saqqummiunneqarmalli, Naalakkersuisut inuussutissarsiutinillu ingerlataqartut akornanni qanittumik oqaloqatigiittoqarpoq. Suleqatigiinneq ataatsimoorluta – suliaqarfiit akimorlugit – plastikkit ajornartorsiutaanerisa annertusiartorneranut iliuuseqarnissap qulakkeerniarneqarnerani Naalakkersuisunit pingaartinneqarpoq.
Nalunaarut nutaaq Naalakkersuisut siorna plastikkit pillugit suliniutissanut pilersaarummik saqqummiussinerani suliniuteqarfiusussatut immikkoortut aalajangersimasut ilagaat. Innuttaasut, niuertut neriniartarfiillu akornanni plastikkinik ajornartorsiuteqarnerup eqqumaffigineqarnerulernera misigalugu nuannerpoq, Naalakkersuisoq Kalistat Lund naggasiivoq.
Misissuinerit suliniutillu arlallit aallartinneqarput
Naalakkersuisuniit suliniutit allat arlallit, plastikkinik atuinermik annikillititsiniarnermi iluaqutaasussat ingerlanneqarput. Naalakkersuisut ilaatigut anartarfilereriaatsip maanna atorneqartup saniatigut qinigassanik allanik, aammalu aalisakkerinermik inussutissarsiortut plastikkinik eqqaanissamut periarfissaannut pitsannguutissanik misissuillutik sulipput.
Plastikkinut nalunaarut nutaaq atuarneqarsinnaavoq, uani.
Puussiat tigummiartakkat plastikkit aamma plastikkimik tunisassiat ataasiaannarluni atugassat atorneqartarneri pillugit Namminersorlutik Oqartussat nalunaarutaanut tunngatillugu maleruagassat atuarneqarsinnaavoq, uani.
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat 346476/529844-mut imaluunniit e-mail: mesp@nanoq imaluunniit pan@nanoq.gl aqqutigalugit attaveqarfigineqassaaq.