AtuartigukMitid.dk-mi atortoq atorunnaartoq ajornartoortitsivoq
Nassiussisuuvoq: Naalakkersuisut Siulittaasuata Naalakkersuisoqarfia
Mitid.dk-ni NemID atorlugu MitID-mik atuutsitsilersitsisartoq maanna innuttaasunit atorneqarsinnaajunnaarpoq.
Mitid.dk aqqutigalugu nutaamik PIN-kodemik atuutsitsilersitsiniarnermullu kodemik NemID atorlugu pissarsisoqarsinnaanikuuvoq, maannali tamanna periarfissaajunnaarpoq.
MitID partnerskabet, MitID-mik piginnittuusut, pinerluttoqarsimanerata kingorna aalajangerput innuttaasut qularnaannerusumik nittartakkakkut periuseqarsinnaanissaat anguniarlugu periarfissaq atorunnaarsippaat.
Tamanna Kalaallit Nunaanni innuttaasunut passeqanngitsunut aningaaserivinnullu ungasissumi najugalinnut kaalluaassaaq.
Innuttaasup MitID-appini annaasimaguniuk, assersuutigalugu mobiileersissimaguni MitID-appimik nutaamik mobiilitaaminut ikkussileruni atuutsitsilersitsisussamik kodemik nutaamik pissarsisinnaavoq. Taamaaliornissaminulli piumasaqaataavoq kalaallit danskilluunniit passiannik chipitalimmik peqarnissaq. Innuttaasoq taamak ittumik passeqanngikkuni aningaaserivini saaffigalugu misilissinnaavaa.
Innuttaasup MitID-appiminut PIN-kodeni imaluunniit MitID-mi kodemik takutitsissutiminut kodeni puigorsimaguniuk MitID pillugu ikiorsiivimmut saaffiginnissapput. Taamaaliornissamulli piumasaqaataavoq innuttaasoq kalaallit danskilluunniit passiannik imaluunniit biilernermut allagartamik peqarnissaat, kiisalu innuttaasoq inuup normuanut tunngasumik apeqqutinut akissuteqarsinnaanissaa. Innuttaasoq passeqanngikkuni biilernermullu allagartaqanngikkuni aniingaaserivimminut saaffiginnilluni misilissinnaavaa.
Innuttaasup MitID-minut Atuisutut-ID-ni puigorsimaguniuk, mitid.dk aqqutigalugu NemID atorlugu paasiniaasinnaavoq.
Siunertaavoq innuttaasut kommuni innuttaasunut sullissivinnut ornigullutik ikiorneqartalernissaat. Maannakkulli Kalaallit Nunaanni kommunit MitID pillugu sullissinissaminnut periarfissaqanngillat.
Kalaallit Nunaanni innuttaasunut unammilligassat pillugit MitID partnerskabet saaffigineqarnikuuvoq, aaqqiissutaasinnaasumillu ujartuisoqarpoq.
MitID pillugu sukumiinerusumik uani atuarsinnaavutit: https://www.mitid.dk/
Arlaatigut apeqqutissaqaruit uunga saaffiginnissaatit: mitid@digst.dk
MitID NemLog-inilu Kalaallit Nunaanni atuutsinneqalernissaa pillugu peqqussut nr. 2090 25. November 2021-meersoq uani atuarneqarsinnaavoq: