Naalakkersuisut Neriuffiit Kattuffiannut (Neriuffik) 1,5 mio. koruuninik aningaasaliissuteqarput

Ineqarnermut Attaveqaasersuutinullu Naalakkersuisoqarfik 8. maaji 2022-mi Neriuffimmit Nuummi Rotary Kollegiet-ip tigunissaanut aamma illup isaterneqarnissaanut aningaasaliissutissanik qinnuteqaammik tigusaqarpoq. Neriuffiup illup isaternissaa aamma nunaminertap ininik nutaanik, kattuffiup atugassaanik sananermut atorneqarnissaanik kissaateqarpoq. Kattuffimmiit ilisimatitsissutigineqarpoq, ininik nutaanik, peqatigiiffiup atugassaanik sananissamut aningaasanik katersisinnaasimallutik, kisiannili nunaminertamik, Dronning Ingridip Napparsimmavissuannut qanittumi ininik sananissamut atugassamik amigaateqarlutik. Rotary Kollegiet ukiuni arlalinni assiaqusersugaasimavoq kiassagaasimananilu aammalu isaterneqartussaalluni.

Naalakkersuisuniillu nuannaarutigeqaarput illup akeqanngitsumik Neriuffimmut tunniunneqarnissaa akuersissutigineqarmat. Taamaalillunilu kattuffiup illumik isaterinissaanut 1,5 mio. koruuninik tapiiffigineqarnissaa akuereqqullugu Naalakkersuisut Inatsisartut Aningaasaqarnermut Akileraartarnermullu Ataatsimiititaliaannut qinnutigineqarluni. Qinnuteqaallu Inatsisartut Aningaasaqarnermut Akileraartarnermullu Ataatsimiititaliaannit aamma akuerineqarpoq.

Neriuffik Kalaallit Nunaanni inunnik kræftimik eqqugaasimasunik, ilaqutaannik qanigisaannillu annertoorujussuarmik sullissisuuvoq. Neriuffimmi suliaqartartut annertuumik nammineq kajumissutsimik sulisorpassuarnik tunngaveqartarluni, aammalu ullumikkut sinerissami peqatigiiffiit 14-it nalunaarsorsimallutik. Neriuffiup allaffeqarfia pikkorilluinnartunik sulisoqarpoq aammalu peqatigiiffimmi nammineq kajumissutsimik tunngaveqarluni sineriammiittunik suliaqartorpassuaqarluni, ukiullu tamaasa nammineq piumassutsiminnik oqaloqatiginnittartut peqatigiiffimmiit pikkorissartinneqartarnerat ingerlattarlugu.

Neriuffimmiit Nuummi ‘Kræftimik nappaatillit illuat’-nik, ’Siunnersuisarfik’-mik taasamik pilersitsisoqarnissaa pisariaqartinneqartoq erseqqissaatigineqarpoq. Illu siunnersuisarfittut peqatigiiffiullu illuattut atorneqassaaq, tassanngaanniillu nuna tamakkerlugu napparsimasunik tapersersuineq suliarineqassaaq, siunnersuinissamut neqeroorut IT-mut attaveqaatit aqqutigalugit atugassiissutigineqartoq aqqutigalugu nuna tamakkerlugu napparsimasut qanigisaallu, aammalu katsorsartinnermut atatillugu Danmarkimiittut anguneqarsinnaaniassammata.

Neriuffiup nammineerluni ’Siunnersuisarfik’-uip sananeqarnissaa aningaasalersussavaa, kattuffimmut aningaasaliisut, aningaasaateqarfiit aningaasaliissutaat nunalu tamakkerlugu katersuiniarnerniit assigiinngitsut aqqutigalugit qulakkeersimasai atorneqassallutik.

”Neriuffik nunatsinni nappaassuarmik kræftimik eqqugaasimasut qanigisaallu pillugit pingaarutilerujussuarnik suliaqartarpoq, taamaattumik nuannaarutigilluinnarpara Naalakkersuisut aamma Aningaasaqarnermut Akileraartarnermullu Ataatsimiititaliap ’Siunnersuisarfik ’-iup sananeqarnissaanut pilersaarutinut tapersiinissaq isumaqatigiissutigimmassuk. Qularinngilaralu tunniussinissaq tapiissuteqarnissarlu Neriuffiup sulineranut aammalu nunatsinni innuttaaqatitsinnut, suliniuteqarneranut iluaqutaalluarumaartoq”, Ineqarnermut Attaveqaasersuutinullu Naalakkersuisoq Erik Jensen oqarpoq.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik box909@nanoq.gl aqqutigalugu attaveqarfigineqassaaq.