AtuartigukIngerlatseqatigiiffiit Kalaallit Nunaanni erngup nukinganik periarfissaqarfiit atorneqanngitsut annersaannut aningaasaliinissamut kajumissaarneqarput
Nunalerinermut, Imminut Pilersornermut, Nukissiutinut Avatangiisinullu Naalakkersuisoq 10. maaji 2022-mi World Hydrogen Summit-ip Rotterdam-imi ingerlanneqarnerani Kalaallit Nunaanni Tasersiami aamma Tarsartuup Tasersuani erngup nukinganik periarfissaqarfiusut atorneqanngitsut annersaasa unammilleqatigiiffigitinneqarnissaat pillugu nalunaaruteqarpoq.
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Naalakkersuisut aningaasaliisinnaasunik, Tasersiami aamma Tarsartuup Tasersuani erngup nukinganik innaallagissiorfiliornissamut soqutiginnissinnaasunik ujarlerlutik aallartipput. Aningaasaliisussat erngup nukinganik innaallagissiorfippiamut aningaasaliinissamut, kisiannili aamma suliffissuaqarfik ataaseq amerlanerusulluunniit innaallagissamik, silap pissusianut mingutsitsinngitsumik, erngup nukinganik innaallagissiorfimmiit tunisassiarineqartussamik atuilernissamut piareersimassapput.
– Maanna Kalaallit Nunaanni erngup nukinganik periarfissaqarfiusut annersaannut aningaasaliisussanik pilerisaariniarluta unammilleqatigiissitsiniarlutalu nalunaaruteqarnerput oqaluttuarisaanermut ilannguppoq. Erngup nukinganut isumalluutit, namminneerluta illoqarfitsinnut nunaqarfitsinnullu pilersuinermut atornianngisatta allanit atorneqarsinnaalernissaat siunertaavoq. Taamaalilluta nukissiutinut mingutsitsinngitsunut nuunnissamut, aammalu nunatta isaatitsiffissaanik nutaanik qulakkeerinissamut suleqataassaagut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
- Unammilleqatigiissitsinermi naggataatigut aningaasaliisussamut, pitsaanerpaamik suliaqartussamut, aammalu uatsinnut pitsaanerpaamik neqerooruteqartussamut isumaqatigiissusiortoqarnissaa qulakkiissavarput, Naalakkersuisoq Kalistat Lund oqarpoq.
World Hydrogen Summit 9. – 11. maajimi Rotterdam-imi ingerlanneqarpoq. Ataatsimeersuarnermut nukissiutinut mingutsitsinngitsunut aningaasaliisinnaasut arlallit peqataapput.
Taamaattumik ataatsimeersuarneq aamma Kalaalit Nunaata Tasersiami aamma Tarsartuup Tasersuani erngup nukinganik periarfissaqarfiusut angisuut unammilleqatigiissitsivigineqarnissaannut nalunaaruteqarnissamut tulluulluinnartuuvoq.
Naalakkersuisoq Kalistat Lundip oqalugiaataa atuaruk, uani
Unammilleqatigiissitsinissamut nittartagaq takujuk, uani
Naalakkersuisut aningaasaliisinnaasut oqaloqatiginissaannut qaaqqusissut takujuk, uani
Attaveqarfissaq
Annertunerusumik paasisaqarusunnermi Nunalernermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476/529844-mut imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.