AtuartigukIssittumi piginnaasanik annertusaanermi Kalaallit Nunaanni tunngavissanik isumaqatigiinneq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Nunanut allanut, Inuussutissarsiornermut Niuernermullu Naalakkersuisoq aammalu Illersornissamut ministeri Morten Bødskov Issittumi Piginnaasanik annertusaanissamut tunngavissanik isumaqatigiissummik atsioqatigiipput.
Isumaqatigiissummi Issittumi Piginnaasanik annertusaanissamut Kalaallit Nunaanni pilersinneqartussanut politikkikkut isumaqatigiissutaasimasumik aallartitsivoq. Piginnaasanik annertusaanissap siunertaraa Issittumi Atlantikullu Avannaani sakkutooqarnikkut sakkutuujunngitsullu pillugit suliat nukittorsarneqarnissaat. Kalaallit Nunaannut tunngatillugu Kangerlussuarmi upalungaarsimanermut tunngaviusumik ukkatarinnittumik ilinniarfeqalernissaq, aammalu Kalaallit Nunaanniinnerunissamut nakkutilliinermilu teknikkikkut qaffasissumik piginnaasat pillugit innuttaasut peqataanissaannut nukittorsaataasussamik. Taamatuttaaq Issittumi Piginnaasat avataasigut Air Greenlandip timmisartuisa Illersornissaqarfimmi qanoq atorneqarnissaa suliarineqassaaq.
Nunanut allanut, Inuussutissarsiornermut Niuernermullu Naalakkersuisoq Vivian Motzfeldt oqaaseqarpoq:
“Isumaqatigiissutip naammassillugu isumaqatigiinniutigineqarnera nuannaarutigaara, Issittumi Piginnaasat annertusarnissaannut sinaakkutit iluanni kalaallinut innuttaasunut annertunerpaamik iluaqutaanissaanut qulakkeerinnittuummat. Illersornissamut isumaqatigiinniarnissamut aggersumut piareersarnermi suleqataanissatsinnut qilanaarpugut.”
Illersornissamut ministeri Morten Bødskov ima oqaaseqarpoq:
”Kalaallit Nunaata Danmarkillu ullumi isumaqatigiissutigisaannut nuannaarpunga. Europami eqqisseqatigiinnissamut akorngutaasinnaasut nutaat Issittumilu annertunerujartuinnartumik suliaqartoqalernera pillugu isumaqatigiissut una naalagaaffeqatigiinnut tamanut iluaqutaassaaq. Piginnaasat annertusarnerannut piviusunngortitsinissamut suleqatigiinnissamut qilanaarpunga.”
Isumaqatigiissummut atatillugu illersornissamut isumaqatigiissusiornissamut Naalakkersuisut akuutinneqarnissaannut isumaqatigiittoqassaaq.
Isumaqatigiissut uani atuarneqarsinnaavoq
Attavissaq: Ministersekretær Naasunnguaq Beck Kristensen nabk@nanoq.gl