Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

  4. Del link
🔈 Atuartiguk

Taaguusiinermut pilluaqqussut

Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik

Nunatsinni ilisimatusartut umiarsuaat ullumi 7. maaji 2022-mi ”Tarajoq”-mik atserneqarluni taaguuserneqarpoq. Umiarsuaq Kalaallit Nunaanni ilisimatusarnermi aningaasaliiffiusut annersaraat.

Nunatsinni ilisimatusartut umiarsuaat nutaaq nutaaliaasoq maanna taaguuserneqarpoq atorneqarnissaminullu piareerluni. Ilisimatusartut umiarsuaat misissuinernut assigiinngitsunut atortulersugaalluarpoq, ilisimasassanik pingaarutilinnik Kalaallit Nunaannut nunarsuullu sinneranut pilersueqataasussaq. Raajaqassutsinik aalisagaqassutsinillu, kiisalu immami avatangiisini silap pissusiata allannguutaanik misissuinerit suliassat ilagaat, umiarsuup atorneqarfissai.

  • Ilisimatusartut umiarsuaat nutaaq pillugu tamatta pilluarta. Ulloq nuannerluinnarpoq. Ilisimatusartut umiarsuaannut nutaamut 220 mio. koruunit aningaasaliissutigaagut, aammalu Aage W. Jensenip aningaasaateqarfia 15 mio. koruuninik aningaasaliivoq. Aningaasaliissutit annertoorsuit, imartatsinni isumalluutit nunatsinnut pingaaruteqarluinnarnerinut takutitsisut. Ilisimasassat, ilisimatusartut umiarsuaat aqqutigalugu pissarsiassagut ilaatigut aalisarnitsinnut, aammalu Naalakkersuisuni piujuartitsiviusumik aningaasaqarnikkut ineriartortitsinissaq qulakkeerniarlugu sulinitsinnut pingaaruteqarluinnarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Tarajoq Pinngortitaleriffiup Kalaallit Nunaanni Namminersorlutik Oqartussat sinnerlugit ingerlatissavaa. Ilisimatusartut umiarsuaata Pinngortitaleriffiup isumalluutit uumassusillit pillugit ilisimatusarneranut aammalu Kalaallit Nunaanni pinngortitami ataqatigiit pillugit ilisimasat nukittunerulernissaannut tapertaassaaq.

Kalaallit Nunaanni ilisimatusartut umiarsuaata nutaap taaguuserneqarnerani Aningaasaqarnermut Naligiissitaanermullu Naalakkersuisoq oqalugiarpoq. Oqalugiaataa uani atuaruk.

Attaveqarfissaq
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat: 346476/529844-mut imaluunniit e-mail: mesp@nanoq.gl imaluunniit pan@nanoq.gl aqqutigalugit attaveqarfigineqassaaq.