Qasigiannguani utoqqaat akerliussutsimik takutitsinerat
Nassiussisuuvoq: Isumaginninnermut, Suliffeqarnermut Nunamullu Namminermut NaalakkersuisoqarfikUtoqqaat Illersuisuata Qasigiannguani utoqqaat atukkatik naammaginanngitsut pillugit akerliussutsimik takutitsinerat paasilluarsinnaavaa.
Qasigiannguani Utoqqaat illuanni sulisup nutaarluinnaap kisimiitinneqarluni martsip 18-ani unnuarsiortinneqarsimanera toqqammavigalugu, Utoqqaat Illersuisuat Inga Egede Kommune Qeqertalimmut apriilip 4-aani saaffiginnissimavoq. Ullorli manna tikillugu ataatsimiilluunniit saaffiginnissut akissuteqarfigineqanngilaq.
Utoqqaat Illersuisuata allattoqarfianiit Utoqqaat illuanni Qasigiannguani kisimiilluni unnuarsiorsimasoq apriilip aallaqqaataani oqaloqatigineqarpoq, kingunitsianngualu Kommune Qeqertalimmut Utoqqaat Illersuisuat saaffiginnissuteqarsimavoq, apeqquteqaatinillu qulinguanik nassiussaqarsimalluni.
Taakkuli massakkumut suli akineqarsimanngillat. Ilaatigut makku apeqqutigineqarput:
“Qasigiannguani utoqqaat illuani 2022-mi marsip 18-iani 19-ianilu pisoq aallaavigalugu Kommune Qeqertalik Qasigiannguani utoqqaat illuani sulisussaqarniarneq pitsanngorsaaviginiarlugu qanoq iliuusissanik pilersaaruteqarpa?”
Kisimiilluni unnuarsiortumut taartaasimasoq naliliivoq utoqqaat illuanni aalaakkaasumik sulisussaqannginneq utoqqarnik sumiginnaanerusoq, Utoqqaat illersuisuatalu tamanna isumaqatiginerusinnaanngilaa!
Apeqqutit Kommune Qeqertalimmut nassiunneqartut amerlanerpaat sulisoqarnermut imaluunnit sulisussaaleqinermut tunngassuteqartuupput, ilaatigullu Utoqqaat Illersuisuata Inga Egedep apeqqut una nassiussimavaa:
“Tungiuinermik suliaqarluni suliffeqarfiusuni ineqartut amerlassusaat aallaavigalugu sulisut akuerisatut aalajangiivigalugit amerlassusilerneqartarput (normering), Qasigiannguani utoqqaat illuani utoqqarnut sapinnginnerusunut immikkoortortami illersorneqarsinnaasumik ingerlatsisoqassappat sulisut minnerpaamik qassiusussaappat?”
Utoqqaat illersuisuata kommunini tamani utoqqaat illuanni sulisut, utoqqarnullu angerlarsimaffimmi ikiortit tuaviornerpaamik, sulisussat naammattut atorfinitsinneqarnissaannik, pimoorussilluni sulissutigineqartariaqalersoq iliuuseqarfigeqquaa.
Inussiarnersumik inuulluaqqusillunga / Venlig hilsen
Inga Egede
Utoqqaat illersuisuat/Ældretalsmand
Mobil: 544729 E-mail: ineg@nanoq.gl