Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

🔈 Atuartiguk

Imermik misissugassanik misissuinerit nutaat takutippaat Nuummi imeq

Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Koge anbefaling

Nuummi imermit misissugassamik, 1,2,4-triazol-inut misissoqqissaarneqartussanik, misissuinerit inerneri maannakkut tiguneqarput. Imermit misissugassat nutaat triazol-imik akoqanngillat.

 

  • Danmarkimi laboratoriani assigiinngitsuni marlunni misissoqqissaarneqarsinnaanissaannut imermit misissugassat ataatsimoortut marloqiusat tiguneqarput. Maannakkut laboratorianit marluusunit inerneri tigusimalerpagut aammalu inerneri tamarmik ajunngitsutut isikkoqarput. Laboratoriat imermit misissugassat nutaat taakkua 1,2,4-triazol-imik nassaarfiginngilaat.

 

Nuummi imermit misissugassani 1,2,4-Triazol-inik nassaartoqartoq Naalakkersuisoqarfiup februaarimi nalunaarfigineqariataarnerani, laboratoriami kukkusoqarsimasoq ilimanarpoq.

 

  • Piffissami aggersumi imermit misissugassanik amerlanerusunik tigusisassamaarpugut aammalu Nuummi erngup imerneqarsinnaasup pitsaassusaa nakkutigeqqissaarniarlugu. Kisianni imeq imerneqarsinnaasoq ajunngitsoq misissueqqissaarnerit takutimmassuk annertuumik nuannaarutissaavoq. Taamaattoq aamma tupannerput ilinniarfigaarput, aammalu paasititsiniaaneq, tamatta immikkut qanoq tatsit imeqarfiit paarilluarnissaannut peqataasinnaanersugut eqqaasitsisussaq, piaartumik aallartinniarparput, taama oqarpoq Naalakkersuisoqarfimmi pisortaaneq Mette Skarregaard Pedersen. 

 

Imermit misissugassat Nuummi 2022-mi februaarimi tiguneqartut 1,2,4-triazol sinnikuinik literimut 0,22 aamma 0,71 mikrogram-inik annertussusilinnik akoqartut paasineqarpoq. Inerneri naatsorsuutigineqarsimanngillat, taamaattumik imermit misissugassanik nutaanik tigusinissaq ingerlaannaq aallartinneqarluni. Misissugassat nutaat taakkua inerneri maannakkut tiguneqarput, aammalu Nuummi imeq imerneqarsinnaasoq minguitsuusoq takutippaat.

 

Attaveqarnissamut paasissutissat

Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq Mette Skarregaard Pedersen tlf. 529844.