AtuartigukKalaallit Nunaata UK-illu killilersugaanngitsumik niueqatigiinnissamut isumaqatigiissutissaq isumaqatigiinniutigalugu aallartippaat
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Københavnimi tuluit aallartitaqarfiat aamma Naalakkersuisut Siulittaasuat Muté Bourup Egedep sisamanngornermi ulloq 27. januar ataatsimeereernerata kingorna nalunaarutigineqarsinnaavoq, illugiilluni killilersugaanngitsumik niueqatigiinnerup UK-ip aamma Kalaallit Nunaata akornanni isumaqatiinninniarnerit aallartissinnaanngormata.
Illugiilluni killilersugaanngitsumik UK-ip aamma Kalaallit Nunaata akornanni niueqatigiinnissamik isumaqatigiissut Kalaallit Nunaannut siulliussaaq. Killilersugaanngitsumik niueqatigiinnissamut isumaqatigiissutip siunertaraa nunat marluk akornanni, illugiilluni niueqatigiinnikkut sinaakkutaasut assingusunik, UK-p EU qimammagu annaaneqarsimasut atuutilerteqqinnissaat. UK, raajanut uussimasunut qalipaajakkanullu Kalaallit Nunaata niuerfiini pingaarnerpaavoq, niuerfittullu pingaaruteqarluni saarullinnut saaneerlugit tisaanut aammalu aalisakkanut tunisassianut allanut.
Killilersugaanngitsumik niueqatigiinnissamut isumaqatigiissutip siunertaraa UK-ip kalaallit aalisakkanik aamma qalerualinnik tunisassiaasa, UK-mut tunisassiat eqqunnerini akitsuutaasa annikillilernissaat imaluunniit peerneqarnissaat. UK niuerfittut Kalaallit Nunaannut pingaaruteqartillugu, pingaaruteqarluinnarpoq nunat marluk akornatsinni pitsaasumik niueqatigiinnermut attaveqaataasut atulerseqqinnissaat.
Naalakkersuisut Siulittaasuat Mute Bourup Egede oqarpoq:
”UK-ip Kalaallit Nunaatalu akornanni niueqatigiinnerup nunanut taakkununnga aningaasanik isaatitsissutaallunilu suliffisaqartitsisimavoq. Nuannaarutigaarpullu niueqatigiinnermi aningaasarsiornikkut attaveqaataasut ingerlaqqinnissaata qulakkeerneqarnissaanut suliamik ingerlatsisinnaagatta.
Nunat marluusut akornanni killilersugaanngitsumik niueqatigiinnerup suliffissuaqarnitta iluaqutigissavaat aammalu nunat marluk akornatsinni attaveqaataasut ineriartortinneqarnissaanut alloriaataassalluni, nunagisatsinnullu marluusunut iluaqutaassalluni. Isumaqatigiinninniarnissat qilanaarivagut, kiisalu ilippanaatit periarfissallu misissornissaannut, toqqaannartumillu attaveqaqatigiinnitta kingunissaanut.
Attavissaq: Jens Heinrich: jehe@ghsdk.dk Mobil: +45 31166614