Tuttunniarnissamut aamma Umimmanniarnissamut piffissaliussat pisassiissutillu - Ukiuunera 2022

Matumuuna ukiuunerani 2022-mi tuttunniarnissamut umimmanniarnissamullu piffissaliussat sumiiffinnilu tuttutassiissutit umimmattassiissutillu aalajangerneqartut nalunaarutigineqarput.

Ukiuni kingullerni Pinngortitaleriffimmiit Piniarfik 2-mi (Sisimiut-Kangerlussuaq) pisortatigoortumik qulimiguulimmik tuttunik aamma umimmannik marsimi 2018-imi kisitsisoqarpoq, taamatullu Piniarfik 3-mi (Akia-Maniitsoq) aamma Piniarfik 4-mi (Ameralik) pisortatigoortumik qulimiguulimmik tuttunik marsimi 2019-imi kisitsisoqarluni. Kisitsinermiit pisortatigoortumik nalunaarusiaq siulleq Piniarfik 2-mut tungasoq naammassineqareerpoq nalunaarusiarlu kingulleq Piniarfik 3-mut aamma 4-mut tunngassuteqartoq ilaatigut immikkut ilisimasalimmik pisariaqartitsineq pissutigalugu maannakkut aatsaat naammassineqalerpoq.

Tuttut

1. Aqutsiveqarfik Qaanaaq: Nuna Inglefield-imi aamma Prudhoe-mi inuussutissarsiutigalugu aamma sunngiffimmi ukiuunerani 2022-mi tuttunniarneq januaarip aallaqqaataaniit 2022-mi apriilip 30-at ilanngullugu ingerlassaaq tamaani aasaanerani ukiaaneranilu 2021-mut tuttutassiissutinit pisarinngitsuukkat pineqarlutik. Kangerluarsorujummi tuttut kumallit ukiuunerani killeqanngitsumik piniarneqassapput.

2. Piniarfik Nuussuaq: Aasaanerani aamma ukiaanerani 2021-mut tuttutassiissutinit pisarinngitsuukkat piffissami januaarip 31-annit 2022-mi februaarip 20-at ilanngullugu piniarneqassapput.

Tunngavilersuutit: Piniarfik 2-mi (Sisimiut-Kangerlussuaq), Piniarfik 3-mi (Akia-Maniitsoq) aamma Piniarfik 4-mi (Ameralik) qaammatini tallimani killeqanngitsumik inuussutissarsiutigalugu aasaanerani aamma ukiaanerani 2021-mi tuttunniartoqareerpoq, piniarfinni pineqartuni Pinngortitaleriffiup kisitsinera naapertorlugu tuttut amerlavallaalersimapput. Piniarfiit sinnerini ikinnerusunik tuttoqarfiusuni qaammatit pingajuat avillugu killeqanngitsumik inuussutissarsiutigalugu tuttunniartoqareerpoq.

APN-ip kommunit qanimut suleqatigalugit akuersissutinik utertitsisarneq aamma utertitsinngitsoortarneq malinnaaffigivaa. Pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissaannut ukiuni aggersuni kinguneqassaaq. Erseqqissaatigineqarpoq qamuteralaannik, ATV-nik kiisalu qamutinik motoorilinnik allanik atuinermi kommunini ileqqoreqqusat malinneqassasut, tuttunillu malersuinermi piniarnermilu atornissaat inerteqqutaammat. Assartuutit motoorillit tuttunut qaninnerpaamik 500 meterinik ungasissuseqassapput.

Umimmaat

1. qutsiveqarfik Maniitsoq: Piniarfik 1-imi ukiuunerani qimussimik killilimmik umimmanniarneq februaarip 14-iannit 2022-mi marsip 13-at ilanngullugu ingerlassaaq. Piniarfik 2-mi, Piniarfik 3-mi aamma Piniarfik 4-mi - Ilanngussaq 4 takuuk – inuussutissarsiutigalugu ukiuunerani killilimmik umimmanniarneq januaarip 31-anni 2022-mi aallartissaaq februaarip 20-at ilanngullugu ingerlassalluni. Tiggaat tammajuitsussanik piniarnissamut pisassiissutaareersut aamma kulavaat norrallit piniaqqusaanngillat. Piniarfik 1-imi 100-nik umimmattassiisoqarpoq, Piniarfik 2-mi 100-nik umimmattassiisoqarpoq, Piniarfik 3–mi 600-nik umimmattassiisoqarpoq kiisalu Piniarfik 4-mi 200-nik umimmattassiisoqarluni.
2. Aqutsiveqarfik Sisimiut: Aasaanerani aamma ukiaanerani 2021-mi umimmattassanit pisarinngitsuukkat ukiuuneranut 2022-mut nuunneqarput piffissami februaarip 14-iannit marsip 13-at ilanngullugu qimussimik piniarneqassallutik. Qeqqata Kommunia aqutsiveqarfiup ilaani motorilinnik ingerlaarnissamut ammaaniarpoq. Taamaammat aqutsiveqarfimmi qimussimik inuussutissarsiutigalugu aamma sunngiffimmi umimmanniartoqassaaq kiisalu aqutsiveqarfiup ilaani motorilinnik umimmanniartoqassalluni. Qeqqata Kommunia suleqatigalugu pisarinngitsuukkat amerlassusaat aalajangerneqassaaq.
3. Aqutsiveqarfik Kangaatsiaq: Sisimiut aqutsiveqarfianni umimmattassanit aasaanerani aamma ukiaanerani 2021-mi pisarinngitsuukkat ukiuuneranut 2022-mut nuunneqarput piffissami februaarip 14-iannit marsip 13-at ilanngullugu qimussimik piniarneqassallutik. Kommune Qeqertalik suleqatigalugu pisarinngitsuukkat amerlassusaat aalajangerneqassaaq.
4. Umimmaqarfik Naternaq: Aasaanerani aamma ukiaanerani 2021-mi umimmattassanit pisarinngitsuukkat ukiuuneranut 2022-mut nuunneqarput piffissami februaarip 14-iannit marsip 13-at ilanngullugu piniarneqassallutik. Kommune Qeqertalik aamma Avannaata Kommunia suleqatigalugit pisarinngitsuukkat amerlassusaat aalajangerneqassaaq.
5. Umimmaqarfik Ivittuut: Ukiuunerani umimmanniartoqassanngilaq.
6. Umimmaqarfik Sigguk: Ukiuunerani umimmanniartoqassanngilaq.
7. Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq ukiuunerani 2022-mi marsi naallugu ingerlanneqassaaq aqutsiveqarfimmilu umimmattassiissutit 60-iullutik.
8. Aqutsiveqarfik Qaanaaq: Nuna Inglefield-imi, Nuna Prudhoe-mi aamma Qooqquni inuussutissarsiutigalugu aamma sunngiffimmi ukiuunerani 2022-mi umimmanniarneq januaarip aallaqqaataaniit apriilip 15-at ilanngullugu ingerlanneqassaaq, tamaanilu aasaanerani aamma ukiaanerani 2021-mi umimmattassiissutinit pisarinngitsuukkat piniarneqassallutik. Taassuma saniatigut Pituffimmi mittarfeqarfiup eqqaani umimmaat akornusersuisut Pituffimmi Innuttaasut Siunnersuisoqatigiit, Avannaata Kommunia aamma Qaanaami piniartut suleqatigalugit killilimmik piniarneqarsinnaassapput.
9. Umimmaat allat Nanortallip timaanut nuunneqarsimasut aamma Nuup Kangerluanut ingerlaarlutik pisimasut eqqissisimatitaalluinnarput.

Tunngavilersuutit: Aqutsiveqarfik Ivittuut: Umimmaat amerlassusaasa ikinnerpaaffissaat pillugit ukiuni kingullerni kisitsisoqartarsimanera tunngavigalugu ukiuunerani 2022-mi umimmanniartoqassanngilaq. Ivittuuni umimmaat maannakkut amerlavallaannginnerat tunngavigineqarpoq.

Aqutsiveqarfik Sisimiut: Aasaanerani aamma ukiaanerani umimmattassat misilittakkat tunngavigalugit tamakkerneqartanngillat, taamaammat pisarinngitsuukkanik ukiuuneranut nuussisoqarpoq.

Aqutsiveqarfik Kangaatsiaq: Sisimiut aqutsiveqarfianni umimmattassat misilittakkat tunngavigalugit aasaanerani aamma ukiaanerani tamakkerneqartanngillat, taamaammat pisarinngitsuukkanik ukiuuneranut nuussisoqarpoq qimussimik piniarneqarnissaat siunertaralugu.

Aqutsiveqarfik Maniitsoq: Aqutsiveqarfimmi ukiuunerani 2022-mi killilimmik umimmattassiisoqarnissaa biologit inassuteqaataannik tunngaveqarpoq. Aqutsiveqarfimmi Maniitsoq-mi umimmaat qulimiguulimmiit 2018-mi kisinneqarput. Umimmaat siornamut naleqqiullugu immamiit uuttorlugu qatsinnerusumi takuneqartarput (agguaqatigiissillugu 500 meterinit qatsinnerusuni). Umimmaat pingaartumik umimmaqarluarfiusuni marlunni Kangerlussuarmiit siornamut naleqqiullugu ungasinnerusumiittuni takuneqartarput. Sumiiffiit umimmaqarluarfiusut nerisarfissatut pitsaannginnerusutut nalilerneqarput. Taamaammat Pinngortitaleriffiup inassutigaa aqutsiveqarfimmi assartuutinik motorilinnik atuineq killilersimaarneqassasoq umimmaat akornusersorneqarnerat milliseqqullugu. Umimmaat amerlassusaasa ikinnerpaaffilerlugit kisitsisoqaraangat Piniarfik 2-mi aamma taamaattoqartartoq paasineqareerpoq. Aqutsinikkut anguniarneqarpoq umimmaat assartuutinit motoorilinnit akornusersorneqarnerat millisinneqassasoq taamaaliornikkut norraat amerlinerulersinneqarnissaat.

APN-miit erseqqissaatigineqarpoq qamuteralannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, umimmannillu malersuinermi piniarnermilu atornissaat inerteqqutaammat. Assartuutit motoorillit umimmannut uumasunut qaninnerpaamik 500 meterinik ungasissuseqassapput.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigineqarsinnaavoq, oqarasuaat 34 53 06, e-mail: amalie@nanoq.gl

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani tuttunut Piniarfik 1-11.

Ilanngussaq 3: Kalaallit Nunaanni umimmaqatigiit.

Ilanngussaq 4: Maniitsup Aqutsiveqarfiani umimmannut Piniarfik 1, 2, 3 aamma 4.

Ilanngussaq 5: Sisimiut aqutsiveqarfia.

Ilanngussaq 6: Umimmaqarfik Naternaq.

Ilanngussaq 7: Tuttoqarfik Nuussuaq