Kalaallit Nunaat naligiinnerusoq

Ullut arlallit isumaqatiginninniarnerit ingerlanneqareersut Inatsisartuni partiit amerlanerussuteqartut, tassaasut Inuit Ataqatigiit, Partii Naleraq, Demokraatit Atassullu sisamanngornermi 2022-mut aningaasanut inatsimmut isumaqatigiissuteqarput.

Utoqqarnut siusinaartumillu soraarnerussutisiallit atugaannik pitsannguineq, Qaqortumi nutaamik mittarfiliornissaq kiisalu qaleralinnut akitsuummik atorunnaarsitsineq ilaatigut partiit ukiumut tullermut aningasaanut inatsimmi isumaqatigiissutigisaanni aallunneqarput.

”Suliaq sivisuumik pissanganartumillu ingerlanneqarpoq, maannalu aningaasanut inatsimmik isumatusaarfiusumik, ilaatigut utoqqarnik, siusinaartumik soraarnerussutisialinnik kiisalu nunatsinni sinerissap qanittuani aalisartorpassuarnik iluaqutsiisumik isumaqatigiissuteqarpugut. Isumaqatiginninniarnerit pimoorussisumik ingerlanneqarput, innuttaasullu pitsaanerusumik atugaqalernissaannut politikikkut paasinnittoqarlunilu annertuumik piumassuseqartoqarpoq”, Aningaasaqarnermut Nunamullu Namminermut Naalakkersuisoq Asii Chemnitz Narup oqarpoq.

Aningaasanut inatsimmi isumaqatigiissutigineqartut pingaarnerit ilaat makkuupput:

• Utoqqaat atugaannik pitsaanerulersitsineq: Utoqqalinermi soraarnerussutisianut tunngaviusumik akiliutit 64.239 kr-nit 73.239 kr-nut qaffanneqarput. Taamattaarlu utoqqaat utoqqaat illuini najugaqartut ”kaasarfimmiui” ukiumut 29.550 kr-nit 32.120 kr-nut qaffanneqarput.
• Siusinaartumik utoqqalinersiallit pisartagaasa qaffanneqarnerat: Siusinaartumik soraarnerussutisiat 118.680 kr-nit 124.340 kr-nut qaffanneqarput. Siusinaartumik soraarnerussutisiallit ulloq unnuarlu angerlarsimaffinni najugaqartut ullumikkut ukiumut 23.736 kr-nik ”kaasarfimmiorsisarput”, ukiortaamillu ukiumut 30.840 kr-nik pissarsisalissapput.
• Qaqortumi mittarfik: Qaqortumi mittarfiup 1500 meterinik takissusillip aningaasalersorneqarnissaa partiit isumaqatigiissutigaat. Nunap immikkoortuani namminersorlutik inuussutissarsiortut takornariartitsisullu ineriartornissamut periarfissillugit attaveqaatit pitsaanerulersinneqassapput.
• Aalisakkanut akitsuummik atorunnaarsitsineq: Tassani 2022-mi sinerissap qanittuani qaleralinnut akitsuutip peerneqarnissaa partiit isumaqatigiissutigaat.

Isumaqatigiissut tamakkiisoq uani takuneqarsinnaavoq.

Paasissutissat erseqqinnerusut pillugit naalakkersuisup allattaa Karen Motzfeldt toqqaannartumik oqarasuaatip normua 345213 imaluunniit email: kamz@nanoq.gl atorlugit attaveqarfigiuk