Naalakkersuisut pinngortitami cigaritsit kimmivikuisa ikinnerulernissaat kissaatigaat

Nassuiaat “Cigaritsit kimmivikui pinngortitamit peerlik” atorlugu Naalakkersuisut cigaritsit kimmivikuisa avatangiisinut ajornartorsiutaanerannik aallussilerput, aammalu cigaritsit kimmivikuisa igiinnakkat amerlassusaannik ikilisaaniarluni suliniutit suut aallunneqarsinnaanersut misissuiffiginialerlugu.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup misissueqqissaarnera naapertorlugu nunatsinni pujortartartut 15%-iisa ulluinnarni aammalu 11%-it sapaatit akunnikkaartumik kimmivikuminnik igitsiinnartarnertik nassuerutigaat. Kisiannili aamma misissuinermi takutinneqarpoq, inersimasut quliugaangata qulingiluat cigaritsit kimmivikuisa aqqusinermut pingortitamullu qimaannarneqartarnerisa ajornartorsiutaanerinut isumaqataasut. Pujortartartut pujortartanngitsullu akornanni suliniutit, cigaritsit kimmivikuisa igiinnarneqartartut amerlassusiinik killilersueqataasinnaasut annertuumik tapersersorneqarput.

• Nunatsinni suliniutit, cigaritsit kimmivikuisa igiinnarneqartartut amerlassusiinik killilersueqataasinnaasut annertuumik tapersersorneqartut takullugu nuannerpoq. Naalakkersuisuni suliniutinik amerlanerusunik, illoqarfitta, nunaqarfitta pinngortitallu eqqagaqarunnaarnissaannik anguniagaqarfiusunik suliniuteqarniarpugut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Cigaritsit kimmivikui eqqagaapput, aqqusinerni pinngortitamilu amerlanerpaasartut. Ajornartorsiutaapput avatangiisinut illoqarfinnilu isigiuminaallisitsisaramik, aammalu plastikkit seqummaanik akuutissanillu ajoqutaasinnaasunik allanik mingutsitsisaramik.

• Naalakkersuisut paasititsiniaanermi suliaqarnikkut pujortartartunut cigaritsit kimmivikuisa eqqaavimmut iginneqartarnissaat eqqaasitsissutiginiarpaat. Cigaritsit kimmivikuisa plastikkiaqqanik, avatangiisitsinnut ajoqutaasartunik sanaajunerat immaqa eqqarsaatigineqartanngilaq. Neriuppunga paasititsiniaanikkut pujortartartut eqqortumik iliornissaannut, taamaalillutillu mingutsitsinnginnissaannut ikiorneqarumaartut, Naalakkersuisoq Kalistat Lund oqarpoq.

Cigaritsit kimmivikui sivisoorujussuarmik arroriartortarput, taamaattumillu iginneqarfimminni ukiuni arlalinni uninngasinnaapput. Taamatullu anori nittaallallu peqqutigalugit cigaritsit kimmivikui pilertortumik immamut pisinnaapput.

• Eqqortumik iliornissaq ajornanngitsuussaaq, taamaattumillu kommunit illoqarfinni nunaqarfinnilu eqqaavinnik naammattunik ilioraanissaat pingaaruteqarpoq. Aamma tamatta immikkut akisussaassusermik tigusissaagut. Pinngortitamiinnitsinni arsakoorfiit kaasarfimmiorisartakkat atussapput, imaluunniit kimmivikoq cigaritsit puuanut, kingusinnerusukkut igitassanngorlugu utertillugu ikisinnaavarput, Naalakkersuisoq Kalistat Lund oqarpoq.

Nassuiaat “Cigaritsit kimmivikui pinngortitamit peerlik” atuarneqarsinnaavoq, uani.

Attaveqarfissaq
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat: 346476/529844-mut, imaluunniit e-mail: mesp@nanoq.gl imaluunniit pan@nanoq.gl aqqutigalugu attaveqarfigineqarsinnaavoq.