Tuttunik umimmannillu pisanik nalunaaruteqarnissaq pillugu eqqaasitsissut.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup matumuuna nalunaarutigaa piniarfinni Sisimiut-Kangerlussuaq-mi, Akia-Maniitsoq-mi aamma Ameralik-mi sunngiffimmi tuttunniarneq oktobarip 31-anni 2026-mi unimmat, tamannalu taamaalilluni ulloq piniarfiusoq naggataavoq.

Naalakkersuisoqarfiup ilutigalugu inuussutissarsiutigalugu piniartunut aamma sunngiffimmi pinialuttartunut tamanut eqqaasitsissutigissavaa tuttut aamma umimmaat piniagaanerat illersugaanerallu pillugit nalunaarutit atuuttut malillugit aappaagu akuersissutinik qinnuteqarsinnaassagaanni pisanik nalunaaruteqarnissaq inatsisitigut piumasaqaataammat.

Tamanna isumaqarpoq inuussutissarsiutigalugu piniartut aamma sunngiffimmi pinialuttartut 2026-mi pisanik nalunaaruteqarsimasut kisimik 2027-mi akuersissutinik qinnuteqarsinnaassasut. Taamaammat tuttunik umimmannillu pisanik nalunaaruteqarnissaq pingaaruteqartorujussuuvoq.

Tuttunik umimmannillu pisanik nalunaaruteqarneq nittartakkakkut www.sullissivik.gl aqqutigalugu pisinnaavoq imaluunniit akuersissummik pisanik nalunaaruteqarnertalimmik kommunimut utertitsinikkut. Pisanik nalunaaruteqarnissamut periarfissat taamaalillutik marluupput. Pisaqarsimanngikkaanni susaarsimanertut nalunaarutigineqassaaq. Piffissaliussap piniarfiusup naareerneranit pisanik nalunaaruteqarnissamut ullut 14-it periarfissaapput.

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigineqarsinnaavoq, e-mail: apn@nanoq.gl