Isumaginninnermut Aqutsisoqarfimmi pisortaq nutaaq atorfinitsinneqarpoq

Arnajaraq Hammeken Isumaginninnermut Aqutsisoqarfimmi pisortatut nutaatut atorfinitsinneqarpoq. Decembarip aallaqqaataani 2026-mi atorfinissaaq. Isumaginninnermut tunngasunik annertuumik misilittagaqarpoq aqutsinermullu suliatigullu piginnaasaqarluartuulluni.

Arnajaraq Hammeken sulinermini aqutsisutut isumaginninnermullu tunngasunik assigiinngitsunik suliaqartarsimavoq. Isumaginninnikkut suliniutinik ineriartortitsinermik, siunnersuisarnermik, aaqqissuussaanermik ineriartortitsinermik aammalu suliassaqarfiit akimorlugit suleqatigiinnermik annertuumik misilittagaqarpoq.

"Arnajaraq Hammekenip Isumaginninnermut Aqutsisoqarfimmi pisortanngornissaa nuannaarutigaara. Suliatigut nukittuunik piginnaasaqarpoq aqutsinermillu annertuumik misilittagaqarluni, tamannalu Isumaginninnermut Aqutsisoqarfiup nunatsinni tamarmi meeqqat, inuusuttut ilaqutariillu pillugit sulinerata nanginneranut nukittorsaataassaaq sullissinerullu pitsanngorsarnissaanut suleqataassalluni. Suliassaqarfimmi suliassarpassuit pingaarutillit pillugit suleqatigiinnissarput qilanaaraara," Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi pisortap Helena Lynge Møllerip aamma aqutsisoqarfimmi pisortassap tikilluaqqunissaa qilanaaraa.

"Isumaginninnermut Aqutsisoqarfimmi pisortatut taama misilittagaqarluartigisumik piginnaasaqarluartigisumillu atorfinitsitsisinnaasimanerput nuannaarutigeqaara. Arnajaraq Hammeken suliatigut nukittuunik tunngavissaqarpoq isumaginninnerlu pillugu itisuumik ilisimasaqarluni. Suleqatigiilernissarput aammalu Isumaginninnermut Aqutsisoqarfik peqatigalugu kommunillu qanimut suleqatigalugit nunatsinni tamarmi meeqqanut, inuusuttunut ilaqutariinnullu iluaqutaasumik suliniutinik ineriartortitsinerup nanginnissaa qilanaaraakka," Naalakkersuisoqarfimmi pisortaq Helena Lynge Møller oqarpoq.

Isumaginninnermut Aqutsisoqarfik Kalaallit Nunaanni isumaginninnerup ineriartortinneqarnerani qitiusumik inissisimavoq. Arnajaraq Hammekenip atorfinitsinneqarneratigut aqutsisoqarfiup siunnersuisarnikkut, ineriartortitsinikkut isumaginninnikkullu suliniuteqarnikkut kommuninik, suliamik ilisimasalinnik innuttaasunillu tapersersuilluni sulinera nukittorsarneqarpoq.



Attavissaq
Sukumiinerusumik paasisaqarusukkuit Naalakkersuisumut Allatsi Misu Benjaminsen e-mailikkut mibe@nanoq.gl imaluunniit oqarasuaatikkut: +299 24 79 51 attavigiuk.